Visit:
Colon Falls Out | ఫ్లోరిడా, జూన్‌ 9: పెద్ద పెట్టున వచ్చిన తుమ్ము.. ఒక వ్యక్తి పేగులు బయటపడేలా తన ప్రతాపాన్ని చూపింది. ఈ అసాధారణ ఘటన అమెరికాలోని ఫ్లోరిడా రాష్ట్రంలో చోటుచేసుకుంది. బాధితుడ్ని వెంటనే దవాఖానకు తరలించటంతో, వైద్యులు సర్జరీ నిర్వహించి..అతడ్ని కాపాడగలిగారు. న్యూయార్క్‌ పోస్ట్‌ కథనం ప్రకారం, 63 ఏండ్ల ఓ వ్యక్తి తన భార్యతో కలిసి రెస్టారెంట్‌కు వెళ్లగా..హఠాత్తుగా పెద్ద పెట్టున తుమ్ము వచ్చింది. కొద్ది సేపటికి పొత్తి కడుపు భాగమంతా రక్తంతో తడిసిపోయి.. నొప్పితో విలవిల్లాడాడు.
అసలేం జరిగిందని భార్య పరిశీలించి చూడగా..అతడి పొట్ట భాగం నుంచి పేగులు బయటకు పొడుచుకుని రావటం కనిపించింది. ఆందోళనకు గురైన ఆమె వెంటనే అంబులెన్స్‌కు ఫోన్‌ చేసి.. తన భర్తను దవాఖానకు తరలించింది. వైద్యులు సైతం అతని కేసు వివరాలు తెలుసుకొని షాక్‌కు గురయ్యారు. గతంలో అతడికి ఉదరభాగంలో సర్జరీ జరిగిందని, పెద్ద పెట్టున వచ్చిన తుమ్ము లేదా దగ్గుతో ఇలా జరిగి వుండవచ్చునని వైద్యులు అంచనావేశారు.
