Visit:
High Functioning Anxiety | పని ప్రదేశంలో ఎప్పుడూ చురుకుగా కనిపించడం, అప్పగించిన పనులను సమయానికి పూర్తి చేయడం, విజయాలు సాధించడం చూసి చాలామంది ఆ వ్యక్తి మానసికంగా కూడా బలంగా ఉన్నాడని భావిస్తారు. అయితే బయటకు విజయవంతంగా కనిపిస్తున్నా, లోపల తీవ్ర ఆందోళనతో పోరాడే పరిస్థితిని హై-ఫంక్షనింగ్ యాంగ్జైటీగా పేర్కొంటున్నారు. ఇది అధికారిక వైద్య నిర్ధారణ కాకపోయినా, అనేక మంది ఉద్యోగులు, విద్యార్థులు, వృత్తి నిపుణులు ఈ సమస్యను నిశ్శబ్దంగా అనుభవిస్తున్నారు. హై-ఫంక్షనింగ్ యాంగ్జైటీ ఉన్న వ్యక్తులు తమ బాధలను బయటకు చూపించకుండా పనుల్లో మరింత నిమగ్నమై ఉంటారు. దీంతో వారి ఆందోళనను ఇతరులు గుర్తించలేకపోతారు. ముఖ్యంగా అధిక ఒత్తిడి ఉన్న ఉద్యోగాల్లో, కార్పొరేట్ సంస్కృతిలో ఈ పరిస్థితి సాధారణంగా కనిపిస్తుంది. విజయాన్ని కేవలం పనితీరు ఆధారంగా కొలిచే వాతావరణం ఈ సమస్యను మరింత పెంచుతుంది.
ఈ సమస్యకు ప్రధాన సంకేతాల్లో ఒకటి నిరంతర ఆలోచనలు. సమావేశాలు, ఈమెయిల్స్, సంభాషణలు ముగిసిన తర్వాత కూడా వాటిని మళ్లీ మళ్లీ గుర్తు చేసుకుంటూ, ఇలా చేసి ఉంటే బాగుండేది అని ఆలోచించడం సాధారణ లక్షణంగా కనిపిస్తుంది. జరిగిన విషయాల కంటే జరగాల్సిన పరిణామాల గురించే ఎక్కువగా ఆలోచించడం మానసిక అలసటకు దారితీస్తుంది. పరిపూర్ణత కోసం అధికంగా ప్రయత్నించడం కూడా హై-ఫంక్షనింగ్ యాంగ్జైటీకి మరో సంకేతం. తప్పులు చేయాలనే భయం కారణంగా ప్రతి పనిని అత్యంత జాగ్రత్తగా చేయడానికి ప్రయత్నిస్తారు. చిన్న పొరపాట్లకే తమను తాము తీవ్రంగా విమర్శించుకోవడం, ఇతరుల దృష్టిలో లోపంలేని వ్యక్తిగా కనిపించాలని తపించడం ఈ పరిస్థితిని మరింత తీవ్రతరం చేస్తుంది.
పని ముగిసిన తర్వాత కూడా మానసికంగా విశ్రాంతి తీసుకోలేకపోవడం మరో ముఖ్య లక్షణం. కార్యాలయ సమయం పూర్తయినా పనుల గురించే ఆలోచించడం, పెండింగ్లో ఉన్న బాధ్యతల గురించి ఆందోళన చెందడం, వ్యక్తిగత సమయాన్ని కూడా ఉద్యోగానికి అంకితం చేయడం తరచూ కనిపిస్తుంది. ఆందోళనను ఎదుర్కొనే ప్రయత్నంలో కొందరు మరింతగా పని చేయడం ప్రారంభిస్తారు. ఎక్కువ పనులు తీసుకోవడం ద్వారా మనసును మళ్లించుకోవాలని ప్రయత్నిస్తారు. అయితే ఈ అలవాటు క్రమంగా శారీరక, మానసిక అలసటకు దారితీసి బర్నౌట్ ప్రమాదాన్ని పెంచుతుంది. హై-ఫంక్షనింగ్ యాంగ్జైటీ కేవలం మానసిక ప్రభావమే కాదు, శారీరక లక్షణాల రూపంలో కూడా బయటపడుతుంది. తరచూ తలనొప్పి, అలసట, మెడ లేదా భుజాల కండరాల్లో బిగుతు, నిద్రలేమి వంటి సమస్యలు కనిపిస్తాయి. మెదడు నిరంతరం అప్రమత్తంగా ఉండటం వల్ల శరీరంపై కూడా ప్రభావం పడుతుంది.
ప్రతి విషయాన్ని తమ నియంత్రణలో ఉంచుకోవాలనే తపన కూడా ఈ సమస్యకు సంకేతంగా భావిస్తారు. పనులను ఇతరులకు అప్పగించడంలో ఇబ్బంది పడటం, జట్టు సభ్యులు సహకరించకపోతే తీవ్ర ఆందోళన చెందడం వంటి లక్షణాలు ముఖ్యంగా నాయకత్వ బాధ్యతలు నిర్వహించే వారిలో ఎక్కువగా కనిపిస్తాయి. విజయవంతమైన కెరీర్ ఉన్నప్పటికీ విఫలమవుతాననే భయం వెంటాడటం కూడా హై-ఫంక్షనింగ్ యాంగ్జైటీకి చెందిన లక్షణమే. తాము సాధించిన విజయాలకు తగిన అర్హత తమకు లేదని భావించడం, ఎప్పుడో ఒకరోజు తమ లోపాలు బయటపడతాయని భయపడటం, మరింతగా పని చేసి తమను తాము నిరూపించుకోవాలని ప్రయత్నించడం సాధారణంగా కనిపిస్తుంది. దీనినే చాలామంది ఇంపోస్టర్ సిండ్రోమ్ గా పేర్కొంటారు. సమాజం ఉత్పాదకతను, బిజీగా ఉండటాన్ని విజయానికి ప్రమాణంగా చూడటం వల్ల ఈ సమస్య చాలా సందర్భాల్లో గుర్తించబడదు. బయటకు చురుకుగా కనిపించే వ్యక్తులు లోపల ఎంత ఒత్తిడితో ఉన్నారో ఇతరులు అర్థం చేసుకోలేకపోతారు. అందుకే ఈ సమస్య చాలా కాలం పాటు నిశ్శబ్దంగానే కొనసాగుతుంది.
హై-ఫంక్షనింగ్ యాంగ్జైటీని నిర్లక్ష్యం చేస్తే దీర్ఘకాలంలో ఆరోగ్యం, పనితీరు రెండింటిపైనా ప్రభావం పడే అవకాశం ఉంటుంది. బర్నౌట్, నిద్రలేమి, ఉద్యోగ సంతృప్తి తగ్గడం, పనిపై ఆసక్తి కోల్పోవడం వంటి సమస్యలు తలెత్తుతాయి. ఆందోళన రోజువారీ జీవితాన్ని ప్రభావితం చేయడం ప్రారంభించినప్పుడు, శారీరక లక్షణాలు విశ్రాంతి తీసుకున్నా తగ్గకపోతే లేదా భావోద్వేగ అలసట పెరిగితే నిపుణుల సహాయం తీసుకోవడం అవసరం. మానసిక ఆరోగ్య నిపుణుల సలహా, కౌన్సెలింగ్, థెరపీ వంటి విధానాలు ఉపశమనం కలిగిస్తాయి. ఈ పరిస్థితిని నియంత్రించేందుకు ఉద్యోగం, వ్యక్తిగత జీవితానికి మధ్య స్పష్టమైన హద్దులు ఏర్పరచుకోవడం ముఖ్యం. లోతైన శ్వాస వ్యాయామాలు చేయడం, మధ్య మధ్యలో చిన్న విరామాలు తీసుకోవడం, పని గంటల తర్వాత ఈమెయిల్స్ లేదా సందేశాలను పదేపదే తనిఖీ చేయకుండా ఉండటం ప్రయోజనకరంగా ఉంటుంది. అవసరమైతే కౌన్సెలింగ్ ద్వారా తమ భావాలను స్వేచ్ఛగా వ్యక్తపరచడం కూడా మానసిక ఆరోగ్యాన్ని మెరుగుపరుస్తుంది. హై-ఫంక్షనింగ్ యాంగ్జైటీ పూర్తిగా అదుపులోకి తీసుకురాగల పరిస్థితి. లక్షణాలను ముందుగానే గుర్తించి తగిన చర్యలు తీసుకుంటే మానసిక, శారీరక ఆరోగ్యాన్ని కాపాడుకోవడంతోపాటు దీర్ఘకాలిక బర్నౌట్ను నివారించవచ్చని నిపుణులు సూచిస్తున్నారు.
