Visit:
Epic | టాలీవుడ్లో ప్రస్తుతం ఆసక్తిని పెంచుతున్న యూత్ఫుల్ రొమాంటిక్ కామెడీ ఎంటర్టైనర్ ‘ఎపిక్’. ప్రముఖ తెలుగు వెబ్ సిరీస్ ‘#90’s’ కు కనెక్ట్ అయ్యేలా తెరకెక్కుతున్న ఈ సినిమాపై ఇప్పటికే మంచి అంచనాలు నెలకొన్నాయి. యంగ్ హీరో ఆనంద్ దేవరకొండ, హీరోయిన్ వైష్ణవి చైతన్య జంటగా నటిస్తున్న ఈ చిత్రానికి ఆదిత్య హాసన్ దర్శకత్వం వహిస్తున్నారు.తాజాగా ఈ సినిమాకు సంబంధించి మేకర్స్ కీలక అప్డేట్ ఇచ్చారు. ‘ఎపిక్’ను సాధారణ రిలీజ్కు ఒక రోజు ముందుగానే ప్రేక్షకుల ముందుకు తీసుకురాబోతున్నారు. ‘ఎపిక్’ సినిమాకు తెలుగు రాష్ట్రాల్లో సెప్టెంబర్ 10 సాయంత్రం పెయిడ్ ప్రీమియర్స్ నిర్వహించనున్నట్లు మేకర్స్ అధికారికంగా ప్రకటించారు. ఆ తర్వాత సెప్టెంబర్ 11న వరల్డ్వైడ్గా గ్రాండ్ థియేట్రికల్ రిలీజ్ చేయనున్నారు.
సినిమాపై మేకర్స్కు ఉన్న నమ్మకంతోనే ఒక రోజు ముందుగానే పెయిడ్ ప్రీమియర్స్కు గ్రీన్ సిగ్నల్ ఇచ్చినట్లు తెలుస్తోంది. సినిమా కంటెంట్పై పూర్తి కాన్ఫిడెన్స్ ఉండటంతో ప్రేక్షకుల స్పందనను ముందుగానే తెలుసుకునే అవకాశం కూడా ఈ ప్రీమియర్స్ ద్వారా లభించనుంది.‘#90’s’ వెబ్ సిరీస్తో దర్శకుడిగా మంచి గుర్తింపు తెచ్చుకున్న ఆదిత్య హాసన్.. ఇప్పుడు అదే యూత్ఫుల్ టచ్తో ‘ఎపిక్’ను తెరకెక్కిస్తున్నారు. ఆనంద్ దేవరకొండ, వైష్ణవి చైతన్య ప్రధాన పాత్రల్లో నటిస్తుండటంతో ఈ కాంబినేషన్పై ఆసక్తి నెలకొంది. రొమాన్స్, కామెడీ, ఫ్యామిలీ ఎమోషన్స్ మేళవింపుతో ఈ సినిమా ఉండబోతున్నట్లు తెలుస్తోంది. ముఖ్యంగా యువతను ఆకట్టుకునే అంశాలతో పాటు ఫ్యామిలీ ఆడియన్స్కు కనెక్ట్ అయ్యే ఎమోషనల్ కంటెంట్ కూడా సినిమాలో ఉంటుందని టాక్.
ఈ సినిమాలో సీనియర్ నటుడు శివాజీ, వాసుకి కీలక పాత్రల్లో నటిస్తున్నారు. వీరి పాత్రలు కథకు ప్రత్యేకమైన బలాన్ని చేకూర్చనున్నట్లు తెలుస్తోంది. ఇప్పటికే విడుదలైన ప్రచార కంటెంట్ సినిమాపై ఆసక్తిని పెంచగా.. ట్రైలర్, ఇతర ప్రమోషనల్ కంటెంట్తో అంచనాలు మరింత పెరిగే అవకాశం ఉంది. ‘ఎపిక్’ను ప్రముఖ నిర్మాతలు సూర్యదేవర నాగవంశీ, సాయి సౌజన్య సంయుక్తంగా నిర్మిస్తున్నారు. సితార ఎంటర్టైన్మెంట్స్, ఫార్చూన్ ఫోర్ సినిమాస్ బ్యానర్లపై ఈ చిత్రం తెరకెక్కుతోంది. సినిమాకు యువ సంగీత దర్శకుడు హెషమ్ అబ్దుల్ వహాబ్ సంగీతం అందిస్తున్నారు. ఆయన అందించే మెలోడీలు, బ్యాక్గ్రౌండ్ స్కోర్ సినిమాకు ప్రత్యేక ఆకర్షణగా నిలుస్తాయని చిత్రబృందం భావిస్తోంది.
