Dhurandhar | ధురంద‌ర్‌ని తెలుగులో చూడాల‌నుకున్న‌వారికి గుడ్ న్యూస్.. స్ట్రీమింగ్ ఎప్ప‌టి నుండి అంటే..!

Dhurandhar |ఎటువంటి భారీ హైప్ లేకుండా థియేటర్లలో విడుదలై బాలీవుడ్ బాక్సాఫీస్‌ను షేక్ చేసిన స్పై థ్రిల్లర్ ‘ధురందర్’ ఇప్పుడు డిజిటల్ ప్రేక్షకులను అలరించేందుకు సిద్ధమైంది. థియేటర్లలో సంచలన విజయాన్ని నమోదు చేసిన ఈ చిత్రం తాజాగా ఓటీటీ వేదికగా నెట్‌ఫ్లిక్స్‌లో స్ట్రీమింగ్‌కు వచ్చి మరోసారి చర్చనీయాంశంగా మారింది.

Dhurandhar |ఎటువంటి భారీ హైప్ లేకుండా థియేటర్లలో విడుదలై బాలీవుడ్ బాక్సాఫీస్‌ను షేక్ చేసిన స్పై థ్రిల్లర్ ‘ధురందర్’ ఇప్పుడు డిజిటల్ ప్రేక్షకులను అలరించేందుకు సిద్ధమైంది. థియేటర్లలో సంచలన విజయాన్ని నమోదు చేసిన ఈ చిత్రం తాజాగా ఓటీటీ వేదికగా నెట్‌ఫ్లిక్స్‌లో స్ట్రీమింగ్‌కు వచ్చి మరోసారి చర్చనీయాంశంగా మారింది. రణ్‌వీర్ సింగ్ ప్రధాన పాత్రలో నటించిన ఈ సినిమాలో అక్షయ్ ఖన్నా, సంజయ్ దత్, ఆర్. మాధవన్, అర్జున్ రాంపాల్ లాంటి స్టార్ నటులు కీలక పాత్రల్లో మెరిశారు. ఈ సినిమాకు ఆదిత్య ధర్ దర్శకత్వంతో పాటు నిర్మాణ బాధ్యతలు కూడా వహించడం విశేషం. విడుదలైనప్పటి నుంచి అంచనాలను మించి వసూళ్లు రాబట్టిన ‘ధురందర్’ ప్రపంచవ్యాప్తంగా రూ.1350 కోట్లకు పైగా కలెక్షన్లు సాధించి ఇండస్ట్రీ వర్గాలను ఆశ్చర్యపరిచింది.

రెండు నెలలు పూర్తయినా ఇంకా థియేటర్లలో ఆదరణ పొందడం ఈ సినిమాకు ఉన్న క్రేజ్‌కు నిదర్శనం. జనవరి 30 నుంచి ఈ సినిమా నెట్‌ఫ్లిక్స్‌లో హిందీతో పాటు తెలుగు సహా పలు దక్షిణాది భాషల్లో అందుబాటులోకి రావడంతో విస్తృత ప్రేక్షక వర్గానికి చేరువైంది. ఈ సినిమాతో సారా అర్జున్ బాలీవుడ్‌లో హీరోయిన్‌గా పరిచయం కావడం కూడా ప్రత్యేక ఆకర్షణగా నిలిచింది. కథ పరంగా చూస్తే, భారత్–పాకిస్థాన్ మధ్య ఉద్రిక్తతల నేపథ్యంతో సాగే ఈ చిత్రం భారత ఇంటెలిజెన్స్ రూపొందించిన అత్యంత రహస్య ఆపరేషన్ చుట్టూ తిరుగుతుంది. భారత సైనిక శిక్షణ పొందిన హంజా అలీ మజారీని అండర్‌కవర్ ఏజెంట్‌గా పాకిస్థాన్‌లోని కరాచీకి పంపడం, అక్కడ సాధారణ జ్యూస్ షాప్‌లో పనిచేస్తూనే స్థానిక గ్యాంగ్‌లు, రాజకీయ వ్యవస్థలోకి చొచ్చుకుపోవడం కథకు కేంద్రబిందువు.

ఒక కీలక సంఘటనలో గ్యాంగ్ లీడర్ కుమారుడిని కాపాడడంతో హంజా జీవితం మలుపు తిరుగుతుంది. అక్కడి నుంచి రెహమాన్ గ్యాంగ్‌లో కీలక వ్యక్తిగా ఎదిగి, ఎన్‌కౌంటర్ వరకు సాగిన ప్రయాణం ప్రేక్షకులను ఉత్కంఠకు గురిచేస్తుంది. యాక్షన్, ఎమోషన్స్, దేశభక్తి భావాలు సమపాళ్లలో మిళితమైన ఈ సినిమా కొన్ని చోట్ల హింసాత్మకంగా అనిపించినా అసభ్యకర సన్నివేశాలు లేకుండా సాగుతుంది. మూడున్నర గంటల నిడివి ఉన్నప్పటికీ కథనం ఎక్కడా నెమ్మదించకుండా సాగడం మరో ప్లస్ పాయింట్. బాక్సాఫీస్ పరంగా చూస్తే భారత మార్కెట్‌లో రూ.891 కోట్లకు పైగా నెట్ కలెక్షన్, రూ.1050 కోట్లకు పైగా గ్రాస్ వసూళ్లు సాధించి, ఎనిమిదో వారం కూడా కలెక్షన్లలో ‘స్త్రీ 2’ వంటి సినిమాలను వెనక్కి నెట్టి రికార్డులు సృష్టించింది. థియేటర్లలో మిస్ అయినవారికి, మళ్లీ చూడాలనుకునే ప్రేక్షకులకు ‘ధురందర్’ ఓటీటీలో పూర్తి యాక్షన్ ఎంటర్‌టైన్‌మెంట్ ప్యాకేజ్‌గా నిలుస్తోంది.