Visit:
Dhanush | తమిళ సినీ పరిశ్రమలో మరో స్టార్‌ హీరో రాజకీయాల్లోకి అడుగుపెట్టేందుకు సిద్ధమవుతున్నారా? అంటే తాజా పరిణామాలు అవుననే సంకేతాలు ఇస్తున్నాయి. ప్రముఖ తమిళ కథానాయకుడు ధనుష్‌ రాజకీయ అరంగేట్రానికి వేగంగా అడుగులు వేస్తున్నట్లు సమాచారం. ఇప్పటికే తన అభిమాన సంఘాల ద్వారా సామాజిక కార్యక్రమాలు నిర్వహిస్తూ వస్తున్న ఆయన.. ఇప్పుడు ఏకంగా రాజకీయ పార్టీ ఏర్పాటుకు సిద్ధమవుతున్నట్లు ప్రచారం జరుగుతోంది. తాజా సమాచారం ప్రకారం ధనుష్‌ తన రాజకీయ పార్టీ కోసం ‘తమిళగ ఎళుచ్చి కళగం’ అనే పేరును ఖరారు చేసినట్లు తెలుస్తోంది. ఈ పేరుతో పార్టీని ఎన్నికల సంఘం వద్ద నమోదు చేయించినట్లు తమిళ రాజకీయ వర్గాల్లో వార్తలు వినిపిస్తున్నాయి. అయితే దీనిపై ధనుష్‌ నుంచి ఇప్పటివరకు అధికారిక ప్రకటన వెలువడలేదు.
ధనుష్‌ రాజకీయాల్లోకి వస్తారనే ప్రచారం గత కొంతకాలంగా జరుగుతోంది. ఆయన అభిమాన సంఘాలు కూడా ఈ దిశగా కొన్ని కార్యక్రమాలు నిర్వహిస్తూ వస్తున్నాయి. తాజాగా పార్టీ పేరుగా ‘తమిళగ ఎళుచ్చి కళగం’ తెరపైకి రావడంతో ఈ ప్రచారానికి మరింత బలం చేకూరింది. తన రాజకీయ ప్రస్థానానికి సంబంధించిన విషయాలను ధనుష్‌ స్వయంగా ప్రకటించే వరకు వేచి చూడాలని ఆయన సన్నిహిత వర్గాలు చెబుతున్నట్లు సమాచారం. త్వరలోనే పార్టీ పేరు, విధివిధానాలు, జెండా, రాజకీయ లక్ష్యాలపై ధనుష్‌ అధికారికంగా ప్రకటన చేసే అవకాశం ఉందనే చర్చ జరుగుతోంది. రాజకీయ రంగ ప్రవేశానికి ముందు ధనుష్‌ తన అభిమాన సంఘాలను మరింత క్రియాశీలం చేస్తున్నట్లు తెలుస్తోంది. ఇటీవల ఆయన అభిమాన సంఘాలు రూపొందించుకున్న ప్రత్యేక పతాకాన్ని కూడా ఆవిష్కరించినట్లు సమాచారం. దీంతో ధనుష్‌ త్వరలోనే రాజకీయ పార్టీని ప్రకటించబోతున్నారనే ఊహాగానాలు మరింత పెరిగాయి.
సాధారణంగా తమిళనాడులో సినీ హీరోలు రాజకీయాల్లోకి రావడానికి ముందు అభిమాన సంఘాలను ఒక బలమైన వ్యవస్థగా మార్చుకుంటారు. ధనుష్‌ కూడా ఇదే తరహాలో తన అభిమానులను రాజకీయంగా సమీకరించే ప్రయత్నాలు చేస్తున్నారా? అనే చర్చ మొదలైంది. ఇప్పటికే రజనీకాంత్‌, కమల్‌హాసన్‌, విజయ్‌ వంటి సినీ ప్రముఖులు రాజకీయాలతో ముడిపడి ఉండగా.. ఇప్పుడు ధనుష్‌ కూడా రాజకీయ బరిలోకి దిగితే రాష్ట్ర రాజకీయాల్లో మరో ఆసక్తికర పరిణామంగా మారే అవకాశం ఉంది. ధనుష్‌ ప్రస్తుతం నటుడిగానే కాకుండా దర్శకుడు, నిర్మాతగా కూడా తన ప్రతిభను చాటుకుంటున్నారు. ఇలాంటి సమయంలో ఆయన రాజకీయాల్లోకి అడుగుపెడుతున్నారనే వార్త అభిమానుల్లో చర్చనీయాంశంగా మారింది.
