జిల్లాల మధ్య నీటి చిచ్చు పెడ్తరా?

రాజకీయ ప్రయోజనాల కోసం జిల్లాల మధ్య నీటి వివాదాలను రాజేసి, ఫ్లోరైడ్‌ బాధిత ప్రాంతాల ప్రజల సాగు, తాగునీటి అవసరాలను పణంగా పెట్టొద్దని సీపీఐ జాతీయ కార్యదర్శి పల్లా వెంకటరెడ్డి, ఎమ్మెల్సీ నెల్లికంటి సత్యం అన్నారు.

• సీపీఐ నేతలు పల్లా, నెల్లికంటి

హైదరాబాద్‌, అక్టోబర్‌ 19 (నమస్తే తెలంగాణ) : రాజకీయ ప్రయోజనాల కోసం జిల్లాల మధ్య నీటి వివాదాలను రాజేసి, ఫ్లోరైడ్‌ బాధిత ప్రాంతాల ప్రజల సాగు, తాగునీటి అవసరాలను పణంగా పెట్టొద్దని సీపీఐ జాతీయ కార్యదర్శి పల్లా వెంకటరెడ్డి, ఎమ్మెల్సీ నెల్లికంటి సత్యం అన్నారు.

సోమవారం వారు హైదరాబాద్‌లో మీడియాతో మాట్లాడుతూ.. మునుగోడు, దేవరకొండ నియోజకవర్గాలకు నీరందించే డిండి ఎత్తిపోతల పథకంపై కొందరు కావాలనే అసత్య ప్రచారం చేస్తున్నారని మండిపడ్డారు. తెలంగాణ అంతటినీ ఒకే రాష్ట్రంగా భావించాల్సిన తరుణంలో ఆ జిల్లా నీళ్లు ఆ జిల్లాకే అనే సంకుచిత వాదనలు ప్రాంతీయ విభేదాలకు దారితీస్తాయని హెచ్చరించారు.