టెస్టింగ్‌ వ్యూహం మార్పు!

• ఒమిక్రాన్‌ నేపథ్యంలో టెస్టింగ్‌ ప్రొటోకాల్‌లో సవరణలు
• లక్షణాలు ఉంటేనే పరీక్షలు, ‘టెస్టింగ్‌ ఆన్‌ డిమాండ్‌’ రద్దు
• హై-రిస్క్‌ జాబితాలోని వారిని వేగంగా గుర్తించడానికే..
• 2020 టెస్టింగ్‌ స్ట్రాటజీని మార్చేస్తూ ఐసీఎంఆర్‌ కొత్త రూల్స్‌

న్యూఢిల్లీ, జనవరి 19: ఒమిక్రాన్‌ వేరియంట్‌ దేశంలో వేగంగా వ్యాపిస్తున్న నేపథ్యంలో కరోనా పరీక్షల వ్యూహాన్ని (కరోనా టెస్టింగ్‌ స్ట్రాటజీ) ఐసీఎంఆర్‌ మార్చింది. ఈ మేరకు ఈనెల 10న కొత్త మార్గదర్శకాలు జారీచేసింది. 2020 సెప్టెంబర్‌ 4న జారీచేసిన టెస్టింగ్‌ స్ట్రాటజీతో పోలిస్తే ఇది పూర్తి భిన్నంగా ఉన్నది.

• గత, ప్రస్తుత స్ట్రాటజీల్లో ప్రధాన తేడాలేంటి?
• 2020లో జారీ చేసిన మార్గదర్శకాల్లో.. లక్షణాలతో సంబంధం లేకుండా కంటైన్మెంట్‌, నాన్‌-కంటైన్మెంట్‌, దవాఖానలు అని తేడాలేకుండా అందరికీ పరీక్షలు జరిపేవారు. పాజిటివ్‌గా తేలిన వ్యక్తులతో సన్నిహితంగా ఉన్న అందరికీ పరీక్షలు జరిపారు. అయితే, తాజా మార్గదర్శకాల్లో లక్షణాలు ఉన్నవారికి మాత్రమే పరీక్షలు నిర్వహిస్తారు. అలాగే, ల్యాబ్‌ పరీక్షల్లో పాజిటివ్‌గా తేలిన వారితో కాంటాక్ట్‌లో ఉన్న 60 ఏండ్లు దాటిన వృద్ధులు, ఇతర ఆరోగ్య సమస్యలు ఉన్నవారికి మాత్రమే టెస్టులు నిర్వహిస్తారు. హై-రిస్క్‌ ఉన్న వారిని త్వరితగతిన గుర్తించేందుకే ఈ మార్పులు చేశారు.
• ఇన్‌ఫ్ల్యూయెంజా వంటి జబ్బులు ఉన్నవారు, విదేశీ ప్రయాణాలు చేసినవారు, పాజిటివ్‌గా తేలిన వారితో కాంటాక్ట్‌లో ఉన్న వారికి గతంలో టెస్టులు చేసేవారు. 60 ఏండ్లు పైబడి, ఇతర ఆరోగ్య సమస్యలు ఉన్న లక్షణాలు లేనివారికి కూడా గతంలో టెస్టులు చేసేవారు. అయితే, ఇప్పుడు లక్షణాలు ఉన్న హై-రిస్క్‌ క్యాటగిరీలో ఉన్నవారికి టెస్టులు చేస్తున్నారు. తేలికపాటి లక్షణాలు, రిస్క్‌ క్యాటగిరీలో లేని వ్యక్తులకు పరీక్షలను తప్పనిసరి చేయట్లేదు.
• గతంలో ‘టెస్టింగ్‌ ఆన్‌ డిమాండ్‌’ను కచ్చితంగా అమలు చేసేవారు. అంటే, పరీక్ష చేయించుకోవడానికి సిద్ధంగా ఉన్న వారికి తప్పనిసరిగా టెస్టులు చేయాలి. అయితే, కొత్త నిబంధనల్లో ‘టెస్టింగ్‌ ఆన్‌ డిమాండ్‌’ ప్రొవిజన్‌ను తీసేశారు. పాజిటివ్‌ వ్యక్తులతో కాంటాక్ట్‌లో ఉన్న హై-రిస్క్‌ (వృద్ధులు, ఆరోగ్య సమస్యలు ఉన్నవారు) క్యాటగిరీ వారికి మాత్రమే టెస్టులు చేస్తారు. దవాఖానలు, కొవిడ్‌ సెంటర్ల నుంచి డిశ్చార్జ్‌ అయ్యేటప్పుడు టెస్టు అవసరం లేదని గత, ప్రస్తుత మార్గదర్శకాలు చెబుతున్నాయి. అయితే, హోం-ఐసొలేషన్‌ ముగిసిన వారికి కూడా టెస్టులు అవసరం లేదని తాజా మార్గదర్శకాల్లో కొత్తగా చేర్చారు.

టెస్టింగ్‌ ప్రొటోకాల్‌లో మార్పులు ఎందుకు?
గతంలో ప్రబలిన కరోనా వేరియంట్లతో (డెల్టా, డెల్టా ప్లస్‌) పోలిస్తే, ఒమిక్రాన్‌ వేగంగా వ్యాపిస్తున్నది. దేశంలో ఇప్పటికే చాలా రాష్ర్టాల్లో ఇది వ్యాపించింది. దీంతో హై-రిస్క్‌ క్యాటగిరీలో ఉన్నవారిని త్వరగా గుర్తించడం ఇప్పుడు అతి ముఖ్యం. ప్రమాదంలేని వారికి కూడా టెస్టులు చేస్తే, ముప్పు క్యాటగిరీలో ఉన్నవారిని గుర్తించడంలో జాప్యం జరుగుతుంది. అందుకే టెస్టింగ్‌ ప్రొటోకాల్‌ను మార్చారు.
దేశంలో ఇప్పటికే, 89.5 శాతం మందికి ఒక డోసు, 64.5 శాతం మందికి రెండు డోసులు ఇచ్చారు. దీంతో అత్యధిక జనాభాలో యాంటిబాడీలు ఉత్పత్తి అయ్యాయి. దేశ జనాభాలో 67 శాతం మందిలో యాంటిబాడీలు ఉన్నట్టు సెరో-సర్వేలో తేలింది. కొత్త వేరియంట్‌ తీవ్రత తక్కువగా ఉండటంతో దవాఖానలో చేరికలు కూడా తగ్గాయి. టీకా వేసుకొన్న వారిలో ఒమిక్రాన్‌ కారణంగా లక్షణాలు కనిపించడం లేదు. లేదా స్వల్ప లక్షణాలే కనిపిస్తున్నాయి. దీంతో హై-రిస్క్‌ క్యాటగిరీ కేసులనే గుర్తించాల్సిన అవసరం ఏర్పడింది. అందుకే వైరస్‌ నిర్ధారణ పరీక్షలు అందరికీ చేయాల్సిన అవసరం లేదని ఐసీఎంఆర్‌ భావిస్తున్నది.

ప్రతికూల ప్రభావం ఉంటుందా?
తాజా నిబంధనలతో పరిమితంగా పరీక్షలు నిర్వహిస్తే కేసుల సంఖ్య తగ్గే అవకాశమున్నదని, వైరస్‌ సోకినవారిని కూడా గుర్తించలేమన్న వాదనలు ఉన్నాయి. ఇది ఒకవిధంగా నిజమే. సెరో-సర్వే ప్రకారం.. దేశంలో ఇప్పటికే 67 శాతం మందికి (దాదాపు 90 కోట్లు) వైరస్‌ సోకినట్టు తేలింది. గతంలో అందరికీ పరీక్షలు నిర్వహించినప్పటికీ.. దేశంలో ఇప్పటివరకూ 3.79 కోట్లమందికే వైరస్‌ సోకినట్టు కేసుల ద్వారా నిర్ధారణ అయింది. అంటే, 86 కోట్ల మందికి వైరస్‌ సోకినా గుర్తించలేదు. ఇప్పుడు పరిమితంగా టెస్టులు చేస్తే వైరస్‌ సోకిన ఎంతో మందిని గుర్తించలేకపోవచ్చు అనే అభిప్రాయాలు వ్యక్తమవుతున్నాయి.