ముట్టుకోకుంటే.. అంటుకోదు

• ప్రభుత్వ బడుల్లో కరోనా పాఠం
• విద్యార్థులకు అవగాహన కల్పిస్తున్న ఉపాధ్యాయులు
• కొవిడ్‌ నిబంధనలు పాటించేలా పర్యవేక్షణ
• శానిటైజేషన్‌, మాస్కులు పెట్టుకోవడంపై శ్రద్ధ
• ప్రత్యేక చర్యలు చేపడుతున్న సర్కారు స్కూళ్లు

అది పెద్ద అంబర్‌పేట మున్సిపాలిటీ తట్టిఅన్నారంలోని ప్రభుత్వ పాఠశాల. పిల్లలంతా ప్రతిజ్ఞ పూర్తిచేశారు. ఇక తరగతి గదుల్లోకి వెళ్దామనుకునే లోపే ప్రధానోపాధ్యాయురాలు.. స్టాండటీజ్‌ అంటూ పిల్లలందరినీ అప్రమత్తం చేశారు.. ‘పిల్లలూ..అందరూ మాస్కులు పెట్టుకోవాల్సిందే. చేతులతోపదే పదే మాస్కులను ముట్టుకోవద్దు. ఎవరూబయట దుకాణాల్లో, రోడ్ల మీద మిక్చర్‌, బిస్కెట్లు, పాపిడి మిఠాయి ఇంకా ఏ వస్తువు కూడా కొనుక్కోవద్దు. ఎవరైనా కొంటే ఊరుకునేది లేదు’ అంటూ సున్నితంగా హెచ్చరించారు. ఒమిక్రాన్‌ భయం.. ఇతర దేశాల్లో కరోనా వైరస్‌ వ్యాప్తినేపథ్యంలో విద్యార్థులను జాగృతపరుస్తున్నారు. ఇది ఒక్క తట్టిఅన్నారంలోని సర్కారు పాఠశాలకేపరిమితం కాలేదు. జిల్లావ్యాప్తంగా ఉన్న ప్రభుత్వ పాఠశాలల్లోని విద్యార్థులను ఉపాధ్యాయులు ఎప్పటికప్పుడు చైతన్య పరుస్తున్నారు. కొవిడ్‌-19 తీవ్రతను తెలియజేస్తున్నారు. వైరస్‌ను ఎలా ఎదుర్కోవాలో, రాకుండా ఎలాంటి జాగ్రత్తలు తీసుకోవాలో సూచిస్తున్నారు.

అన్ని జాగ్రత్తలు తీసుకుంటున్నాం

పాఠశాలలో విద్యార్థులకు కరోనాపై పూర్తిస్థాయిలో అవగాహన కల్పిస్తున్నాం. ఎప్పటికప్పుడు అప్రమత్తం చేస్తున్నాం. పిల్లలకు మధ్యాహ్న భోజనం తయారీ విషయంలోనూ జాగ్రత్తలు తీసుకుంటున్నాం. విద్యార్థులకు రోజూ ఉష్ణోగ్రతలు చెక్‌ చేస్తున్నాం. ఏమాత్రం జ్వరం, ఇతర కరోనా లక్షణాలు ఉన్నా వెంటనే తల్లిదండ్రులకు సమాచారం ఇస్తున్నాం. వైద్యులను సంప్రదించాలని సూచిస్తున్నాం. – సూర్యకళ, ప్రభుత్వ పాఠశాల ప్రధానోపాధ్యాయురాలు, తట్టిఅన్నారం

రోజూ శుభ్రం చేస్తున్నాం..

విద్యార్థులు తరగతి గదిలోకి వెళ్లకముందే వారి టెంపరేచర్‌ను తనిఖీ చేస్తున్నాం. హైపో క్లోరైడ్‌ ద్రావణంతో తరగతి గదులను శుభ్రపరుస్తున్నాం. విద్యార్థులతో పాటు వారి తల్లిదండ్రులకు కూడా అవగాహన కల్పిస్తున్నాం. ముఖ్యంగా బయట వస్తువులు ఎట్టి పరిస్థితుల్లోనూ కొనుగోలు చేయొద్దని పదే పదే చెప్తున్నాం. ప్రతి విద్యార్థిపై ప్రత్యేక శ్రద్ధ పెట్టి కరోనా నివారణకు తీసుకోవాల్సిన జాగ్రత్తలను వివరిస్తున్నాం. భౌతికదూరం పాటించేలా ప్రయత్నిస్తున్నాం. – జయత్‌రాం, ప్రభుత్వ పాఠశాల ప్రధానోపాధ్యాయుడు, కుత్బుల్లాపూర్‌

అవగాహన.. ప్రత్యేక పర్యవేక్షణ

• పాఠశాలలోని ప్రతి తరగతి క్లాస్‌ లీడర్‌తో మిగతా విద్యార్థులపై ఓ కన్నేసి ఉంచుతున్నారు. ఉపాధ్యాయులు సైతం మైదానంలో, తరగతి గదుల్లో పిల్లల ప్రవర్తనను
• పరిశీలిస్తున్నారు. కొవిడ్‌ నిబంధనలు ఉల్లంఘించేలా ఎక్కడ కనిపించినా.. వెంటనే హెచ్చరిస్తున్నారు.
• ప్రతి తరగతి గది శుభ్రంగా ఉండేలా జాగ్రత్త పడుతున్నారు.
• తరగతి గదిలో చాలా వరకు భౌతికదూరం పాటించేందుకు ప్రయత్నిస్తున్నారు.
• చాలా వరకు గదులు, మైదానంలో శానిటైజ్‌ చేయిస్తున్నారు.హైపో క్లోరైడ్‌తో శుభ్రపరుస్తున్నారు.
• ముఖ్యంగా పాఠశాలల్లోని మరుగుదొడ్లపై ప్రత్యేక శ్రద్ధ పెడుతున్నారు. ఎప్పుడూ శుభ్రంగా ఉండేలా జాగ్రత్తలు తీసుకుంటున్నారు.
• వైరస్‌ వ్యాప్తి కాకుండా అన్ని జాగ్రత్తలు పాటిస్తున్నారు.
• స్కూల్‌ సమయంలో బయటి వస్తువులు కొనుక్కుని తినే విద్యార్థులను ఆఫీస్‌ రూంకు పిలిచి కౌన్సెలింగ్‌ఇస్తున్నారు. అవసరమైతే పిల్లల తల్లిదండ్రులతో మాట్లాడుతున్నారు. బయటి వస్తువులు కొనుక్కునే అవకాశం ఇవ్వొద్దని, పిల్లలకు డబ్బులు ఇవ్వొద్దని సూచిస్తున్నారు. మరోసారి అలాగే జరిగితే తల్లిదండ్రులు మళ్లీ స్కూల్‌కు రావాల్సి ఉంటుందని చెప్తున్నారు.
• మధ్యాహ్న భోజన సమయంలో విద్యార్థులు చేతులు శుభ్రంగా కడుక్కునేలా ఉపాధ్యాయులు దగ్గరుండి పర్యవేక్షిస్తున్నారు.
• మధ్యాహ్న భోజన నిర్వాహకులతోనూ నిత్యం మాట్లాడుతున్నారు. వారు ఏమాత్రం నిర్లక్ష్యం చేయకుండా సూచనలు చేస్తున్నారు. కరోనా నిబంధనలు పాటించేలా జాగ్రత్త పడుతున్నారు.
• మైదానంలో ఎక్కువమంది ఒకేసారి ఆడుకోకుండా, ఒక్కచోట గుమిగూడకుండా చూస్తున్నారు.
• జ్వరం, సర్ది, దగ్గు వంటి కరోనా లక్షణాలు ఉండే విద్యార్థులు పాఠశాలకు రావొద్దని సూచిస్తున్నారు. ఒకవేళ అలా వస్తే వెంటనే వైద్యులను సంప్రదించేలా చర్యలు చేపడుతున్నారు. విషయాన్ని తల్లిదండ్రులకు తెలియజేస్తున్నారు.
• అవసరమైతే కొన్నిచోట్ల విద్యార్థులకు కరోనా నిర్ధారణ పరీక్షలు సైతం చేయిస్తున్నారు.