Bigg Boss 10 | బిగ్ బాస్ హౌస్‌లో ముదిరిన గొడవలు.. సుధీర్, ముకేష్ మధ్య మాటల యుద్ధం, తనను తాను కొట్టుకున్న నీతూ!

Bigg Boss 10 | బిగ్ బాస్ హౌస్‌లో నామినేషన్ల ప్రక్రియ ఎప్పుడూ ఆసక్తికరంగా సాగుతుంది. కంటెస్టెంట్ల మధ్య ఉన్న విభేదాలు, మనసులో దాచుకున్న కోపాలు ఈ సమయంలో బయటపడుతుంటాయి. అయితే ఈ వారం నామినేషన్లు మాత్రం సాధారణ వాగ్వాదాలకే పరిమితం కాలేదు. కంటెస్టెంట్ల మధ్య మాటల యుద్ధం తారస్థాయికి చేరడంతో పాటు, కొందరి ప్రవర్తన హౌస్‌లో తీవ్ర చర్చకు దారితీసింది.

Bigg Boss 10 | బిగ్ బాస్ హౌస్‌లో నామినేషన్ల ప్రక్రియ ఎప్పుడూ ఆసక్తికరంగా సాగుతుంది. కంటెస్టెంట్ల మధ్య ఉన్న విభేదాలు, మనసులో దాచుకున్న కోపాలు ఈ సమయంలో బయటపడుతుంటాయి. అయితే ఈ వారం నామినేషన్లు మాత్రం సాధారణ వాగ్వాదాలకే పరిమితం కాలేదు. కంటెస్టెంట్ల మధ్య మాటల యుద్ధం తారస్థాయికి చేరడంతో పాటు, కొందరి ప్రవర్తన హౌస్‌లో తీవ్ర చర్చకు దారితీసింది. ముఖ్యంగా మొదటి వారాల నుంచి మంచి స్నేహితులుగా కొనసాగిన సుధీర్, ముకేష్ మధ్య విభేదాలు ఒక్కసారిగా ముదిరాయి. మరోవైపు నీతూ తీవ్ర ఆవేశంలో తనను తాను కొట్టుకోవడం అందరినీ ఆశ్చర్యానికి గురిచేసింది. దీంతో ఈ వారం నామినేషన్ల ఎపిసోడ్ ఉత్కంఠభరితంగా మారింది.

బిగ్ బాస్ హౌస్‌లో మొదటి వారం నుంచి సుధీర్, ముకేష్ మంచి స్నేహితులుగా కొనసాగారు. ఇద్దరూ ఒకే గ్రూపులో ఉంటూ పలు సందర్భాల్లో ఒకరికొకరు మద్దతుగా నిలిచారు. అయితే ప్రస్తుతం వీరిద్దరి మధ్య పరిస్థితులు పూర్తిగా మారిపోయాయి. నామినేషన్ల సమయంలో ఇద్దరి మధ్య జరిగిన వాగ్వాదం తీవ్ర స్థాయికి చేరుకుంది. గతంలో సుధీర్‌కు మద్దతుగా ముకేష్ తన పవర్‌ను ఉపయోగించుకున్న విషయాన్ని పదే పదే గుర్తుచేస్తూ అతడిని కార్నర్ చేసే ప్రయత్నం చేశాడు. ఈ క్రమంలో ముకేష్ చేసిన వ్యాఖ్యలు మరింత వివాదాస్పదంగా మారాయి. “నేను లేకపోతే నువ్వు కెప్టెన్‌వి కావడమే కాదు.. కనీసం కంటెండర్‌గా కూడా అర్హుడివి కావు” అంటూ సుధీర్‌ను ఉద్దేశించి మాట్లాడాడు. దీంతో సుధీర్ తీవ్రంగా స్పందించాడు. తన వ్యక్తిత్వాన్ని కించపరిచేలా ముకేష్ మాట్లాడటాన్ని అతడు తప్పుబట్టాడు. ఒకప్పుడు స్నేహితుడిగా ఉన్న వ్యక్తి ఇప్పుడు తన ఎదుగుదలకు తానే కారణమంటూ మాట్లాడటంపై అసహనం వ్యక్తం చేశాడు.

ముకేష్ వ్యాఖ్యలకు సుధీర్ కూడా గట్టిగానే కౌంటర్ ఇచ్చాడు. “ముకేష్ గుండు సున్నా” అంటూ అతడిపై సెటైర్ వేశాడు. మరోవైపు శివ కూడా ఈ వివాదంలో జోక్యం చేసుకుంటూ ముకేష్‌ను ‘మబ్బేష్’ అంటూ ఎద్దేవా చేశాడు. వర్షిణి సైతం వీరిద్దరి వ్యవహారంపై స్పందిస్తూ, ఒకప్పుడు ఎంతో సన్నిహితంగా ఉన్న స్నేహితుల మధ్య ఇప్పుడు పరిస్థితులు పూర్తిగా తలకిందులయ్యాయని అభిప్రాయపడింది. మొత్తానికి సుధీర్, ముకేష్ మధ్య మొదలైన ఈ మాటల యుద్ధం హౌస్‌లో హాట్ టాపిక్‌గా మారింది.

మరోవైపు ఈ వారం నామినేషన్లలో నీతూ ప్రవర్తన కూడా ప్రధాన చర్చనీయాంశంగా నిలిచింది. త్రిగుణ్, వంశీలతో నామినేషన్ పాయింట్ల విషయంలో ఆమెకు తీవ్ర వాగ్వాదం జరిగింది. తన వాదనను సమర్థించుకునే క్రమంలో నీతూ ఒక్కసారిగా ఆవేశానికి లోనయ్యారు. ముఖ్యంగా తన కుటుంబం, వ్యక్తిగత కష్టాల గురించి ప్రస్తావన రావడంతో ఆమె భావోద్వేగానికి గురయ్యారు. ఈ క్రమంలో సహనం కోల్పోయి తన చెంపపై తానే కొట్టుకోవడం అందరినీ షాక్‌కు గురిచేసింది. బిగ్ బాస్ హౌస్‌లో కంటెస్టెంట్లు తమను తాము శారీరకంగా హర్ట్ చేసుకోవడం నిబంధనలకు విరుద్ధం. గతంలో వంశీ కూడా ఇదే తరహాలో తనను తాను కొట్టుకున్నప్పుడు హోస్ట్ నాగార్జున తీవ్రంగా హెచ్చరించిన విషయం తెలిసిందే.

ఇప్పుడు నీతూ కూడా అలాంటి ప్రవర్తనకు పాల్పడటంతో వీకెండ్ ఎపిసోడ్‌పై ఆసక్తి నెలకొంది. ఈ ఘటనను నాగార్జున ఎలా తీసుకుంటారు? నీతూకు ఎలాంటి క్లాస్ తీసుకుంటారు? అనే ప్రశ్నలు ప్రేక్షకుల్లో మొదలయ్యాయి. ఇదిలా ఉంటే నామినేషన్ల ప్రక్రియలో నరేష్, శ్వేత కూడా నీతూను ప్రశ్నిస్తూ తమ వాదనలు వినిపించారు. ఆమె ఆటతీరులోని లోపాలను ఎత్తిచూపుతూ విమర్శలు చేశారు. ముఖ్యంగా స్యాక్ గేమ్ సమయంలో నీతూ వంశీని కొట్టిందనే విషయాన్ని నరేష్ ప్రస్తావించాడు. ఈ పాయింట్ ఆధారంగా నీతూను నిలదీసే ప్రయత్నం చేశాడు. అయితే నరేష్ ఆరోపణలను నీతూ అంగీకరించకుండా తనదైన శైలిలో సమాధానం ఇచ్చే ప్రయత్నం చేసింది. దీంతో వారి మధ్య కూడా వాదన కొనసాగింది.

మొత్తానికి ఈ వారం నామినేషన్ల ప్రక్రియ బిగ్ బాస్ హౌస్‌లో అనేక పరిణామాలకు వేదికగా మారింది. సుధీర్, ముకేష్ మధ్య స్నేహం బీటలు వారడం, శివ సైతం ఈ వివాదంలోకి రావడం, నీతూ ఆవేశంలో తనను తాను కొట్టుకోవడం, నరేష్, శ్వేతలు ఆమె ఆటతీరును ప్రశ్నించడం వంటి ఘటనలు ప్రేక్షకుల్లో ఆసక్తిని పెంచుతున్నాయి.