Ramayana | ‘రామాయణ’ పాటలపై విమర్శలు.. స్పందించిన ఏఆర్ రెహమాన్!

ARRahman | నితేశ్ తివారీ దర్శకత్వంలో తెరకెక్కిన మోస్ట్ అంటెసిపేటెడ్ ప్రాజెక్ట్ 'రామాయణ' (Ramayana). ఇందులో రణ్‌బీర్ కపూర్ శ్రీరాముడిగా, సాయిపల్లవి సీతమ్మగా నటిస్తున్న సంగతి తెలిసిందే.

నితేశ్ తివారీ దర్శకత్వంలో తెరకెక్కిన మోస్ట్ అంటెసిపేటెడ్ ప్రాజెక్ట్ ‘రామాయణ’ (Ramayana). ఇందులో రణ్‌బీర్ కపూర్ శ్రీరాముడిగా, సాయిపల్లవి సీతమ్మగా నటిస్తున్న సంగతి తెలిసిందే. ఈ క్రేజీ ప్రాజెక్ట్‌కు ఆస్కార్ అవార్డు గ్రహీత ఏఆర్ రెహమాన్ సంగీతం అందిస్తున్నారు. అయితే, ఈ చిత్రంలోని పాటలపై వస్తున్న విమర్శల పట్ల తాజాగా రెహమాన్ ఓ ఇంటర్వ్యూలో స్పందించాడు. మొదట్లో ఈ సినిమాలోని పాటలను తప్పుబట్టిన వారే, ఆ తర్వాత తమ అభిప్రాయాన్ని మార్చుకుని క్షమాపణలు చెబుతున్నారని రెహమాన్ పేర్కొన్నారు. ట్రోల్స్ మరియు విమర్శలను తాను పెద్దగా పట్టించుకోనని, కేవలం తన పనిని వంద శాతం నిజాయతీగా చేయడంపైనే పూర్తి దృష్టి పెడతానని ఆయన స్పష్టం చేశారు.

ఈ సందర్భంగా సినిమాకు సంగీతం అందించే క్రమంలో పడే శ్రమను ఆయన పంచుకున్నారు. ట్యూన్స్‌లో పదేపదే మార్పులు చేస్తూ ఎంతో కష్టపడతామని, అన్నీ పూర్తయ్యేసరికి బయట వచ్చే కామెంట్లను పట్టించుకునే శక్తి కూడా ఉండదని చెప్పారు. ఒక పాటను ఎన్నోసార్లు కూలంకషంగా పరిశీలించి, సంతృప్తి చెందిన తర్వాతే తుది రూపం ఇస్తామని తెలిపారు. తన కుమారుడు చెప్పిన మాటను గుర్తుచేసుకుంటూ.. నిన్న విమర్శించిన వాళ్లే.. ఈ రోజు క్షమాపణలు చెబుతారని నా కొడుకు నాతో అంటుంటాడు. నేను మాత్రం నా పనిని నిజాయతీగా చేశాను, ప్రేక్షకులు తప్పకుండా ఆదరిస్తారనే నమ్మకం ఉంది అని రెహమాన్ ధీమా వ్యక్తం చేశారు. ఈ భారీ బడ్జెట్ ‘రామాయణ’ తొలి భాగం నవంబరు 5న ప్రపంచవ్యాప్తంగా గ్రాండ్‌గా విడుదల కానుంది.