చెస్‌ శిక్షకురాలిగా అల్లు అర్హ

చెస్‌ బోర్డు అంటే ఏమిటో పూర్తిగా తెలియని వయసులోనే ఆ చిన్నారి ఏకంగా శిక్షకురాలైంది. కేవలం తను ఆడటం వరకే కాకుండా పది మందికి చెస్‌ క్రీడలో శిక్షణ ఇచ్చే స్థాయికి ఎదిగింది. ఈ ఘనత సాధించిందెవరో కాదు అగ్రహీరో అల్లు అర్జున్‌, స్నేహరెడ్డిల ముద్దుల తనయ అల్లు అర్హ. నాలుగున్నరేండ్లకే చెస్‌లో చిచ్చర పిడుగులా దూసుకుపోతూ….. తన క్రీడా నైపుణ్యాన్ని చాటుకుంటున్నది. శేరిలింగంపల్లి నియోజకవర్గ పరిధిలోని హైటెక్‌ సిటీకి చెందిన ‘రాయ్‌ చెస్‌ అకాడమీ’లో అల్లు అర్హ చదరంగం క్రీడలో శిక్షణ తీసుకుంది. వారం రోజుల్లోనే పూర్వానుభవం లేకున్నా…చదరంగంపై పట్టు సాధించింది. తను క్రీడలో నేర్చుకున్న అంశాలను వివరించడంతో పాటు తన తోటి స్నేహితులకు, ఇంట్లో పని చేసే వారికి అర్హ చదరంగంలో శిక్షణ ఇచ్చింది. గడచిన రెండు నెలలుగా అల్లు అర్హ సుమారు 50 మందికి పైగా చదరంగం క్రీడలో శిక్షణను అందించింది. చిన్నారి ప్రతిభను శిక్షకుల ద్వారా తెలుసుకున్న ప్రఖ్యాత ‘నోబుల్‌ బుక్‌ ఆఫ్‌ వరల్డ్‌ రికార్డ్స్‌’ సంస్థ ప్రతినిధి , ఆర్బిటర్‌ చొక్కలింగం బాలాజీ పర్యవేక్షణలో అర్హ నైపుణ్య పరీక్షను శుక్రవారం చేపట్టారు. క్రీడలో చిన్నారి ప్రతిభతో పాటు శిక్షణను అందించే సామర్థ్యాన్ని గుర్తించి ఆ చిన్నారికి ‘నోబుల్‌ బుక్‌ ఆఫ్‌ వరల్డ్‌ రికార్స్‌’ అవార్డును అందించింది. ఈ అవార్డును శుక్రవారం నిర్మాత అల్లు అరవింద్‌, అల్లు అర్జున్‌ – స్నేహారెడ్డి దంపతులు సహా వారి కుటుంబ సభ్యుల సమక్షంలో ఆర్బిటర్‌ బాలాజీ చిన్నారికి బహుకరించారు.