Saudi Arabia | సౌదీ అరేబియా ఒయాసిస్సులో 4 వేల ఏండ్ల నాటి పట్టణం

సౌదీ అరేబియా వాయవ్య ప్రాంతంలోని ఓ అందమైన ఒయాసిస్సులో 4 వేల ఏండ్లనాటి పురాతన పట్టణాన్ని పురావస్తు శాస్త్రవేత్తలు గుర్తించారు. ఖేబర్‌ ఒయాసిస్సు కింద కనుగొన్న ఈ పట్టణాన్ని అల్‌-నతాహ్‌గా పిలుస్తున్నారు.

Saudi Arabia | న్యూఢిల్లీ: సౌదీ అరేబియా వాయవ్య ప్రాంతంలోని ఓ అందమైన ఒయాసిస్సులో 4 వేల ఏండ్లనాటి పురాతన పట్టణాన్ని పురావస్తు శాస్త్రవేత్తలు గుర్తించారు. ఖేబర్‌ ఒయాసిస్సు కింద కనుగొన్న ఈ పట్టణాన్ని అల్‌-నతాహ్‌గా పిలుస్తున్నారు. అప్పటి ప్రజలు సంచార జీవనం నుంచి నగర జీవన శైలికి ఎలా మారారన్న దానికి ఈ పట్టణం అద్దంపడుతున్నది. ఫ్రెంచ్‌ పురావస్తు శాస్త్రవేత్త గుయిలౌమ్‌ చార్లక్స్‌ నేతృత్వంలోని బృందం ఈ పట్టణాన్ని కనుగొంది.

2.6 హెక్టార్లలో నిర్మించిన ఈ పట్టణంలో 14.5 కిలోమీటర్ల పొడవైన పటిష్టమైన గోడ కూడా ఉంది. ‘పీఎల్‌వోఎస్‌ వన్‌’ జర్నల్‌లో ప్రచురితమైన ఇటీవలి అధ్యయనం ప్రకారం ఈ గోడను నివాస ప్రాంతం చుట్టూ నిర్మించారు. ఈ పట్టణం కాంస్య యుగం ప్రారంభంలో అంటే క్రీస్తు పూర్వం 2400-2000 సంవత్సరం నాటిదిగా గుర్తించారు. అప్పటి నుంచి క్రీస్తు పూర్వం 1500 నుంచి 1300 సంవత్సరాల వరకు ఈ పట్టణం కొనసాగి ఉంటుందని చెప్తున్నారు. ఇక్కడ 500 మంది వరకు నివసించే వారని అంచనా వేస్తున్నారు.