చిన్నారులపై చిరు ప్రభావమే..

• తొమ్మిదేండ్లలోపు పిల్లల్లో 3.61 శాతమే కొవిడ్‌ పాజిటివిటీ రేట్‌
• 10-19 ఏండ్లలోపు వారిలో 10 శాతం
• త్వరగా కోలుకుంటున్న పిల్లలు
• చిన్ననాటి నుంచి వేయిస్తున్న వ్యాక్సిన్లతో మేలు
• థర్డ్‌ వేవ్‌ను ఎదుర్కొనేందుకూ వైద్యారోగ్య శాఖ సన్నద్ధం
• స్కూళ్లు తెరిచే వేళ తల్లిదండ్రులు, ఉపాధ్యాయులకు డాక్టర్ల సూచనలు

సంవత్సర కాలంగా ప్రపంచాన్ని గడగడలాడిస్తున్న కరోనా వైరస్‌ ఇప్పుడు చిన్నారులపై ప్రభావం చూపుతుందని సామాజిక మాధ్యమాల్లో విస్తృతంగా ప్రచారం సాగుతున్నది. 2020 మార్చిలో దేశంలోకి వచ్చిన కరోనా వైరస్‌ నల్లగొండ జిల్లాలో ఏప్రిల్‌ నెలలో దాని ప్రభావం ప్రారంభమైంది. ఇప్పటివరకు 62,793 మంది కరోనా బారినపడ్డారు. అందులో 9 సంవత్సరాల్లోపు చిన్నారులు 2,270 మంది మాత్రమే కాగా అందరూ రికవరీ అయ్యారు. ప్రస్తుతం 174 కేసులు యాక్టివ్‌లో ఉన్నాయి. ఇవి కూడా వారి తల్లిదండ్రుల నుంచి చిన్నారులకు వచ్చినవే . వాస్తవానికి కరోనా వైరస్‌ చిన్నారులపై ఎలాంటి ప్రభావం చూపడం లేదు. వారు త్వరగా కోలుకోవడంతోపాటు చాలా యాక్టివ్‌గా ఉంటున్నారు.

స్కూల్‌లో తీసుకోవాల్సిన జాగ్రత్తలు

• జూలై మొదటి నుంచి పాఠశాలలు ప్రారంభం కానున్న నేపథ్యంలో చిన్నారులతోపాటు స్కూళ్లలో తగిన జాగ్రత్తలు తీసుకోవాలని వైద్యులు సూచిస్తున్నారు.
• వారానికి రెండు లేదా మూడు సార్లు తరగతి గదులు శానిటైజ్‌ చేయాలి.
• తరగతి గదిలో 20 మంది, బెంచీకి ఇద్దరు మాత్రమే ఉండాలి.
• ప్రతి తరగతి గదిలో విద్యార్థులను జడ్‌(z) రూపంలో కూర్చోబెట్టాలి.
• విద్యార్థులు పాఠశాలలకు వచ్చే ముందు గేటు బయట థర్మల్‌ స్కాన్‌తో పరీక్షించాలి.
• ప్రతి విద్యార్థి మాస్కు ధరించేలా, ఎప్పటికప్పుడు చేతులను శానిటైజర్‌ లేదా సబ్బుతో కడుక్కునేలా చూడాలి.
• ప్రభుత్వ స్కూళ్లల్లో మధ్యాహ్న భోజనం బంద్‌ చేస్తే మేలు. ఇంటి వద్ద తెచ్చుకోవడం ఉత్తమం
• తల్లిదండ్రులు … పిల్లలను ఆడుకోవడానికి బయటకు, ఇతరుల ఇండ్లకు పంపకూడదు
• చిన్న పిల్లలు ఉన్న ఇంటిలో తల్లిదండ్రులు వ్యాక్సిన్‌ వేసుకొని ఉండాలి
• పిల్లలను మార్కెట్‌, షాపులకు పంపొద్దు. చిరుతిండ్లకు దూరంగా ఉంచాలి.
• పాలు తాగే పిల్లల పట్ల తల్లిదండ్రులు జాగ్రత్తగా ఉండాలి.గర్భిణులు, బాలింతలు ఉన్న ఇంటిలో ఇతరులు రాకుండా చూసుకోవాలి.ఒక వేళ చిన్నారికి లేదా తల్లికి పాజిటివ్‌ వచ్చినా జాగ్రత్తలు పాటిస్తూ పాలు పట్టవచ్చు.
• విందులు, వినోదాలకు పిల్లలను తీసుకుపోకూడదు .వ్యాక్సినేషన్‌ కేంద్రాలకు సైతం తమతోపాటు పిల్లలను తీసుకుపోకూడదు. పిల్లలు ఉన్న ఇంటిని, పరిసరాలను శుభ్రంగా ఉంచుకోవాలి.

త్వరగా కోలుకుంటున్నారు..
చిన్నారులకు ఇంటిలోని పెద్దల నుంచే కరోనా సోకుతున్నది. జిల్లాలో అధికంగా కొవిడ్‌ విస్తరించిన మార్చి, మే నెలల్లో పిల్లలు కరోనా బారిన పడినా వెంటనే కోలుకున్నారు. జిల్లాలో 9 సంవత్సరాల లోపు చిన్నారుల్లో పాజిటివ్‌ శాతం 3.61 శాతమే. 10 నుంచి 19 సంవత్సరాలలోపు వారు 10శాతం ఉన్నారు. మరణాల విషయంలో 9 ఏండ్లలోపు చిన్నారులు ఒక్కరూ లేరు. 10 నుంచి 19 సంవత్సరాల్లోపు వారిలో ఒక అమ్మాయి చనిపోగా ఆమె కూడా డయాలసిస్‌ బాధితురాలే.

వ్యాక్సిన్లే వారికి శ్రీరామరక్ష
తల్లి గర్భం నుంచి బయటకు వచ్చిన మరుక్షణం నుంచి చిన్నారులకు అందించే టీకాలు వారికి రక్షణగా ఉంటున్నాయి. ప్రధానంగా వారిలో రోగ నిరోధక శక్తి కోసం పలు రకాల టీకాలు వేస్తుంటారు. బీసీజీ, హెపటైటిస్‌-బీ, ఓరల్‌, పోలియో చుక్కలు ఇస్తారు. తర్వాత 45 రోజుల నుంచి కంఠవాపు, కోరింత దగ్గు, ధనుర్వాతం, న్యుమోనియా, హెపటైటిస్‌ బీకి సంబంధించిన పెంటా వ్యాక్సిన్‌ ఇస్తారు. వీటితోపాటు రోటా ఐపీవీ, ఓపీవీ వేస్తారు. ఇలా నెలరోజుల వ్యవధిలో మూడు సార్లు వ్యాక్సిన్‌ వేస్తారు. 10వ నెలలో ఎంఆర్‌ 1, విటమిన్‌ ఏ, ఒకటిన్నర ఏడాదికి ఎంఆర్‌ 2, డీపీటీ, విటమిన్‌ ఏ, బూస్టర్‌ వేస్తారు. ఐదేళ్లు, పదేళ్లకు ఒక డీపీటీ అందిస్తారు. అనంతరం 16 ఏండ్లకు టీడీ వేస్తారు. ఇలా పిల్లలకు వ్యాక్సిన్‌ వేయడం వల్ల వారిలో వ్యాధి నిరోధక శక్తి పెరిగి వైరస్‌ను దీటుగా ఎదుర్కొంటారు.

పిల్లల్లో యాంటీ బాడీలు ఎక్కువ
పెద్దవారితో పోలిస్తే చిన్నారుల్లో యాంటీబాడీలతోపాటు ఇమ్యూనిటీ పవర్‌ ఎక్కువగా ఉంటుంది. దానివల్ల వారిపై కరోనా ప్రభావం తక్కువగా ఉంటుంది. తల్లిదండ్రులు భయపడాల్సిన పనిలేదు. ఏడాదిలోపు పిల్లలకు కరోనా సోకదు. 6-18 ఏండ్ల వారు జాగ్రత్తగా ఉండాలి. చిన్నప్పటి నుంచే గుండెకు రంధ్రంతో బాధపడేవారు డయాబెటిస్‌, ఊపిరితిత్తుల సమస్య ఉన్నవారికే కాస్త ఇబ్బంది.

• డా. రాథోడ్‌ జైసింగ్‌. సూపరింటెండెంట్‌, జనరల్‌ ఆస్ప, నల్లగొండ
  
• మూడో దశపై అప్రమత్తం
  కరోనా మూడో దశ పొంచి ఉందనే నిపుణుల హెచ్చరికలతో జిల్లా వైద్యారోగ్యశాఖ అప్రమత్తమైంది. దీని ప్రభావం చిన్నారులపై అధికంగా ఉంటుందని సూచించడంతో జిల్లా కేంద్రంలోని జనరల్‌ ఆస్పత్రిలో పడకలు, వసతులను జిల్లా యంత్రాంగం సమకూర్చింది. ఎన్‌హెచ్‌ఏ సహకారంతో రూ.15 కోట్లతో ఆక్సిజన్‌ జనరేటెడ్‌ ప్లాంట్‌ను కూడా ఏర్పాటు చేసింది. విద్యుత్‌ ఉంటే ఇది రోజూ 960 లీటర్ల ఆక్సిజన్‌ను ఉత్పత్తి చేస్తుంది. దీని ద్వారా 150 మంది రోగులకు ఆక్సిజన్‌ అందించే వీలు ఉంటుంది. దీనికితోడు 13 కిలో లీటర్ల సామర్థ్యం కలిగిన రెండు ఎల్‌ఓటీలు (లిక్విడ్‌ ఆక్సిజన్‌ ట్యాంక్‌) ఉన్నాయి. విద్యుత్‌ నిలిచినా కూడా పైపుల ద్వారా ఆక్సిజన్‌ అందేలా ఏర్పాటు చేశారు. ఇప్పటికే 124 ఆక్సిజన్‌ బెడ్లు, 87 వెంటిలేటర్లు అందుబాటులో ఉంచారు. అంతేకాకుండా మాతాశిశు సంరక్షణ కేంద్రంలో కూడా మరో 150 పడకలకు ఆక్సిజన్‌ను సరఫరా చేసేలా పనులు చేపట్టారు.

టీకాలు వేయించడంలో అలసత్వమొద్దు
కేంద్ర, రాష్ట్ర ఆరోగ్యశాఖలు సూచించిన విధంగా చిన్న పిల్లలకు సమయానుసారం టీకాలు వేయిండంలో తల్లిదండ్రులు అప్రమత్తంగా ఉండాలి. వ్యాధి నిరోధక శక్తి పెంచి చిన్నారులకు వైరస్‌లు సోకకుండా టీకాలు రక్షిస్తాయి. బాల్యం నుంచి క్రమం తప్పకుండా టీకాలు వేయించడంతోపాటు పౌష్టికాహారం అందించాలి. పిల్లలకు అనారోగ్య సూచనలు కనిపించిన వెంటనే వైద్యులను సంప్రదించడం మంచిది.

• కె. ప్రభాకర్‌రెడ్డి, పిల్లల వైద్యుడు