Visit:
Thrown from train | నడుస్తున్న రైళ్లో నుంచి ఒక ప్రయాణికుడ్ని మరో ప్రయాణికుడు బయటకు తోసేశాడు. ఈ ఘటన పశ్చిమ బెంగాల్‌లోని బీర్‌భూమ్‌లో జరిగింది. వీరి వాగ్వాదాన్ని, రైలు నుంచి తోసేసిన ఘటనల్ని తోటి ప్రయాణికులు వీడియో తీస్తూ ఉన్నారే కానీ, ఒక్కరు కూడా వారిని నిలువరించలేకపోయారు. యువకుడ్ని తోసేసిన వ్యక్తిని ఆ తర్వాత పోలీసులు అరెస్ట్ చేశారు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.
ఈ ఘటన శనివారం రాత్రి బీర్‌భూమ్ జిల్లాలోని తారాపీత్ రోడ్-రాంపూర్‌హట్ రైల్వే స్టేషన్ మధ్య జరిగింది. హౌరా నుంచి మాల్దాకు వెళ్తున్న ఇంటర్‌సిటీ ఎక్స్‌ప్రెస్‌లో ఇద్దరు ప్రయాణికుల మధ్య ఘర్షణ ప్రారంభమైంది. ఆగ్రహానికి లోనైన ఓ వ్యక్తి మరొకరిని రైలు నుంచి తోసేశాడు. తీవ్రంగా గాయపడిన యువకుడిని బీర్‌భూమ్‌లోని రాంపూర్‌హాట్ నివాసి సజల్ షేక్‌గా పోలీసులు గుర్తించారు. రైల్వే ట్రాక్‌పై రక్తం మడుగులో పడివున్న సజల్‌ను స్థానికులు గుర్తించి పోలీసులకు సమాచారం ఇచ్చారు. ఘటనాస్థలానికి చేరుకున్న పోలీసులు అతడ్ని రాంపూర్‌హట్ ప్రభుత్వ వైద్య కళాశాల దవాఖానలో చేర్చి చికిత్స అందిస్తున్నారు. అతడి పరిస్థితి విషమంగా ఉన్నట్లు తెలుస్తున్నది.
మొదట ఏదో విషయమై వీరిద్దరూ గొడవ పడినట్లు వీడియోలో కనిపిస్తున్నది. ఆ తర్వాత ఇద్దరూ లేచి డోర్ వద్దకు వెళ్లారు. కాసేపటికి మరోసారి కొట్లాటకు దారితీసింది. దాంతో పట్టరాని కోపంతో ఉన్న పెద్దాయన.. యువకుడిని కదులుతున్న రైలు నుంచి బయటకు నెట్టివేశాడు. వీరి ఘర్షణను ఇతర ప్రయాణికులు వీడియో తీస్తూ ఎంజాయ్‌ చేస్తూనే ఉన్నారు. కానీ వారిని నిలువరించడానికి ఎవరూ ప్రయత్నించకపోవడం శోచనీయం.
