Visit:
బెంగ‌ళూరు: ఓ ఇంట్లో క్రిస్‌మ‌స్ వేడుక‌లు జ‌రుపుకుంటున్న ద‌ళితుల‌పై బ‌జ‌రంగ్‌ద‌ళ్‌ కార్య‌క‌ర్త‌లు దౌర్జ‌న్యానికి పాల్ప‌డ్డారు. హిందువులై ఉండి క్రిస్‌మ‌స్ ఎందుకు జ‌రుపుకుంటున్నారంటూ ద‌బాయించారు. దాంతో ఆ ఇంట్లోని మ‌హిళ‌లు వారికి ఎదురుతిరిగారు. ఈ ఘ‌ట‌న‌కు సంబంధించిన వీడియో ఇప్పుడు సోష‌ల్ మీడియాలో వైర‌ల్‌గా మారింది. క‌ర్ణాట‌క రాష్ట్రం తుమ‌కూరు జిల్లా బిలిదేవాల‌య గ్రామంలో గ‌త మంగ‌ళ‌వారం జ‌రిగిన ఈ ఘ‌ట‌న ఆల‌స్యంగా వెలుగులోకి వ‌చ్చింది.
వివ‌రాల్లోకి వెళ్తే.. బిలియ‌దేవాల‌య గ్రామంలోని రామ‌చంద్ర అనే ద‌ళితుడి ఇంట్లో కొంత‌మంది క‌లిసి క్రిస్‌మ‌స్ వేడుక‌లు జ‌రుపుకుంటున్నారు. గ్రామ పంచాయ‌తి వార్డుమెంబ‌ర్ ద్వారా ఈ విష‌యం తెలుసుకున్న బ‌జ‌రంగ్‌ద‌ళ్‌ కార్య‌క‌ర్త‌లు ఆ ఇంట్లో చొర‌బ‌డ్డారు. దాంతో ప్రార్థ‌న చేస్తున్న ద‌ళిత మ‌హిళ‌లు భ‌య‌ప‌డి మ‌గ‌వాళ్ల‌కు వెన‌క్కిపంపి వారికి ర‌క్ష‌ణ‌గా నిలిచారు. హిందువులై ఉండి క్రిస్‌మ‌స్ ఎందుకు జ‌రుపుకుంటున్నారంటూ ప్రశ్నించిన బజరంగ్ కార్య‌క‌ర్త‌ల‌కు.. మేం హిందువుల‌మే అయినా ప్ర‌భువును కూడా న‌మ్ముతాం అని స‌మాధాన‌మిచ్చారు.
ఈ సంద‌ర్భంగా బజరంగ్ కార్య‌క‌ర్త‌ల‌కు ద‌ళిత మ‌హిళ‌ల‌కు తీవ్ర వాగ్వాదం జ‌రిగింది. బజరంగ్ కార్య‌క‌ర్త‌లు ఎంత ద‌బాయించి దౌర్జ‌న్యానికి పాల్ప‌డే ప్ర‌య‌త్నం చేసినా మ‌హిళ‌లు బెద‌ర‌లేదు. బొట్టు పెట్టుకోవ‌డం పెట్టుకోక‌పోవడం, పుస్తె ధ‌రించ‌డం ధ‌రించ‌క‌పోవ‌డం మా ఇష్ట‌మ‌ని, మేం ఏసు ప్ర‌భువును న‌మ్ముకుంటున్నామ‌ని తెగేసి చెప్పారు. మ‌తం మారిన‌ట్లు రుజువులు చూపించ‌మ‌ని అడుగ‌గా.. దైవాన్ని న‌మ్మ‌డానికి రుజువులు అక్క‌ర్లేద‌న్నారు. ఈ ఘ‌ట‌న‌కు సంబంధించిన వీడియోను మీరు కూడా ఒక‌సారి వీక్షించండి.
