Weapons seized | 20 ఎయిర్‌గన్‌లు, 200 బుల్లెట్‌లు.. ఓ వృద్ధుడి ఇంట్లో భారీగా మారణాయుధాలు

Weapons seized | ఓ వృద్ధుడి (Old man) ఇంట్లో భారీగా ఆయుధాలు (Weapons), మందుగుండు సామగ్రి బయటపడటం స్థానికంగా తీవ్ర కలకలం రేపింది. అది ఇల్లేనా లేదంటే ఆయుధాల గోడౌనా..? అని ఆశ్చర్యపోయేలా అక్కడ పెద్దమొత్తంలో మారణాయుధాలు దొరికాయి.

Weapons seized : ఓ వృద్ధుడి (Old man) ఇంట్లో భారీగా ఆయుధాలు (Weapons), మందుగుండు సామగ్రి బయటపడటం స్థానికంగా తీవ్ర కలకలం రేపింది. అది ఇల్లేనా లేదంటే ఆయుధాల గోడౌనా..? అని ఆశ్చర్యపోయేలా అక్కడ పెద్దమొత్తంలో మారణాయుధాలు దొరికాయి. ఆ ఇంట్లో ఆయుధాలు ఉన్నాయన్న పక్కా సమాచారంతో రంగంలోకి దిగిన పోలీసులు.. నిందితుడిని అదుపులోకి తీసుకుని, ఆయుధాలను సీజ్‌ చేశారు. ఘటనపై కేసు నమోదుచేసి దర్యాప్తు చేపట్టారు.

వివరాల్లోకి వెళ్తే.. కేరళ రాష్ట్రం మలప్పురం జిల్లాకు చెందిన ఉన్నికమద్‌ అనే 60 ఏళ్ల వ్యక్తి ఇంట్లో అక్రమంగా ఆయుధాలు నిల్వ ఉంచినట్లు పోలీసులకు రహస్యంగా సమాచారం అందింది. దాంతో పోలీసులు వెంటనే అతడి ఇంటిపై దాడి చేసి సోదాలు నిర్వహించారు. ఆ సోదాల్లో పోలీసులే నివ్వెరపోయేలా పెద్ద సంఖ్యలో ఆయుధాలు బయటపడ్డాయి. వాటిలో ఎయిర్‌గన్‌లు, రైఫిల్స్‌, బుల్లెట్‌లు, పెల్లెట్‌లు ఉన్నాయి.

అధికారులు వృద్ధుడి ఇంటి నుంచి 20 ఎయిర్ గన్‌లు, 3 రైఫిల్స్‌తోపాటు 200 బుల్లెట్లు, 40 పెల్లెట్ బాక్సులను స్వాధీనం చేసుకున్నారు. ఉన్నికమద్‌ను అరెస్టు చేసి పోలీస్ స్టేషన్‌కు తరలించారు. ఇంత భారీ మొత్తంలో ఆయుధాలను ఎక్కడి నుంచి సేకరించారు? వాటిని విక్రయించేందుకు నిల్వఉంచారా? లేక వ్యక్తిగత అవసరాల కోసం దాచారా? అనే కోణాల్లో పోలీసులు లోతుగా దర్యాప్తు చేస్తున్నారు.