MAL Blood Group | కొత్త బ్లడ్‌ గ్రూప్‌ ‘మాల్‌’..50 ఏండ్ల మిస్టరీని ఛేదించిన శాస్త్రవేత్తలు

MAL Blood Group | ఇంగ్లండ్‌ శాస్త్రవేత్తల బృందం కొత్త బ్లడ్‌ గ్రూప్‌ను కనిపెట్టింది. దీనిని ‘మాల్‌'గా వ్యవహరిస్తున్నది. 1972లో గుర్తించిన ఏఎన్‌డబ్ల్యూ యాంటిజెన్‌ ప్రొటీన్‌కు కారణం ఈ బ్లడ్‌ గ్రూపేనని ఇంగ్లండ్‌లోని ఎన్‌హెచ్‌ఎస్‌, యూనివర్సిటీ ఆఫ్‌ బ్రిస్టల్‌ శాస్త్రవేత్తలు తెలిపారు.

• క్లిష్టమైన చికిత్సల నిర్వహణ ఇకపై సులభం

(స్పెషల్‌ టాస్క్‌ బ్యూరో) హైదరాబాద్‌ (నమస్తే తెలంగాణ): ఇంగ్లండ్‌ శాస్త్రవేత్తల బృందం కొత్త బ్లడ్‌ గ్రూప్‌ను కనిపెట్టింది. దీనిని ‘మాల్‌’గా వ్యవహరిస్తున్నది. 1972లో గుర్తించిన ఏఎన్‌డబ్ల్యూ యాంటిజెన్‌ ప్రొటీన్‌కు కారణం ఈ బ్లడ్‌ గ్రూపేనని ఇంగ్లండ్‌లోని ఎన్‌హెచ్‌ఎస్‌, యూనివర్సిటీ ఆఫ్‌ బ్రిస్టల్‌ శాస్త్రవేత్తలు తెలిపారు. తాజా పరిశోధనతో 50 ఏండ్ల మిస్టరీని ఛేదించామన్న పరిశోధకులు.. క్లిష్టమైన చికిత్సలు, రక్త మార్పిడిలో ఏర్పడే సమస్యలకు ఈ కొత్త బ్లడ్‌ గ్రూప్‌ సులభంగా పరిష్కారం చూపుతుందని ఆశాభావం వ్యక్తం చేశారు.

ఏమిటీ ఏఎన్‌డబ్ల్యూ యాంటిజెన్‌?

ఏ, బీ, ఏబీ, వో, ఆర్‌హెచ్‌.. ఇలా ప్రపంచంలో ఇప్పటివరకూ 47 రకాల బ్లడ్‌ గ్రూప్‌లను శాస్త్రవేత్తలు గుర్తించారు. ప్రతీ బ్లడ్‌ గ్రూప్‌లో ఏదో ఒక యాంటిజెన్‌ ఉంటుంది. ఈ ప్రొటీన్‌ను బట్టే వ్యక్తి రక్తం ఏ రకానిదన్న విషయం తెలుస్తుంది. అయితే, 1972లో తొలిసారిగా ఏఎన్‌డబ్ల్యూ యాంటిజెన్‌ అనే కొత్త ప్రొటీన్‌ను శాస్త్రవేత్తలు గుర్తించారు. అయితే, అప్పటికే ఉన్న బ్లడ్‌ గ్రూప్‌లలో ఏ గ్రూప్‌నకూ ఈ ప్రొటీన్‌ సరిపోలలేదు. దీంతో ఈ యాంటిజెన్‌ ఉన్న వేలాది మందికి అత్యవసరమైన చికిత్స చేయడం సాధ్యపడలేదు. రక్తమార్పిడి చేసే సమయంలో సమస్యలు ఎదురయ్యేవి. అయితే, తాజా పరిశోధనలో ఏఎన్‌డబ్ల్యూ యాంటిజెన్‌ ప్రొటీన్‌ ‘మాల్‌’ అనే కొత్త బ్లడ్‌ గ్రూప్‌నకు చెందినదని శాస్త్రవేత్తలు గుర్తించారు.