Visit:
Colour Clouds : ఆకాశం (Sky) లో ఒక అద్భుతమైన, అరుదైన దృశ్యం కనువిందు చేసింది. లఢఖ్ (Ladakh) గగనతలంపై మేఘాలు గులాబీ (Blue), ఆకుపచ్చ (Green), నీలం లాంటి ఇంద్రధనస్సు వర్ణాలతో ప్రకాశవంతంగా మెరిశాయి. ఈ అసాధారణ దృగ్విషయాన్ని చూసి స్థానికులు, పర్యాటకులు (Tourists) ఆశ్చర్యచకితులయ్యారు. ఆ ప్రాంతంలో పర్యటిస్తున్న యోగా శిక్షకురాలు (Yoga Trainer) ప్రేరణా దలాల్ (Prerana Dalal) ఈ దృశ్యాన్ని తన కెమెరాలో బంధించి, ఇన్స్టాగ్రామ్ (Instagram) లో పంచుకున్నారు.
ఎత్తయిన పర్వతాల నేపథ్యంలో గులాబీ, ఆకుపచ్చ, నీలం, ఊదా రంగుల్లో మెరుస్తున్న మేఘాల ఫొటోలు, వీడియోలు అందరినీ ఆకట్టుకుంటున్నాయి. “లడఖ్ హిమానీనదాలపై డ్రోన్ షాట్ తీస్తుండగా ఇది నా కంటపడింది. ఆకాశంలో మేఘాలు ఇంద్రధనుస్సు రంగులను సంతరించుకున్నాయి. నేను చూస్తున్నది నిజమో.. కాదో..! అని మొదట నాకే అర్థం కాలేదు” అని ఆమె తన పోస్ట్లో పేర్కొన్నారు. ఈ అద్భుత దృశ్యం దాదాపు రెండు గంటలకుపైగా కొనసాగిందని, వివిధ పర్వత ప్రాంతాల నుంచి కూడా ఇది స్పష్టంగా కనిపించిందని ఆమె తెలిపారు.
శాస్త్రీయ పరిభాషలో ఈ దృగ్విషయాన్ని “క్లౌడ్ ఇరిడెసెన్స్” లేదా “రెయిన్బో క్లౌడ్స్” అని పిలుస్తారు. మేఘాల్లోని చిన్న నీటి బిందువులు లేదా మంచు స్ఫటికాల ద్వారా సూర్యరశ్మి వక్రీభవనం చెందినప్పుడు కాంతి వేర్వేరు రంగులుగా విడిపోయి ఇలా కనిపిస్తుంది. ఇది సాధారణ ఇంద్రధనస్సులా కాకుండా, మేఘాల అంతర్భాగంలోనే ఏర్పడుతుంది. లడఖ్ సముద్ర మట్టానికి అత్యంత ఎత్తులో ఉండటం, అక్కడి గాలిలో స్వచ్ఛత ఎక్కువగా ఉండటంవల్ల ఇలాంటి దృశ్యాలు ఆవిష్కృతమవడానికి అనుకూల పరిస్థితులు ఉంటాయి.
సామాజిక మాధ్యమాల్లో ఈ ఫొటోలు చూసిన కొందరు వీటిని ఆర్టిఫిషియల్ ఇంటెలిజెన్స్ (ఏఐ) సృష్టించిందేమోనని సందేహం వ్యక్తం చేశారు. అయితే, ఫ్యాక్ట్ చెకర్లు ఈ చిత్రాలను పరిశీలించి అవి వాస్తవమైనవేనని ధృవీకరించారు. జన్స్కార్ సమీపంలో కూడా ఇలాంటి వర్ణరంజిత మేఘాలను వీక్షించామని పలువురు నెటిజన్లు వ్యాఖ్యానించారు. ప్రస్తుతం ఈ అద్భుత దృశ్యాలకు సంబంధించిన ఫొటోలు, వీడియోలు నెట్టింట వైరల్గా మారాయి.
