విపక్ష రాష్ర్టాలపై సవతి తల్లి ప్రేమ

కేంద్ర బడ్జెట్‌లో బీజేపీ నేతృత్వంలోని ఎన్డీయే ప్రభుత్వం విపక్ష పాలిత రాష్ర్టాలపై సవతి తల్లి ప్రేమ ప్రదర్శించిందని ప్రతిపక్ష పార్టీలు ఆగ్రహం వ్యక్తం చేశాయి.

• బడ్జెట్‌లో వివక్షపై ప్రతిపక్ష పార్టీల ధ్వజం

న్యూఢిల్లీ: కేంద్ర బడ్జెట్‌లో బీజేపీ నేతృత్వంలోని ఎన్డీయే ప్రభుత్వం విపక్ష పాలిత రాష్ర్టాలపై సవతి తల్లి ప్రేమ ప్రదర్శించిందని ప్రతిపక్ష పార్టీలు ఆగ్రహం వ్యక్తం చేశాయి. బీజేపీ మిత్రపక్ష పార్టీలు అధికారంలో ఉన్న బీహార్‌, ఆంధ్రప్రదేశ్‌లకు బడ్జెట్‌లో కేటాయించిన ప్యాకేజీలను చూస్తుంటే ఇది బలవంతపు బడ్జెట్‌గా కనిపిస్తున్నదని, గతంలో ఏ ప్రభుత్వమూ ఇలా చేయలేదని పేర్కొన్నాయి. కేంద్ర బడ్జెట్‌పై శుక్రవారం లోక్‌సభలో చర్చ కొనసాగింది. ఆప్‌ ఎంపీ గుర్మీత్‌ సింగ్‌ మాట్లాడుతూ ‘హమ్‌ దో హమారే దో’ అనే నినాదాన్ని ప్రస్తావించారు. గత రెండు పర్యాయాలు ప్రభుత్వాన్ని నడిపిన ఇద్దరిని(మోదీ, అమిత్‌షాలను ఉద్దేశించి) ప్రస్తుతం ఇద్దరు(నితీశ్‌ కుమార్‌, చంద్రబాబు) నిర్దేశిస్తున్నారని అన్నారు.

ఎంఎస్పీ అంశంపై దద్దరిల్లిన రాజ్యసభ

అటు రాజ్యసభలో ఎంఎస్పీకి చట్టబద్ధత అంశంపై విపక్ష పార్టీల సభ్యుల ఆందోళనతో సభ దద్దరిల్లింది. కనీస మద్దతు ధరకు చట్టబద్ధత కల్పించడానికి సంబంధించిన ప్రశ్నపై కేంద్ర వ్యవసాయ శాఖ మంత్రి శివరాజ్‌ సింగ్‌ చౌహాన్‌ సమాధానంపై కాంగ్రెస్‌, ఇతర విపక్ష పార్టీలు అసంతృప్తి వ్యక్తం చేశాయి. రైతుల సంక్షేమం కోసం తమ ప్రభుత్వం చాలా చేసిందని, ఎంఎస్పీ వ్యవస్థను బలోపేతం చేయడంపై కమిటీ పరిశీలన చేస్తున్నదని పేర్కొన్న మంత్రి.. పంటలకు కనీస మద్దతు ధరకు చట్టబద్ధతపై పెద్దగా మాట్లాడలేదు. దీనిపై చౌహాన్‌ సమాధానం అసంపూర్తిగా ఉన్నదని విపక్ష పార్టీలు ఆందోళనకు దిగాయి. కాగా, కార్గిల్‌ విజయ్‌ దివస్‌ సందర్భంగా ఆనాడు యుద్ధంలో ప్రాణాలు అర్పించిన జవాన్లకు పార్లమెంట్‌ ఉభయ సభలు నివాళులర్పించాయి.