ఆర్‌ఎంపీల పేరుకు ముందు ‘మెడికల్‌ డాక్టర్‌’

మోడర్న్‌ మెడిసన్‌ను ప్రాక్టీస్‌ చేస్తూ నేషనల్‌ మెడికల్‌ కమిషన్‌ (ఎన్‌ఎంసీ) చట్టం, 2019లో రిజిష్టర్‌ అయిన ప్రాక్టీషనర్లు (ఆర్‌ఎంపీలు) తమ పేర్లకు ముందు మెడికల్‌ డాక్టర్‌ (మెడ్‌ డీఆర్‌.) అనే ప్రిఫిక్స్‌ చేర్చుకోవచ్చని ఎన్‌ఎంసీ కీలక ప్రతిపాదన చేసింది. దుర్భాషలాడుతూ, దాడులకు పాల్పడే రోగులకు డాక్టర్లు వైద్యం నిరాకరించవచ్చని తెలిపింది.

• రోగులకు ఇచ్చే ప్రిస్క్రిప్షన్‌పై ఆర్‌ఎంపీ రిజిస్ట్రేషన్‌ ఐడీ తప్పనిసరి
• రోగి, బంధువులు దాడి చేస్తే డాక్టర్లు వైద్యాన్ని నిరాకరించవచ్చు
• నేషనల్‌ మెడికల్‌ కమిషన్‌ ప్రతిపాదనలు

న్యూఢిల్లీ, జూన్‌ 8: మోడర్న్‌ మెడిసన్‌ను ప్రాక్టీస్‌ చేస్తూ నేషనల్‌ మెడికల్‌ కమిషన్‌ (ఎన్‌ఎంసీ) చట్టం, 2019లో రిజిష్టర్‌ అయిన ప్రాక్టీషనర్లు (ఆర్‌ఎంపీలు) తమ పేర్లకు ముందు మెడికల్‌ డాక్టర్‌ (మెడ్‌ డీఆర్‌.) అనే ప్రిఫిక్స్‌ చేర్చుకోవచ్చని ఎన్‌ఎంసీ కీలక ప్రతిపాదన చేసింది. దుర్భాషలాడుతూ, దాడులకు పాల్పడే రోగులకు డాక్టర్లు వైద్యం నిరాకరించవచ్చని తెలిపింది. ఈ మేరకు ఎన్‌ఎంసీ రిజిస్టర్డ్‌ మెడికల్‌ ప్రాక్టీషనర్‌ (ప్రొఫెషనల్‌ కండక్డ్‌) రెగ్యులేషన్స్‌, 2022 పేరిట డ్రాఫ్ట్‌ విడుదల చేసింది. దీనిపై ఈ నెల 22లోపు సలహాలు, సూచనలు ఇవ్వాలని విజ్ఞప్తి చేసింది.

ఎన్‌ఎంసీ కీలక ప్రతిపాదనలు

• నిర్ణీత రుసుము చెల్లించని రోగులకు వైద్యాన్ని ఆర్‌ఎంపీ నిరాకరించవచ్చు. ప్రభుత్వ దవాఖానల్లో, ఎమర్జెన్సీ స్థితిలో ఈ రూల్‌ వర్తించదు.
• రోగికి సంబంధించిన ట్రీట్మెంట్‌ రికార్డును ఆర్‌ఎంపీ.. ఐదు రోజుల్లోగా (గతంలో ఇది 3 రోజులు) సిద్ధం చేయాలి. ఎమర్జెన్సీ కేసుల్లో అదే రోజు రికార్డులను సిద్ధం చేయాలి.
• రోగులకు ఇచ్చే ప్రిస్క్రిప్షన్‌, మనీ రసీదులపై సొంతగా క్లినిక్‌ నడిపే ఆర్‌ఎంపీ.. ఈఎంఆర్బీ జారీచేసిన రిజిస్ట్రేషన్‌ ఐడీని తప్పనిసరిగా ముద్రించాలి. ఏదైనా దవాఖానలో ఆర్‌ఎంపీ పనిచేస్తే.. రిజిస్ట్రేషన్‌ ఐడీ ఉన్న దవాఖాన సీల్‌ను ముద్రించాలి.
• గత ఐదేండ్లలో ఫార్మా కంపెనీలు, వైద్య రంగం నుంచి పొందిన ఆదాయాన్ని ఆర్‌ఎంపీలు అఫిడవిట్‌గా సమర్పించాలి.
• ఒకటి కంటే ఎక్కువ వైద్య విభాగాల్లో ప్రాక్టీస్‌ చేసిన ఆర్‌ఎంపీ.. ఏకకాలంలో ఒకటి కంటే ఎక్కువ విభాగాల్లో కొనసాగకూడదు.
• ఎమర్జెన్సీని ప్రాణం, అవయవాలను కాపాడే ప్రక్రియ అంటూ తొలిసారిగా నిర్వచించిన ఎన్‌ఎంసీ.. ఈ పరిస్థితుల్లో ఆర్‌ఎంపీ రోగికి ఫస్ట్‌ఎయిడ్‌, ఇతర చికిత్సను అందించవచ్చు అని వెల్లడించింది.