పత్రికలదే విశ్వసనీయత

• నిక్కచ్చి సమాచారం ఇవ్వడంలో సాటిలేని ప్రింట్‌ మీడియా
• పాఠకులు, బ్రాండ్లు, ప్రకటనకర్తల నమ్మకంలో మేటి
• ‘హవాస్‌ మీడియా గ్రూప్‌’ తాజా అధ్యయనంలో వెల్లడి

న్యూఢిల్లీ, సెప్టెంబర్‌ 11: పుట్టగొడుగుల్లా వెలిసిన డిజిటల్‌ సైట్లు ఒకవైపు, సోషల్‌మీడియా విప్లవం మరోవైపు, కరోనా సంక్షోభం ఇంకోవైపు.. వెరసి సంప్రదాయ ప్రింట్‌ మీడియా ఎన్నో ఆటుపోట్లను ఎదుర్కొంటున్నది. అయితే పాఠకులు, ప్రకటనకర్తల నమ్మకాన్ని చూరగొనడంలో మాత్రం ప్రింట్‌ మీడియా అంతకంతకూ బలోపేతమవుతున్నదని ప్రముఖ మీడియా సంస్థ ‘హవాస్‌ మీడియా గ్రూప్‌ ఇండియా’ ఇటీవల చేసిన అధ్యయనంలో తేలింది. కరోనా సంక్షోభంతో గతేడాది వార్తా పత్రికల సర్క్యులేషన్‌, రీడర్‌షిప్‌ తగ్గినప్పటికీ, వినూత్న వార్తాంశాలను చేరవేయడంలో పత్రికలే ముందుంటాయని ఇప్పటికీ పాఠకులు బలంగా విశ్వసిస్తున్నట్టు వెల్లడించింది. తమ ఉత్పత్తులు వినియోగదారులను చేరుకోవడానికి పత్రికలే సరైన వేదికలని పలు బ్రాండ్లు, మార్కెటింగ్‌ కంపెనీలు నమ్ముతున్నట్టు వివరించింది. దేశంలోని 14 నగరాల్లోని 2 లక్షల మంది పత్రికా చందాదారులపై ఈ సర్వే చేపట్టారు.

డిజిటల్‌ దిగ్గజాలకూ పత్రికలే దిక్కు..
ఎన్నో మాధ్యమాల ద్వారా రీడర్లకు వార్తలు చేరుతున్నప్పటికీ, విశ్వసనీయతకు మాత్రం ప్రింట్‌ మీడియానే చిరునామాగా మారింది. అందుకే, గూగుల్‌, ఫేస్‌బుక్‌ వంటి డిజిటల్‌ మీడియా దిగ్గజాలు సైతం తమ ప్రచారాన్ని ప్రింట్‌ మీడియాలోనే చేస్తున్నాయి. కరోనా కారణంగా వార్తా పత్రికల వృద్ధిరేటు కొంత తగ్గినప్పటికీ, త్వరలోనే ఆ మాధ్యమాలు మళ్లీ పుంజుకుంటాయి.
-సంచితా రాయ్‌, ఇండియా హెడ్‌ స్ట్రాటజీ,
హవాస్‌ మీడియా గ్రూప్‌ ఇండియా.

పాఠకులు పత్రికలను ఎందుకోసం చదువుతున్నారంటే?

• జనరల్‌ నాలెడ్జ్‌
• కరెంట్‌ అఫైర్స్‌
• భాషాపరమైన నైపుణ్యాలు

జనరల్‌ వార్తలు కాకుండా పాఠకులు ఇంకేం కోరుకుంటున్నారు?

• సైన్స్‌ అండ్‌ టెక్నాలజీ
• అంతర్జాతీయ సమాచారం
• ఆరోగ్య సంబంధిత వార్తలు

ఏ క్యాటగిరీ వార్తల కోసం పత్రికలను ప్రముఖంగా ఎంచుకుంటున్నారు?

• వాహనరంగం
• స్మార్ట్‌ఫోన్లు
• విద్య, ఆర్థికం

• పత్రికల్లో వచ్చే ప్రకటనలను విశ్వసిస్తున్న పాఠకుల సంఖ్య 90%
• నాలెడ్జ్‌ పొందాలంటే పత్రికలే సరైన మాధ్యమాలని నమ్ముతున్న దక్షిణాదివారు 60%
• స్థానిక వార్తల పఠనంపై ఎక్కువగా మక్కువ చూపిస్తున్న పశ్చిమ రాష్ర్టాలవారు 33%