Visit:
Basement House | న్యూఢిల్లీ: తన ఇంటిని శుభ్రం చేస్తున్న యజమాని ఓ షాకింగ్‌ నిజాన్ని కనుగొన్నాడు. తూర్పు చైనాలోని జియాంగ్సు ప్రావిన్సులో నివసిస్తున్న ఓ వ్యక్తికి తన ఇంటి బేస్‌మెంట్‌లోనే ఆ ఇంటి పాత యజమాని గత ఏడేండ్లుగా రహస్యంగా నివసిస్తున్నాడన్న వాస్తవం బయటపడింది. మెట్ల వెనుక అమర్చిన రహస్య తలుపు నుంచి బేస్‌మెంట్‌ లోపలకు వెళితే అక్కడ అన్ని సౌకర్యాలతో కూడిన ఇంటి వాతావరణం కనపడుతోందని సౌత్‌ చైనా మార్నింగ్‌ పోస్టు పత్రిక వెల్లడించింది. ఆ గదిలో విద్యుత్‌ దీపాలు ఉన్నాయని, బయట నుంచి గాలి వెలుతురు వచ్చే విధంగా వెంటిలేషన్‌ ఉందని, అంతేగాక ఓ చిన్న బార్‌ సెటప్‌ కూడా ఉందని పత్రిక తెలిపింది.
ఈ గదిలోకి ఇటీవలే వచ్చి వెళ్లిన ఆనవాళ్లు కూడా అతనికి కనిపించాయి. వెంటనే పాత ఇంటి యజమానికి ప్రస్తుత యజమాని లీ ఫోన్‌ చేశాడు. ఇంటిని విక్రయించినపుడు తనకు బేస్‌మెంట్‌లో ఉన్న రహస్య గది గురించి ఎందుకు చెప్పలేదని లీ పాత యజమాని ఝాంగ్‌ అనే మహిళను నిలదీశాడు. అయితే ఆ మహిళ ఇచ్చిన సమాధానంతో లీ కంగుతిన్నాడు. తాను ఇంటిని మాత్రమే అమ్మానని, బేస్‌మెంట్‌ను కాదని, ఆ గది గురించి సేల్‌ అగ్రిమెంట్‌లో లేదని ఆమె అతనికి గుర్తు చేసింది. ఖాళీ సమయంలో తాను ఆ గదిలో రిలాక్స్‌ అవుతుంటానని కూడా ఆమె షాకింగ్‌ సమాచారం అందచేసింది. అయితే తన కంటపడకుండా ఏడేళ్లుగా ఆ మహిళ ఎలా బేస్‌మెంట్‌లోకి వెళ్లి వస్తోందో లీకి ఇప్పటికీ అంతుపట్టడం లేదు. కాగా, ఆస్కార్‌ అవార్డును గెలుచుకున్న చిత్రం పారాసైట్‌ కథ కూడా ఇదే తరహాలో ఉండడం విశేషం.
