Judge Awarded 23 Death Sentences | 6 నెలల్లో 23 మరణశిక్షలు విధించిన న్యాయమూర్తి.. కుటుంబ కోర్టుకు బదిలీ

Judge Awarded 23 Death Sentences | ఒక న్యాయమూర్తి ఆరు నెలల్లో 23 మంది నిందితులకు మరణశిక్షలు విధించారు. హత్యలకు సంబంధించిన 11 కేసుల్లో ఈ మేరకు తీర్పులు ఇచ్చారు. ఈ నేపథ్యంలో ఆ జడ్జిని ఫ్యామిలీ కోర్టుకు బదిలీ చేశారు.

లక్నో: ఒక న్యాయమూర్తి ఆరు నెలల్లో 23 మంది నిందితులకు మరణశిక్షలు విధించారు. హత్యలకు సంబంధించిన 11 కేసుల్లో ఈ మేరకు తీర్పులు ఇచ్చారు. ఈ నేపథ్యంలో ఆ జడ్జిని ఫ్యామిలీ కోర్టుకు బదిలీ చేశారు. (Judge Awarded 23 Death Sentences) ఫాస్ట్ ట్రాక్ కోర్టులో విధులు నిర్వర్తిస్తున్న అదనపు జిల్లా, సెషన్స్ న్యాయమూర్తి రవి కుమార్ దివాకర్, ఈ ఏడాది ఏప్రిల్ నుంచి సెప్టెంబర్ మధ్య 11 కేసుల్లో 23 మందికి మరణశిక్షలు విధించారు. దీనిపై విమర్శలు వచ్చాయి. ఈ నేపథ్యంలో అలహాబాద్ హైకోర్టు ఆదేశాల మేరకు ముజఫర్‌నగర్‌లోని కుటుంబ న్యాయస్థానానికి జడ్జి రవి కుమార్ దివాకర్‌ను బదిలీ చేశారు. ఫ్యామిలీ కోర్టుకు అదనపు ప్రధాన న్యాయమూర్తిగా ఆయనను నియమించారు. హైకోర్టు ఉత్తర్వుల ప్రకారం, ఫాస్ట్ ట్రాక్ కోర్టుకు అదనపు జిల్లా, సెషన్స్ జడ్జిగా శివ కుమారి బాధ్యతలు స్వీకరించనున్నారు.

కాగా, ఆగస్ట్‌లో అప్పటి జిల్లా, సెషన్స్ జడ్జి బి.కె. సింగ్ జారీ చేసిన పరిపాలనా ఉత్తర్వుల ద్వారా హత్య, ఇతర తీవ్రమైన నేరాలకు సంబంధించి పాక్షికంగా విచారణలో ఉన్న 97 కేసులను తన కోర్టు నుంచి ఉపసంహరించుకోవడాన్ని న్యాయమూర్తి రవి కుమార్ దివాకర్ ఇటీవల ప్రశ్నించారు.

అలాగే సుమారు 10 ఏళ్ల నాటి ఎన్‌డిపిఎస్ కేసులో ఒక నిందితుడిని నిర్దోషిగా విడుదల చేశారు. చట్టం నిర్దేశించిన విధానాన్ని పాటించకుండా, విచారణ ప్రారంభమైన కేసులను పరిపాలనా ఉత్తర్వుల ద్వారా ఉపసంహరించుకోవచ్చా అని 35 పేజీల తీర్పులో ఆయన ప్రశ్నించారు. న్యాయవ్యవస్థ స్వతంత్రతపై, అలాగే జిల్లా న్యాయమూర్తులు వినియోగించే పరిపాలనాపరమైన అధికారాల పరిమితులపై కూడా ఆయన ఆందోళన వ్యక్తం చేశారు.