IGDC | 21 వేల కోట్లకు చేరిన భారత గేమింగ్ మార్కెట్

IGDC | వచ్చే ఐదేండ్లలో భారత్‌లో గేమింగ్‌ మార్కెట్‌ రూ.71 వేల కోట్లకు చేరుతుందని లుమికాయ్‌ ఫౌండింగ్‌ తెలిపింది.

హైదరాబాద్, నవంబర్ 3: భారత గేమింగ్ మార్కెట్ రూ.21 వేల కోట్లకు చేరిందని లుమికాయ్ నివేదిక స్పష్టం చేసింది. ఈ మార్కెట్ 2027 నాటికి రూ.71 వేల కోట్లకు చేరుతుందని నివేదిక అంచనా వేసింది. ఇండియా గేమ్ డెవలపర్స్ కాన్ఫరెన్స్ (ఐజీడీసీ) సదస్సు గురువారం హైదరాబాద్‌లోని హెచ్ఐసీసీలో ప్రారంభమైంది. ఈ సదస్సులో భాగంగా లుమికాయ్ ఫౌండింగ్ జనరల్ పార్ట్‌ నర్లు జస్టిన్ శ్రీరాం కీలింగ్, సలోనీ సెహగాల్ ఈ నివేదికను విడుదల చేశారు.

నివేదికలోని ముఖ్యాంశాలు:

• భారత్‌లో 507 మిలియన్ల గేమర్లు ఉంటే, వారిలో 120 మిలియన్ల మంది పేయింగ్ యూజర్లు ఉన్నారు.
• 2022 ఆర్థిక సంవత్సరంలో 15 బిలియన్ల డౌన్‌లోడ్లు సాధించి, భారత్ ప్రపంచంలోనే అతి పెద్ద మొబైల్ గేమ్స్ వినియోగదారుగా నిలిచింది.
• బీజీఎం, ఫ్రీ ఫైర్ గేమ్స్ వేగంగా వృద్ధి చెందుతున్నాయి. వీటి ద్వారా 550 మిలియన్ డాలర్ల ఆదాయం పొందాయి.
• మిడ్ కోర్ గేమ్స్‌ పై 48 శాతం గేమర్లు డబ్బు ఖర్చు పెడుతున్నారు. 65 శాతం మంది పేయింగ్ గేమర్లు కనీసం ఒక ఇన్-యాప్‌ కలిగి ఉన్నారు.

• భారత్‌లో గేమింగ్ సెక్టార్ ఫండింగ్ భారీగా పెరిగింది. ఈ ఏడాది గేమింగ్ కంపెనీలు 513 మిలియన్ డాలర్ల ఫండ్ సాధించాయి.
• భారత ఆధారిత కంటెంట్ వేగంగా పెరుగుతోంది.
• భారత్‌లో గేమ్స్ ఆడే స్త్రీ, పురుషుల నిష్పత్తి 40:60 శాతంగా ఉంది.
• 80 శాతం మంది గేమర్లలో భారత మేధో సంపత్తి ఆస్తుల ఆధారంగా గేమింగ్‌ చేసే ధోరణి కనిపిస్తున్నది.
• దేశీయ గేమింగ్‌ ఇండస్ట్రీలో వెబ్‌3 టెక్నాలజీ.. అంతకంతకు పాపులారిటీ పెంచుకుంటున్నది.
• 450 ఇండియన్‌ వెబ్‌3 కంపెనీల్లో 30% గేమింగ్‌ ఆపరేట్‌ చేస్తున్నారు.
• 2019-2022 మధ్య వెబ్‌ 3 గేమ్స్‌ 400 మిలియన్ల డాలర్ల ఆదాయం పెంచుకుంటాయి.