సోరెన్‌ ప్రభుత్వాన్ని అస్థిరపర్చే వ్యూహం

ప్రతిపక్ష ప్రభుత్వాలను అస్థిర పర్చడానికి కేంద్ర ప్రభుత్వం దర్యాప్తు సంస్థలను వాడుకుంటున్నదని ఎన్ని ఆరోపణలు వచ్చినా బీజేపీ మాత్రం తన పంథాను వీడటం లేదు. అక్రమ మైనింగ్‌ కేసు పేరుతో జార్ఖండ్‌లోని హేమంత్‌ సోరెన్‌ ప్రభుత్వాన్ని ఉక్కిరిబిక్కిరి చేస్తున్నది

• జార్ఖండ్‌లో నాలుగు నెలలుగా ఈడీ అధికారుల సోదాలు

రాంచీ, ఆగస్టు 24: ప్రతిపక్ష ప్రభుత్వాలను అస్థిర పర్చడానికి కేంద్ర ప్రభుత్వం దర్యాప్తు సంస్థలను వాడుకుంటున్నదని ఎన్ని ఆరోపణలు వచ్చినా బీజేపీ మాత్రం తన పంథాను వీడటం లేదు. అక్రమ మైనింగ్‌ కేసు పేరుతో జార్ఖండ్‌లోని హేమంత్‌ సోరెన్‌ ప్రభుత్వాన్ని ఉక్కిరిబిక్కిరి చేస్తున్నది.

ఈ కేసులో ఇప్పటికే సోరెన్‌ సన్నిహితుడు పంకజ్‌ మిశ్రా, బచ్చూయాదవ్‌ను ఎన్‌ఫోర్స్‌మెంట్‌ డైరెక్టరేట్‌ (ఈడీ) అరెస్టు చేసింది. తాజాగా సీఎం సన్నిహితుడిగా భావిస్తున్న ప్రేమ్‌ ప్రకాశ్‌ లక్ష్యంగా ఈడీ బుధవారం సోదాలు జరిపింది. జార్ఖండ్‌, బీహార్‌, తమిళనాడు, ఢిల్లీలో దాదాపు 20 చోట్ల ఈ సోదాలు జరిగాయి. జార్ఖండ్‌ రాజధాని రాంచీలో జరిగిన సోదాల్లో రెండు ఏకే-47 తుపాకులు, 60 బుల్లెట్లు దొరికాయని అధికారులు చెప్పారు. ఈ తుపాకులు రాంచీ పోలీసులకు చెందినవని ప్రాథమికంగా తేల్చారు. అక్రమ మైనింగ్‌ కేసులో ఈడీ 4 నెలలుగా సోదాలు చేపడుతున్నది.