ప్రైవేట్‌ బ్యాంకులను జాతీయం చేయాలి

బ్యాంకింగ్‌ వ్యవస్థను నిర్వీర్యం చేసేందుకు కేంద్ర ప్రభుత్వం కుట్రలు చేస్తున్నదని, ప్రభుత్వ బ్యాంకుల ప్రైవేటీకరణకు అత్యుత్సాహం చూపుతున్నదని ఉద్యోగులు మండిపడ్డారు. ప్రభుత్వ రంగ బ్యాంకుల ప్రైవేటీకరణ ప్రయత్నాలను మానుకోవాలని, బ్యాంకు రుణాలను ఎగ్గొడుతున్న కార్పొరేట్‌ సంస్థలపై క్రిమినల్‌ చర్యలు తీసుకోవాలని డిమాండ్‌ చేశారు.

• బ్యాంకుల ప్రైవేటీకరణ ఆపాలి
• రుణాలు ఎగ్గొట్టిన కార్పొరేట్‌ సంస్థలపై చర్యలు తీసుకోవాలి
• కేంద్రానికి బీఈఎఫ్‌ఐ డిమాండ్‌

చెన్నై, ఆగస్టు 16: బ్యాంకింగ్‌ వ్యవస్థను నిర్వీర్యం చేసేందుకు కేంద్ర ప్రభుత్వం కుట్రలు చేస్తున్నదని, ప్రభుత్వ బ్యాంకుల ప్రైవేటీకరణకు అత్యుత్సాహం చూపుతున్నదని ఉద్యోగులు మండిపడ్డారు. ప్రభుత్వ రంగ బ్యాంకుల ప్రైవేటీకరణ ప్రయత్నాలను మానుకోవాలని, బ్యాంకు రుణాలను ఎగ్గొడుతున్న కార్పొరేట్‌ సంస్థలపై క్రిమినల్‌ చర్యలు తీసుకోవాలని డిమాండ్‌ చేశారు. దేశంలోని ప్రైవేటు బ్యాంకులను జాతీయీకరణ చేయాలని తాజాగా చెన్నైలో జరిగిన బ్యాంక్‌ ఎంప్లాయీస్‌ ఫెడరేషన్‌ ఆఫ్‌ ఇండియా(బీఈఎఫ్‌ఐ) సదస్సు డిమాండ్‌ చేసింది. బ్యాంకింగ్‌ రంగం ఎదుర్కొంటున్న సమస్యలపై సదస్సులో చర్చించారు.

ప్రభుత్వ బ్యాంకులను బలహీనపర్చే కుట్రలు

బీఈఎఫ్‌ఐ నేత దేబాశిష్‌ బసు చౌదురి మాట్లాడుతూ కేంద్రం ప్రభుత్వ రంగ బ్యాంకులను బలహీనపర్చేందుకు ప్రయత్నాలు చేస్తున్నదని అన్నారు. 2008లో ఆర్థిక మాంద్యం నుంచి బ్యాంకులు కాపాడాయంటే.. అందుకు అవి ప్రభుత్వ రంగంలో ఉండటమే కారణమని, ఇదే సమయంలో అమెరికాలో ప్రైవేటు రంగంలో ఉన్న సిలికాన్‌ బ్యాంక్‌, ఫస్ట్‌ రిపబ్లిక్‌ బ్యాంక్‌ వంటి బ్యాంకులు దివాలా తీశాయన్న విషయాన్ని కేంద్రం గుర్తుంచుకోవాలని హితవు పలికారు. సహకార బ్యాంకులను కూడా కేంద్రం వాణిజ్యీకరణ చేసేందుకు ప్రయత్నిస్తున్నదని, గ్రామీణ ప్రాంత ప్రజలకు 90 శాతం రుణాలు అందిస్తున్న గ్రామీణ బ్యాంకులపై ఇది తీవ్ర ప్రతికూల ప్రభావం చూపుతుందని హెచ్చరించారు.

సదస్సులో ఆమోదించిన తీర్మానాలు

• ప్రైవేటీకరణకు వ్యతిరేకంగా బ్యాంకులు, ఉద్యోగుల ప్రయోజనాలను కాపాడుకోవాలి.
• 5 లక్షల ఉద్యోగ ఖాళీలను భర్తీ చేయాలి. తాత్కాలిక ఉద్యోగులను పర్మినెంట్‌ చేయాలి.
• దేశంలోని ప్రైవేటు బ్యాంకులను జాతీయీకరణ చేయాలి.
• కార్పొరేట్‌ సంస్థలు ఉద్దేశపూర్వకంగా రుణాలను ఎగ్గొట్టేందుకు అవకాశం కల్పిస్తున్న బెయిలవుట్‌ పాలసీని సంస్కరించాలి.
• బ్యాంకుల్లోని ప్రజాధనాన్ని లూటీ చేస్తున్న వారు, ప్రభుత్వ రంగ బ్యాంకుల్లో అక్రమార్కులపై పోరాటంలో మరింత ధృడ సంకల్పంతో ముందుకు సాగాలి.
• మహిళలకు ప్రసూతి సెలవులను రెండు సంవత్సరాలకు పెంచాలి.
• స్వతంత్ర చార్టర్లతో ఆర్బీఐ స్వయంప్రతిపత్తితో పనిచేసేలా చూడాలి. ప్రజలకు సజావుగా సేవలు అందించేందుకు బ్యాం కులు, ఇతర ఆర్థిక సంస్థలను బలోపేతం చేయాలి.
• ఏటీఎం చార్జీలు, మినిమం బ్యాలెన్స్‌ లేదని ఫైన్లలో పేరుతో ప్రజల నుంచి డబ్బులు దండుకొంటున్నారు. దీన్ని అరికట్టేందుకు వినియోగదారుల సేవలను మెరుగుపరచాలి.