Visit:
వర్షాలు లేక భూగర్భ జలాలు అడుగంటిపోతుండటంతో రైతులు, ప్రజలు ఇబ్బందులు ఎదుర్కొంటున్న నేపథ్యంలో సమృద్ధిగా వర్షాలు కురవాలని ఆకాంక్షిస్తూ నల్లగొండలో ముస్లిం సోదరులు ప్రత్యేక ప్రార్థనలు నిర్వహించారు. మునుగోడు రోడ్డులోని ఈద్గా మైదానంలో ఆదివారం పెద్ద సంఖ్యలో ముస్లిం సోదరులు హాజరై నమాజ్-ఎ-ఇస్తిస్కా నిర్వహించారు.
నల్లగొండ ఈద్గా కమిటీ ఆధ్వర్యంలో జరిగిన ఈ కార్యక్రమంలో మతపెద్దల నేతృత్వంలో ప్రత్యేక నమాజ్ నిర్వహించి, వర్షాలు సమృద్ధిగా కురిసి ప్రజలు, రైతులు, పశుపక్ష్యాదులు, సమస్త జీవరాశి సుఖసంతోషాలతో ఉండాలని ప్రార్థించారు.
ఇస్లామీయ సంప్రదాయంలో వర్షాభావ పరిస్థితులు ఏర్పడినప్పుడు అల్లాహ్ను ప్రార్థిస్తూ నిర్వహించే ప్రత్యేక నమాజ్ను నమాజ్-ఎ-ఇస్తిస్కాగా పిలుస్తారు. వర్షాలు కురవాలని, ప్రకృతి అనుకూలంగా మారాలని కోరుతూ ఈ ప్రార్థనను నిర్వహించడం ఆనవాయితీగా వస్తోందని మతపెద్దలు తెలిపారు. ప్రవక్త మహమ్మద్ సల్లల్లాహు అలైహి వసల్లం కాలంలోనూ వర్షాల కోసం ప్రత్యేక ప్రార్థనలు నిర్వహించినట్లు వివరించారు.
ఈ సందర్భంగా జమియత్ ఉలమా-ఎ-హింద్ తెలంగాణ అధ్యక్షులు, నల్లగొండ ఈద్గా కమిటీకి చెందిన మౌలానా ఎహసానుద్దీన్ ఖాస్మీ మాట్లాడుతూ.. రాష్ట్రవ్యాప్తంగా సమృద్ధిగా వర్షాలు కురవాలని కోరుతూ నల్లగొండలో ప్రత్యేక ప్రార్థనలు నిర్వహించినట్లు తెలిపారు. వర్షాలు కేవలం మనుషుల అవసరాలకే కాకుండా పశుపక్ష్యాదులు, వృక్షజాలం, సమస్త జీవరాశి మనుగడకు ఎంతో అవసరమని పేర్కొన్నారు. ప్రస్తుతం వర్షాభావ పరిస్థితుల కారణంగా భూగర్భ జలాలు తగ్గిపోతున్నాయని, వ్యవసాయ రంగంపైనా ప్రభావం పడుతోందని తెలిపారు.
ప్రత్యేక ప్రార్థనలతో పాటు ప్రతి ఒక్కరూ తమ సామాజిక బాధ్యతలను గుర్తుంచుకోవాలని మతపెద్దలు సూచించారు. అర్హత ఉన్నవారు జకాత్ చెల్లించాలని, పేదలు, అవసరంలో ఉన్నవారికి అండగా నిలవాలని పిలుపునిచ్చారు. ఇతరులతో సోదరభావంతో మెలగాలని, తప్పులు, పాపాలకు దూరంగా ఉండాలని సూచించారు. సమాజంలో ఐక్యత, దాతృత్వం, పరస్పర సహకారం పెంపొందించాలని పిలుపునిచ్చారు.
వర్షాలు లేక భూగర్భ జలాలు తగ్గిపోవడంతో వ్యవసాయ రంగంపై ప్రభావం పడుతున్న ప్రస్తుత పరిస్థితుల్లో ఈ ప్రత్యేక ప్రార్థనలకు ప్రాధాన్యం ఏర్పడింది. సమృద్ధిగా వర్షాలు కురిసి చెరువులు, కుంటలు నిండాలని, భూగర్భ జలాలు పెరగాలని, రైతులకు సాగునీటి సమస్యలు తొలగాలని ప్రార్థనలో పాల్గొన్న వారు ఆకాంక్షించారు.
ఈ కార్యక్రమానికి పెద్ద సంఖ్యలో ముస్లిం సోదరులు హాజరయ్యారు. కార్యక్రమానికి అవసరమైన ఏర్పాట్లు చేసిన మున్సిపల్ అధికారులు, పోలీసు శాఖకు ఈద్గా కమిటీ ప్రతినిధులు కృతజ్ఞతలు తెలిపారు. ఈ కార్యక్రమంలో మతపెద్దలతో పాటు గ్రంథాలయ సంస్థల చైర్మన్ హఫీజ్ ఖాన్, ఈద్గా కమిటీ ప్రతినిధులు, పట్టణ ప్రజలు తదితరులు పాల్గొన్నారు.
