Visit:
– వ్యవసాయానికి రోజుకు 14 గంటల నాణ్యమైన విద్యుత్ అందించాలని డిమాండ్
– కనగల్ విద్యుత్ సబ్స్టేషన్ ఎదుట రైతులతో కలిసి ధర్నా
కనగల్, సెప్టెంబర్ 25 : ఎండిపోయిన పంటలకు ప్రభుత్వం వెంటనే నష్ట పరిహారం చెల్లించి రైతులను ఆదుకోవాలని, అలాగే వ్యవసాయానికి రోజుకు కనీసం 14 గంటల నాణ్యమైన విద్యుత్ను నిరంతరాయంగా సరఫరా చేయాలని సీపీఎం నల్లగొండ జిల్లా కార్యదర్శి వర్గ సభ్యురాలు పాలడుగు ప్రభావతి డిమాండ్ చేశారు. శుక్రవారం కనగల్ మండల కేంద్రంలోని విద్యుత్ సబ్స్టేషన్ ఎదుట రైతులతో కలిసి ధర్నా నిర్వహించారు. ఈ సందర్భంగా ఆమె మాట్లాడుతూ.. వర్షాభావ పరిస్థితులు, నీటి కొరత, విద్యుత్ సరఫరాలో అంతరాయాల కారణంగా పంటలు ఎండిపోతున్నాయని ఆవేదన వ్యక్తం చేశారు. రైతులు అప్పులు చేసి పెట్టుబడులు పెట్టి పంటలు సాగు చేస్తున్నప్పటికీ, సాగునీరు అందక, విద్యుత్ సరఫరా సక్రమంగా లేక పంటలు ఎండిపోవడంతో తీవ్రంగా నష్టపోతున్నారన్నారు. ప్రభుత్వం తక్షణమే గ్రామాల వారీగా పంట నష్టాన్ని సర్వే చేసి, ఎకరాకు తగిన నష్టపరిహారం అందించాలన్నారు. వ్యవసాయానికి సరిపడా విద్యుత్ అందించకుండా క్రాప్ హాలిడే ప్రకటించడం రైతుల సమస్యకు పరిష్కారం కాదన్నారు. రైతులు పంటలు సాగు చేసుకునే విధంగా సాగునీరు, విద్యుత్, విత్తనాలు, ఎరువులు అందుబాటులో ఉంచి ప్రభుత్వం వ్యవసాయాన్ని ప్రోత్సహించాలని కోరారు.
– ఎండిపోయిన పంటలకు వెంటనే నష్టపరిహారం చెల్లించాలి
– వ్యవసాయానికి రోజుకు కనీసం 14 గంటల నాణ్యమైన విద్యుత్ సరఫరా చేయాలి
– విద్యుత్ సరఫరాలో అంతరాయాలను నివారించి నిరంతరాయంగా సరఫరా చేయాలి
– పంట నష్టంపై గ్రామాల వారీగా సమగ్ర సర్వే నిర్వహించాలి
– సాగునీటి వనరులను అందుబాటులోకి తీసుకువచ్చి పంటలకు నీరు అందించాలి
– విద్యుత్ కోతల వల్ల మోటార్లు, ట్రాన్స్ఫార్మర్లు దెబ్బతిన్న రైతులకు వెంటనే పరిహారం అందించాలి
– రైతుల పంట రుణాలను ఈ సంవత్సరం ఆపి, రుణాలపై వడ్డీ భారాన్ని తగ్గించే చర్యలు చేపట్టాలి
– రైతులకు విత్తనాలు, ఎరువులు, పంట రుణాలు సకాలంలో అందించాలి
– క్రాప్ హాలిడే ప్రకటించే బదులు రైతులు పంటలు సాగు చేసుకునేందుకు అవసరమైన నీరు, విద్యుత్ అందించాలి
– వర్షాభావ పరిస్థితులను దృష్టిలో ఉంచుకుని ప్రత్యేక రైతు సహాయ ప్యాకేజీ ప్రకటించాలి.
రైతుల సమస్యలను ప్రభుత్వం తక్షణమే పరిష్కరించకపోతే రైతులతో కలిసి మరిన్ని ఆందోళన కార్యక్రమాలు చేపడతామని ఆమె హెచ్చరించారు. ఈ కార్యక్రమంలో సీపీఎం మండల కమిటీ సభ్యులు ముత్యాలు, సుల్తానా పెద్దలు గోపాల్ రాములు యాదమ్మ లక్ష్మి పాల్గొన్నారు.
