గుండె జరభద్రం

ఇటీవలి కాలంలో చాలా మంది అకస్మాత్తుగా గుండెపోటుతో ప్రాణాలు కోల్పోతున్న ఘటనలు ఆందోళనను కలిగిస్తున్నాయి. అప్పటి వరకు బాగానే ఉన్న వారు ఒక్కసారిగా గుండెపోటుతో కుప్పకూలి తిరిగిరాని లోకాలకు వెళ్తున్నారు.

• యాంత్రిక జీవన విధానంలో పెరుగుతున్న గుండెపోట్లు
• మానసిక ఒత్తిడి, ఆహార అలవాట్లే కారణమంటున్న వైద్యులు
• నేడు ప్రపంచ గుండె సంరక్షణ దినోత్సవం

కోస్గి, సెప్టెంబర్‌ 28 : ఇటీవలి కాలంలో చాలా మంది అకస్మాత్తుగా గుండెపోటుతో ప్రాణాలు కోల్పోతున్న ఘటనలు ఆందోళనను కలిగిస్తున్నాయి. అప్పటి వరకు బాగానే ఉన్న వారు ఒక్కసారిగా గుండెపోటుతో కుప్పకూలి తిరిగిరాని లోకాలకు వెళ్తున్నారు. చిన్నా, పెద్ద అన్న తేడా లేకుండా చాలా మంది గుండెపోటుకు గురవుతున్నారు. అస్తవ్యస్తమైన జీవన విధానం, ఆహారపు అలవాట్లు, వ్యసనాల వల్ల చాలా వరకు గుండెపోట్లు వస్తున్నాయని వైద్యులు చెబుతున్నారు.

అలాగే ఆరోగ్యాన్ని కాపాడుకునేందుకు ప్రతి రోజూ వ్యాయామం చేసేవారు, వాకింగ్‌ చేసే వారు సైతం ఇటీవల ఉన్నట్టుండి కుప్పకూలిపడిపోతున్నారు. ప్రపంచవ్యాప్తంగా ఏటా కోటి 90లక్షల మంది గుండె సంబంధిత వ్యాధుల బారిన పడుతున్నారంటే ప్రతి ఒక్కరూ ఆరోగ్యంపై ఆలోచించాల్సిన అవసరమున్నది. యంత్రంలా క్షణం తీరిక లేకుండా పనిచేస్తూ మన ఉనికిని కాపాడుతున్న గుండె పట్ల శ్రద్ధ చూపకపోవడం వల్లే చాలా వరకు గుండెపోట్లు వస్తున్నాయని చెబుతున్నారు. ప్రతి ఒక్కరూ ఆరోగ్యానికి ప్రాధాన్యతనిస్తూ గుండెను పదిలంగా చూసుకోవాల్సిన అవసరమున్నదని అంటున్నారు.

ఆహారపు అలవాట్లే గుండెకు హాని..

ఆధునిక యుగంలో శుద్ధి చేయకుండా అనేక ఆహార పదార్థాల అమ్మకాలు పెరిగాయి. యాంత్రిక జీవనంలో మనం కూడా వాటి పట్ల ఎక్కువ మక్కువ చూపుతున్నాం. అందమైన ప్యాకింగ్‌లతో అందుబాటులో ఉన్న ఆహార పదార్థాల్లో అవసరానికి మించిన పంచదార, ఉప్పు, నూనెలు, కొవ్వుపదార్థాలు ఉంటాయి. ఫాస్ట్‌ఫుడ్‌ తినడం గుండె సమస్యలకు ముఖ్య కారణం. కూల్‌డ్రింక్స్‌ బయట లభించే పండ్లరసాలు, వివిధ రకాల స్వీట్లు విపరీతంగా తీసుకోవడం గుండెకు ప్రమాదాలు తెచ్చి పెడుతున్నది.

గతంలో 40 ఏండ్ల తర్వాత అరుదుగా కన్పించే గుండెపోట్లు నేడు టీనేజ్‌లోనే వస్తుండడం ఆందోళన కలిగిస్తోంది. 20 ఏండ్ల నుంచి 60 ఏండ్ల వయసు గల వారిలో ఎవరు ఎప్పుడు ఎక్కడ కుప్పకూలిపడిపోతున్నారో తెలియని పరిస్థితి నెలకొంది. కనీస వ్యాయమం లేకపోవడం, పనిభారం, మరకద్రవ్యాలు సేవించడం, మద్యం అలవాట్లు, పొగ తాగడం వంటి చర్యలు గుండె పనితీరును మార్చివేస్తున్నాయి. మన చేతులారా మనమే గుండెకు అనేక చిక్కులు తెచ్చి పెడుతున్నాం.

డీజే సౌండ్లతో గుండెకు ప్రమాదం..

ఉత్సవాలు, సంబురాల పేరిట డీజే సౌండ్స్‌ స్థాయికి మించి శబ్ధ్దాల వల్ల గుండెపోటుకు ఒక రకంగా కారణమవుతున్నాయి. తాజాగా గణేశ్‌ ఉత్సవాల్లో జరిగిన నిమజ్జనంలో డీజే సాండ్‌ ధాటికి నాగర్‌కర్నూల్‌ జిల్లా బిజినపల్లి మండంలం పాలెం గ్రామానికి చెందిన పానుగంటి మల్లేశ్‌ మంగళవారం రాత్రి గుండెపోటుతో మృతిచెందాడు. ఇలాంటి ఘటనలు చోటుచేసుకుంటూనే ఉన్నాయి.