Visit:
గద్వాల/టౌన్‌, నవంబర్‌ 29 : తెలంగాణ ప్రజల చిరకాల ఆకాంక్ష అయిన ప్రత్యేక రాష్ర్టాన్ని సాధించేందుకు కేసీఆర్‌ తన ప్రాణాలను సైతం లెక్కచేయకుండా దీక్షా దివస్‌తో చరిత్రను మలుపుతప్పారని, కార్య సాధకుడని అలంపూర్‌ ఎమ్మెల్యే విజయుడు అన్నారు. జిల్లా కేంద్రంలోని పార్టీ కార్యాలయంలో ఏర్పాటు చేసిన సమావేశానికి విజయుడుతోపాటు బాసు హనుమంతు, బీఎస్‌ కేశవ్‌, నాగర్‌దొడ్డి వెంకట్రాములు, ఆంజనేయులుగౌడ్‌ ముఖ్య అతిథులుగా హాజరయ్యారు. ఈ సందర్భంగా ఎమ్మెల్యే మాట్లాడుతూ కేసీఆర్‌ దీక్ష చరిత్ర సృష్టించిందన్నారు.
ఎవరెన్ని కుట్రలు చేసినా చరిత్రను, ప్రజల గుండెల్లో కేసీఆర్‌ స్థానాన్ని చెరపలేరన్నారు. ఆంజనేయగౌడ్‌ మాట్లాడుతూ తెలంగాణ రాష్ట్ర సాధకుడు కేసీఆర్‌కు భారతరత్న ఇవ్వాల్సిందేనన్నారు. సర్పంచ్‌ పదవులను అంగట్లో సరకులా అమ్ముతుంటే అధికారులు ఏం చేస్తున్నారని ప్రశ్నించారు. నాగర్‌దొడ్డి వెంకట్రాములు మాట్లాడుతూ కేసీఆర్‌ కార్యసాధకుడని అభివర్ణించారు. ఉద్యమంలో ఏనాడూ పాల్గొనని, తెలంగాణ పోరాటం చేయని కొందరు మూర్ఖుల మాటలను పట్టించుకోవాల్సిన అవసరం లేదన్నారు. అంతకుముందు మున్సిపల్‌ మాజీ చైర్మన్‌ బీఎస్‌ కేశవ్‌ ఆధ్వర్యంలో జిల్లా కేంద్రంలో బైక్‌ ర్యాలీ నిర్వహించారు. అనంతరం పార్టీ కార్యాలయంలో తెలంగాణ తల్లి విగ్రహానికి పూలమాలలు వేసి పూజలు చేసి పార్టీ జెండాను ఆవిష్కరించారు. అమరవీరుల చిత్రపటానికి పూలమాలలు చేసి నివాళులర్పించారు. కార్యక్రమంలో మోనేశ్‌, రామకృష్ణ, కోటేశ్‌, సుధాకర్‌రెడ్డి, యువకిశోర్‌, బసవరాజు తదితరులు పాల్గొన్నారు.
