ఆటపాటల పదకొండేళ్ల బాల్యాన్ని దాటి
సంక్లిష్టమైన బాల్య, తరుణాల
జుగల్ బందీ కచేరీ అయిన
పన్నెండేళ్లనూ దాటేసి
నన్ను నే నర్థం చేసుకుంటూ
నా జీవనగీతాన్ని శృతి చేసుకుంటున్నప్పుడు
దూరాల నుంచి విచ్చేసిన నీవు
మలయసమీరసఖులతో కలిసి
నా ప్రాంగణంలో చొరవగా ప్రవేశించావు!
పట్టపగలే మరో ఉదయం వలె
నీ బంగారు రూపంతో కాంతిని
ప్రసరించావు!
అపరిచితురాలివైనా
ఎంతో పరిచయమున్నట్లే
కోటిమెరుపుల కలగలుపైన
నీ నీలనయనానుగ్రహకాంతిని
నాపై పరిచి పలుకరించావు!
ఏ అమ్మాయిల చూపులను
పట్టించుకోని నా పెంకెతనాన్ని
తృటిలో బద్దలు కొట్టేశావు!
క్షణంక్షణం నాకు అందాల కలలను ప్రసాదించావు!
నా ఊహల్లోనూ, భావాల్లోనూ,
ఆలోచనల్లోనూ కొత్త వెలుగులు
నింపావు!
నా ప్రతి ఆశయానికీ ఆత్మగ
నిలిచావు!
నేను చేసే ప్రతిపనికీ ప్రేరణ
వయ్యావు!
నా మనోరాజ్యాన్ని నీ ఆధీనం
లోకి తీసుకున్నావు!
నీ మాటని నా పాటగ చేశావు!
కానీ ఆశ్చర్యంగా నీ సొంత
సామ్రాజ్యానికి ఉలుకూ
పలుకూ లేక వెళ్లిపోయావు!
ఏదేమైనా నీ సన్నిధిలోని
ప్రతిక్షణం అపురూప జ్ఞాపకమైంది!
నీ ఆత్మీయనామస్మరణే
నా జీవితంలో నిత్యవసంతం!
– రఘువర్మ (టీయల్యన్) 92900 93933