పత్తి శేన్ల గడ్డికప్పిన మొక్క మొక్కకు
కలుపు తీశి ఎల్లిపోతుంటే
అవ్వ కాళ్లకు మొక్కలన్నీ
వంగి వంగి దండాలు పెట్టేవి
మొక్కలెండిపోతుంటే.. గొంతెండిపోతున్నా నాయిన
పాయలు పాయలుగా పాపడ దీశినంత సక్కంగా
సాల్లు దీశి నీళ్లు తాపినప్పుడు
సాలు సాలు నాయిన గరుకు
శేతులను గావురంగా ముద్దాడేటివి
రోగమొచ్చి ఆకులన్నీ ముడుసుకున్న పత్తి శెట్లను
జ్వరమొచ్చి మలుసుకుపన్న శిన్న శెల్లెని జూసుకున్నంత
పాయిరంగ జూసుకునేటిది
మబ్బు తునుకలు తునుకలుగా ఇరిగి నేలమీద పడ్డట్టు
శేను శేనంతా ఇచ్చుకున్న పత్తి కాయలు
నల్లరేగడి తీరు ముఖాలపై పూసిన నవ్వులు
ఒక్కతీరుగనె ఉంటయి
శేను శేనంతా పూసిన పత్తి బుగ్గల మీద
ప్రేమగా నిమిరి సంబురపడ్డ ఆ ఇద్దరూ..
ఇశిరిశిరి కొట్టిన ముసురు వానల
నేలరాలిన పత్తి నీళ్లల్ల కొట్టుకుపోతుంటే
చేతికచ్చిన కొడుకు కండ్లముందట కాలం జేస్తే
గుండెపగిలి సచ్చినట్టూ..
రెక్కల కట్టం నీళ్లల్ల కలిసి
తెల్లగా తేలాడుకుంటా పోతుంటే
అవ్వా నాయినలు
మట్టిపెడ్డల కింద మొలువని
పత్తి గింజల్లెక్క మట్టిల గలిసిపోయిండ్రు
– దిలీప్.వి 84640 30808