పచ్చని పట్టుచీర మురిపమ్ముగ గట్టి, పరీమళమ్ముతో
మెచ్చుగ గాలి తెమ్మెర లమేయ సుగంధము లద్ద, ప్రేమతో
నిచ్చలు పల్కరింపగను నిర్మలమౌ చిగురాకు సవ్వడుల్
అచ్చపు సొమ్ములౌ హరిత హార విశోభల తన్మయాత్మయై!
ఉదయ కిరణ భూతిఁ హృదయమ్ము రమియింప
పరవశించి ప్రకృతి పల్లవించు
ప్రాణవాయువు నిచ్చు పచ్చదనము నిచ్చు
జీవ వాహినులిచ్చు జీవ మిచ్చు
లలిమీర యెండలు పలకరించిన, వాని
జల్లించి యిచ్చును చల్లదనము
పత్రహరితమ్మును ప్రసవించి జీవుల
ఆకలి దీర్చును అనవరతము
ప్రకృతి రక్షింప, రక్షింప బడును జగతి
భావి తరములు దీపించు ప్రజ్ఞ గలిగి
స్వచ్ఛమౌ గాలి పీల్చుట ప్రజల హక్కు
ప్రభుత బాధ్యత దాని కాపాడు టెన్న!
పాడి పంటలతోడ పాటీర శోభలు
వ్యాపించు జగతిఁ సంపదలు బెరుగు
తాపంబు దీరిన ధాత్రి విశాలాక్షి
చల్లంగ జూచు నీ జనుల నెల్ల
ఆహ్లాద భరితమౌ హరితహార వెలుంగు
లభ్యుదయాధ్వమ్ము నందు నడుపు
భద్రమై శాంతమై పర్యావరణమొప్పి
సకల విపత్తుల సమయ జేయు
దాని గుర్తించి ప్రభుతయు మానితముగ
హరిత నిధినొండు కల్పించి అందు ప్రజల
సాయ మర్థించు చున్నది, సార మతులు
రండు ఏకమై శ్రేయమ్ము లందు కొనుగ!
పాలకుర్తి రామమూర్తి
94416 66943