కొత్త గాలి

వాడ వాడ
పోచమ్మ తల్లికి బోనమెత్తుకున్నట్టు
ఊరు ఊరంతా
కళకళలాడుతున్న పండుగ

పండుగంటే
మామూలు పండుగ గాదు
అంతెత్తు గొడుగై నిలబడు
ఆకుపచ్చని నవ్వు పాపల బారసాల

మెతుకు పండు సంబురం
చెరువు నిండి అలుగు దునికే
నీళ్ళు వొలుకబోసే
మబ్బు చుట్టాల్లా
హరిత వనాలు పాడుతున్న పండుగ
ఇంటింటీ మొక్క
బంగారు తెలంగాణ ముడుపు

అవి నీకు మొక్కలే
నాకు మాత్రం ఏసీలు
గాలి పంకలు
నిలువెత్తు వింజామరలు

అవి గుంతలు గావు
మట్టిని బతిమాలి
పలుగు పారా తొవ్విన
ప్రాణవాయువు నిలబడు పునాదులు

నగరం మీద వాలిన ఓ పావురమా
ఆ కాంక్రీటు వీధులలో
ఆ ఆకాశమెత్తు భవంతులలో
నువ్వు జరుపుకోలేని పండుగ
నువ్వు ఊహించని పండుగ
ఊరుతల్లి జరుపుతున్నది
ఓ చెయ్యేసి
కొంచెం కొత్త గాలి
గుండెకెత్తుకుని పోదువు రా… రా…!.

-గజ్జెల రామకృష్ణ
89774 12795