అతడు తెలగాణ సాహిత్య హర్మ్య దీప్తి
అతడు తెలగాణ కీర్తి సంగతుల వరము
భాసురోన్ముఖ సురవర వంశ గరిమ
సాహితీ ప్రతాపుని కిల సాటి యెవరు?
అతడు ప్రతాపరెడ్డి, ఘనమైన తెలుంగు కృషీవలుండు, సం
తత తెలగాణ రాజిత ప్రధాన వెలుంగు కవీంద్ర కోటికిన్
వ్రతముగ వాఙ్మయార్చనల వాసిగ జేసిన తత్వదర్శి, సం
హిత రచనా ప్రవాహముల కేతము వట్టిన కర్షకుండహో!
వరనిధి గోలుకొండ కవివాణుల సంకలనమ్ము దీర్చి, తా
విరియగ జేసె మాతృధర వేదన శోధన రాటుదేలగా
సురవర జాలమెల్ల పరిశోభితమై విలసిల్లనో యనన్
పరిమళ మొప్పు మాటలను భాసిల జేసెను పుస్తకావళిన్!
నవవైతాళికుడై యశేష యశమున్ నానావిధ ప్రాభవ
వ్యవసాయమ్మున తీర్చిదిద్ది తెలగాణానంద సంధాయియై
భువిలో నిల్చెడి గ్రంథరాజములతో భూషించె రోచిన్ సదా
భవిమద్వ్యాస సుధాస్రవంతులను తాసాగించి సత్కీర్తియై!
అతని జన్మదినము శ్రుతమయ్యే శృతియయ్యె
అతని లక్ష్యపథము వితథమయ్యె
అతని కీర్తివెలుగు నాచంద్రతారార్క
మవని కవనసీమ నక్షయముగ!
(నేడు తెలంగాణ సాహితీ వైతాళికుడు సురవరం
ప్రతాపరెడ్డి జయంతి సందర్భంగా..)
– డాక్టర్ అయాచితం నటేశ్వరశర్మ
94404 68557