ఏమౌతుంది?

అవును... యుద్ధమొస్తే ఏమౌతుంది? వెన్నెల్లో

అవును…
యుద్ధమొస్తే ఏమౌతుంది?
వెన్నెల్లో
గోరుముద్దలు తినాల్సిన బాల్యం
దుఃఖనదిలో కొట్టుకుపోతుంది!
సరదాగా చిందేయాల్సిన యవ్వనం
కన్నవాళ్ళ అవయవాలు గుర్తుపట్టడంలో
తలమునకలవుతుంది!
మనవళ్లకు కథలు చెప్పాల్సిన వృద్ధాప్యం
పగిలిన గుండెను అతికించుకోవడంలో
కాలం వెళ్ళదీస్తుంది!
లేలేత కిరణాలతో
భూపాలాన్ని ఆలపించాల్సిన సూర్యుడు
ప్రవహిస్తున్న రక్తపుటేరులను
ఎండగట్టే పనిలో పడతాడు!
పిల్లలతో ఆడుకోవాల్సిన పండువెన్నెల
సమాధులను ఆర్ద్రంగా తడుముతూ
ఒంటరితనాన్ని పోగొట్టుకుంటుంది!
అందరినీ సమంగా పలకరించే చల్లగాలి
విషాదాన్ని భగ్నం చేయడానికి
మృత్యుగీతం పాడుతుంది!
ఊగుతున్న చెట్టుకొమ్మలూ
పరుగెత్తే నదీనదాలూ
కరిగిపోతున్న మంచు పర్వతాలు
అప్రమత్తం చేసే చీకట్లూ
తన అస్తిత్వాన్ని తానే సమాధి చేసుకునే
మనిషి తీరును చూసి పగలబడి నవ్వుతాయి..!

ఎన్‌.నరేశ్‌చారి
97013 34516