బట్టకట్టే భాగ్యం

వాడేమో... నగరాన్ని శుద్ధిచేసే వానదేవుడిలా దారప్పోగులు కడిగే తలస్నానం

వాడేమో…
నగరాన్ని శుద్ధిచేసే వానదేవుడిలా
దారప్పోగులు కడిగే తలస్నానం
అమ్మేమో…
భుజం మీద ఎన్ని నొప్పి సూదులు పొడుస్తున్నా
ఆకలి కడుపు నిండిన పిల్ల సంబురం
కళ్ళముందు కదలాడు ఆసు యంత్రం

వాడేమో…
ఆకాశం మీది నక్షత్రాలు
నూలు పోగుల మీద పూయించి
రంగులద్దు నేలమీది ఇంద్రధనుస్సు

అమ్మ…
కలలకు ఊపిరి ముడేసి
అచ్చు దారానికి
పడుగు పోగుల ప్రాణం అతికే ఫెవికోలు

మహాత్ముడు తిప్పుతున్నట్టు
తిరిగే రాట్నం
కండె వెనుక కండే వరుసగట్టు
మెతుకు పూలహారం

రాత్రీ పగలూ కంట్లో వొత్తులేసుకుని
నాలుగు చేతుల అల్లిన చీర
ప్రపంచం మెచ్చిన శ్రమ గీతం

తూనీగ రెక్కలిరిసిన
నెయ్యీ బువ్వ
నాడె పట్టినప్పటి నుండి పేనుతున్న
బట్టకట్టే భాగ్యం..!

గజ్జెల రామకృష్ణ
89774 12795

నేడు జాతీయ
చేనేత దినోత్సవం…