బ్లాక్‌తో మైండ్‌ బ్లాంక్‌ చేద్దాం..

సూర్యాస్తమయంలో తీసే ఫొటోలు అద్భుతంగా వస్తాయి. ఎరుపు - బంగారు రంగులో మెరిసే ఆకాశం, వివిధ వర్ణాల కలయికతో ఆకర్షించే మేఘాలు.. ఫొటోలకు సరికొత్త కళను తీసుకొస్తాయి. అయితే..

సూర్యాస్తమయంలో తీసే ఫొటోలు అద్భుతంగా వస్తాయి. ఎరుపు – బంగారు రంగులో మెరిసే ఆకాశం, వివిధ వర్ణాల కలయికతో ఆకర్షించే మేఘాలు.. ఫొటోలకు సరికొత్త కళను తీసుకొస్తాయి. అయితే.. సబ్జెక్ట్‌ డిటెయిల్స్‌ను పూర్తిగా చూపించకుండానే అందమైన ఛాయాచిత్రాలను తీస్తుంటారు కొందరు ఔత్సాహిక ఫొటోగ్రాఫర్లు. దానికే.. సిల్‌హౌట్‌ ఫొటోగ్రఫీ (Silhouette Photography) అని పేరు. ఇదో ప్రత్యేకమైన ఫొటోగ్రఫీ శైలి.

సిల్‌హౌట్‌
ఫొటోగ్రఫీలో ప్రధాన సబ్జెక్ట్‌ (వ్యక్తి, చెట్టు, జంతువు) పూర్తిగా నలుపు రంగులోనే ఉంటుంది. సబ్జెక్ట్‌ వెనుక వెలుగుతో ప్రకాశిస్తుంటుంది. సబ్జెక్ట్‌ డిటెయిల్స్‌ పూర్తిగా కనిపించకుండా.. నీడలా ఉంటుంది. కానీ, ఆకృతి.. అంటే ఔట్‌లైన్‌ మాత్రం స్పష్టంగా కనిపిస్తుంది. ఇలాంటి ఫొటోలు ఎమోషన్స్‌, డ్రమాటిక్‌ ఎఫెక్ట్‌, స్టోరీ టెల్లింగ్‌కు బాగా ఉపయోగపడతాయి. అయితే, డీఎస్‌ఎల్‌ఆర్‌ అవసరమే లేకుండా.. కేవలం స్మార్ట్‌ఫోన్‌ సాయంతో అద్భుతమైన సిల్‌హౌట్‌ ఫొటోలు తీయొచ్చు.

‘సిల్‌హౌట్‌’ కోసం కావాల్సినవి :

• స్మార్ట్‌ఫోన్‌ (మాన్యువల్‌ లేదా ప్రోమోడ్‌ ఉన్నట్టయితే బాగుంటుంది)
• శక్తిమంతమైన బ్యాక్‌లైట్‌ (సూర్యోదయం, సూర్యాస్తమయంలో ఫొటోలు అద్భుతంగా వస్తాయి. ల్యాంప్‌, విండో లైట్‌తోనూ మంచి ఫొటోలు తీసుకోవచ్చు)
• ట్రైపాడ్‌

సెట్టింగ్స్‌ :
మీ స్మార్ట్‌ఫోన్‌ కెమెరాలో ప్రోమోడ్‌ లేదా మాన్యువల్‌ మోడ్‌ ఉన్నట్టయితే.. కింది సెట్టింగ్స్‌ ఫాలో అవ్వండి.

• ఎక్స్‌పోజర్‌ (EV) : -2 లేదా -3 వరకు తగ్గించండి. అప్పుడు మీ ప్రధాన సబ్జెక్ట్‌ పూర్తిగా నలుపు రంగులో కనిపిస్తుంది.
• ఫోకస్‌ : సబ్జెక్ట్‌పైనే పూర్తిగా ఫోకస్‌ చేయండి.
• ఐఎస్‌ఓ : తక్కువగా ఉంచండి (100-200).
• వైట్‌ బ్యాలెన్స్‌ : డేలైట్‌ లేదా మాన్యువల్‌లో సెట్‌ చేసుకోండి.
• ఫ్లాష్‌ : ఆఫ్‌లో ఉండాలి.
  ప్రోమోడ్‌, మాన్యువల్‌ మోడ్‌ లేని స్మార్ట్‌ఫోన్లలో.. బ్యాక్‌లైట్‌పై ఒక్కసారి ట్యాప్‌ చేయాలి. ఆ తర్వాత ఎక్స్‌పోజర్‌ను తగ్గించడం ద్వారా సిల్‌హౌట్‌ ఎఫెక్ట్‌ పొందవచ్చు.

మంచి యాప్స్‌ :

• Camera FV-5 (Android)
• ProCamera (iOS)
• Lightroom Mobile.. ఎడిటింగ్‌ కోసం
• Snapseed contrast పెంచి సబ్జెక్ట్‌ను మరింత నలుపుగా చేయడానికి.

టిప్స్‌ అండ్‌ ట్రిక్స్‌..

• సబ్జెక్ట్‌ వెనుక నుంచి మంచి కాంతి రావాలి. సూర్యోదయం, సూర్యాస్తమయంలో బాగా కనిపిస్తుంది.
• సబ్జెక్ట్‌ ఆకృతి స్పష్టంగా ఉండాలి. వ్యక్తి, చెట్టు, సైకిల్‌, జంతువు లాంటివి మంచి ఎంపికలు.
• రూల్‌ ఆఫ్‌ థర్డ్స్‌ : ప్రధాన సబ్జెక్ట్‌ ఫ్రేమ్‌ మధ్యలో కాకుండా.. కొద్దిగా పక్కకు ఉండేలా చూసుకోండి.
• బాడీ లాంగ్వేజ్‌ : సబ్జెక్ట్‌ బాడీ లాంగ్వేజ్‌ కూడా ముఖ్యమే! వ్యక్తులైతే చేతులు పైకి లేపడం, వింతవింత పోజులు ఇవ్వడం ద్వారా ఆసక్తికరమైన ఫొటోలు వస్తాయి.
• క్లీన్‌ బ్యాక్‌గ్రౌండ్‌ : బ్యాక్‌గ్రౌండ్‌ ఎప్పుడూ క్లీన్‌గా ఉండాలి.

క్రియేటివ్‌ ఐడియాలు :

• చెట్ల మధ్య ఆడుతున్న పిల్లలు.
• తాటిచెట్లపై నుంచి దిగుతున్న గీతకార్మికులు.
• ఒకరి వైపు మరొకరుగా నిలబడ్డ జంటలు.
• చెట్ల కొమ్మలు.
• సైకిల్‌ మీద కదిలే వ్యక్తులు.
• సాయంసంధ్యలో సూర్యుడితో ఆటలాడుతున్నట్టుగా.. వివిధ రకాలుగా ఫొటోలు తీసుకోవచ్చు.

ఎడిటింగ్‌ టిప్స్‌

• కాంట్రాస్ట్‌ పెంచడం వల్ల ఫొటోల్లో సబ్జెక్ట్‌ మరింత నలుపు రంగులో కనిపిస్తుంది.
• హైలైట్స్‌ తగ్గిస్తే.. బ్యాక్‌ లైట్‌ మృదువుగా మారుతుంది.
• షాడోస్‌ డీప్‌ చేస్తే.. ఫొటోలు క్లారిటీగా కనిపిస్తాయి.

కలర్‌టోన్స్‌ ఉపయోగించి బ్యాక్‌లైట్‌ రంగులను మార్చుకోవచ్చు.
చివరిగా.. సిల్‌హౌట్‌ ఫొటోగ్రఫీ అనేది సింపుల్‌గా కనిపించినా.. భావోద్వేగాలను పండించే ఫొటోగ్రఫీ శైలి. సరైన బ్యాక్‌లైట్‌, కొద్దిగా ప్రాక్టీస్‌ ఉంటేచాలు.. మీ స్మార్ట్‌ఫోన్‌తోనే ప్రొఫెషనల్‌ లెవల్‌ ఫొటోలు తీయొచ్చు. ఈరోజే ప్రయత్నించండి. సూర్యాస్తమయంలో మీ ఫోన్‌ తీసుకొని బయటికెళ్లండి. మెయిన్‌ సబ్జెక్ట్‌ను బ్లాక్‌ చేసేసి.. మైండ్‌ బ్లాంక్‌ అయ్యే ఫొటోలు క్యాప్చర్‌ చేసేయండి.

…? ఆడెపు హరికృష్ణ
– కిసిక్‌