Friendship | తనను పిలవలేదని నా ఫ్రెండ్‌ ఫోన్‌ తీయడం మానేసింది.. మా బంధం నిలుపుకునే మార్గం చెప్పండి

Friendship | నాకు ఓ స్నేహితురాలు ఉంది. చాలా మంచిది. నన్ను బాగా అర్థం చేసుకుంటుంది. కష్టసుఖాలు తనతోనే చెప్పుకొంటాను. నేను ప్రేమలో పడిన విషయం కూడా తనకే ముందుగా చెప్పాను. నా ప్రేమ విజయవంతం కావడంలో తన సహకారం ఎంతో ఉంది.

Friendship | నాకు ఓ స్నేహితురాలు ఉంది. చాలా మంచిది. నన్ను బాగా అర్థం చేసుకుంటుంది. కష్టసుఖాలు తనతోనే చెప్పుకొంటాను. నేను ప్రేమలో పడిన విషయం కూడా తనకే ముందుగా చెప్పాను. నా ప్రేమ విజయవంతం కావడంలో తన సహకారం ఎంతో ఉంది. కరోనా పరిస్థితుల కారణంగా.. నా భర్త వైపు పెద్దలు నిరాడంబరంగా వివాహం జరిపించాలని నిర్ణయించారు. దీంతో దగ్గరి బంధువులను మాత్రమే ఆహ్వానించాం. ఆమెతోపాటు స్నేహితులెవరినీ పిలవలేదు. దీంతో నొచ్చుకున్నట్టు ఉంది. అప్పటి నుంచీ నా ఫోన్‌ తీయడం లేదు. మెసేజ్‌లకు సమాధానమూ ఇవ్వడం లేదు. ఇలా జరగకుండా ఉండాల్సిందేమో అనిపిస్తున్నది. ఆ స్నేహ బంధాన్ని నిలుపుకొనే మార్గం చెప్పండి ప్లీజ్‌!

– ఓ సోదరి

స్నేహం.. బంధుత్వాలకు అతీతమైన బంధం. రక్త సంబంధం కన్నా బలమైంది. అందులోనూ ఆమె మీ ప్రేమ విజయానికి కారకురాలు. నలుగురిలో ఒకరిగా జమకట్టకుండా ఉండాల్సింది. అత్తింటివారిని ఒప్పించి అయినా పిలవాల్సింది. పిలవకపోయినా ఫర్వాలేదు. పెళ్లికి ముందు ఒక్కసారి తనను కలిసి పరిస్థితుల్ని వివరించాల్సింది. తను తప్పక అర్థం చేసుకునేది. కారణం ఏమైతేనేం, మీరు పొరపాటుగా వ్యవహరించారు. ఆమె మనసును గాయపరిచారు. క్షమాపణలు అడగడం తప్పించి మరో పరిష్కారం లేదు. నేరుగా ఆమె ఇంటికి వెళ్లండి. తను తప్పక క్షమిస్తుంది. కాకపోతే కొంత సమయం పట్టవచ్చు. ఓ బంధాన్ని నిలుపుకోవడానికి ఆ మాత్రం శ్రమించక తప్పదు.