ఖమ్మం కల్చరల్. అక్టోబర్3 : రంగు రంగుల పుష్పాలతో వీధులన్ని హరివిల్లులయ్యాయి.. బతుకమ్మలో ఒద్దికగా ఒదిగిన తంగేడు పూలు తరించాయి. కలువ పూలు కనువిందు చేశాయి. గులాబీ పూలు గుబాళించాయి. మందారాలు మరింత ఎర్రబడ్డాయి.. కట్ల పూలు కళకళలాడాయి.. సొర, చామంతి పూలు పరిమళాలు పంచాయి.. గోగు పూలు సంబురపడ్డాయి.. ముద్ద బంతులు మురిశాయి.. వెరసి ఉమ్మడి ఖమ్మం జిల్లాలో సోమవారం సద్దుల బతుకమ్మ వేడుకలు అంబరాన్నంటాయి.. గునుగు, సీత జడ పూలు సిగు ్గపడుతుంటే నందివర్థనాలు తెలుపు కాంతులను వెదజల్లాయి.. మహిళలు పెరుగన్నం, సజ్జముద్దలు, ఎండు కొబ్బరి అన్నం, పులిహోర, చపాతి ముద్దలు, బియ్యం, నువ్వులను గౌరమ్మకు నైవేద్యంగా సమర్పించారు. అనంతరం నదులు, వాగులు, చెరువుల్లో గౌరమ్మను గంగమ్మ ఒడికి చేర్చారు..
సంబురంగా సద్దుల బతుకమ్మ
బతుకమ్మ పండుగ పురస్కరించుకొని సోమవారం చివరి రోజు మధిర, పాలేరు నియోజకవర్గాల్లో శనివారం బతుకమ్మ వేడుకలను నిర్వహించారు. తొమ్మిదో రోజు సద్దుల బతుకమ్మకు అయిదు రకాల సద్దులు ఫలహారం ఇస్తారు. పెరుగన్నం, చింతపండు పులిహోర, సద్ది, నిమ్మకాయల పులిహోర, కొబ్బరి తురుము, నువ్వుల పొడి కలిపిన సద్ది ఫలహారంగా నైవేద్యం సమర్పించారు. సద్దుల బతుకమ్మను మహిళలు, యు వతులు, చిన్నారులు రంగు రంగుల పూలతో తయారు చేసి, ఒకచోట ఉంచి ఆడి పాడారు. పెద్ద పెద్ద బతుకమ్మలను తయారు చేసి గ్రామాల్లో ట్రాక్టర్లపై ఊరేగించారు. అనంతరం మేళతాళాలతో ఊరేగింపుగా బతుకమ్మలను చెరువుల్లో, కాలువల్లో నిమజ్జనం చేశారు.
ఖమ్మం నగరంలో అంబరాన్నంటిన సంబురాలు
ఖమ్మం నగరంలో సద్దుల బతుకమ్మ సంబురాలు సోమవారం అంబరాన్నంటాయి. వీధులన్నీ బతుకమ్మ ఆటపాటలతో మారుమ్రోగాయి. ఉదయం నుంచే ఆడబిడ్డలు ఎంతో ఓర్పుగా తీరొక్క పూలతో బతుకమ్మలను పేర్చారు. ఖమ్మం మార్కెట్ కమిటీ చైర్పర్సన్ డౌలే లక్ష్మీప్రసన్న తయారు చేయించిన మహాశక్తి స్వరూపిణీ బతుకమ్మ నగరవాసులను ఎంతగానో ఆకట్టుకుంది. సాయంత్రం బతుకమ్మ బతుకమ్మ ఉయ్యాలో.. బంగారు గౌరమ్మ ఉయ్యాలోఅంటూ గౌరమ్మ తల్లి పోయిరావమ్మా.. అంటూ బతుకమ్మలను గంగ ఒడికి వైభవంగా సాగనంపారు.