హోలీ.. రంగుల కేళి. మనస్సు నిండా ఆనందాన్ని నింపే సంబురం. చిన్నాపెద్ద, పేదాధనిక తేడాలేకుండా స్నేహభావంతో రంగులు చల్లుకునే కలర్ఫుల్ వేడుక. మనుషులంతా ఒక్కటే అనే సందేశమిచ్చే పండుగ. రంగులను ప్రేమగా ఒకరికొకరు ముఖాలకు పులుముకుంటూ వీధుల్లో చేసే సందడి అంతాఇంతా కాదు. అయితే ఈసారి కొంతమంది ఆదివారం, మరికొందరు సోమవారం హోలీ జరుపుకునేందుకు ఏర్పాట్లు చేసుకుంటున్నారు. రసాయన రంగులు వద్దని, సహజరంగులే ఆరోగ్యానికి మేలని ఎప్పటిలాగే వైద్యులు సూచిస్తున్నారు.
కొత్తగూడెం టౌన్/ సారపాక, మార్చి 23 : హోలీ సంబురాలను జరుపుకునేందుకు ఉమ్మడి ఖమ్మంజిల్లా ప్రజలు సిద్ధమయ్యారు. హోలీ పౌర్ణమిని పురస్కరించుకొని కాముడిదహనం, రంగులు చల్లుకునేందుకు ఏర్పాట్లు చేసుకున్నారు. హోలీ హోలీల రంగ హోలీ.. చమ్మకేలిల హోలీ అంటూ పాటలు పాడుకుంటూ చిన్నాపెద్దా కలిసి వేడుకల్లో పాల్గొననున్నారు. క్యాలెండర్లో ఆది, సోమవారాలు హోలీ వేడుకలు ఉండడంతో కొంతమంది ఆదివారం, మరికొంతమంది సోమవారం వేడుకలు జరుపుకోనున్నారు.
కాముడిదహనం చేయనున్నారు. సింగరేణి ఏరియాలో ప్రభుత్వ సెలవు సోమవారం కావడంతో హోలీ సంబురాలు జరగనున్నాయి. యువత రంగులను కొనుగోలు చేసే పనిలోపడ్డారు. కాలనీల్లో ఒకచోట అందరూ చేరి హోలీ రంగులు పూసుకుంటూ డీజే పాటలకు స్టెప్పులేయాలని ఏర్పాట్లు చేసుకుంటున్నారు. తమ స్నేహితులతో ఒక్కరోజు ఉల్లాసంగా, ఉత్సాహంగా గడిపేందుకు రెడీ అయ్యారు.
హోలీ పురాణమిదే..
హోలీ పుట్టుకను తెలిపే పురాణ గాథలు ఎన్నో ప్రచారంలో ఉన్నాయి. హోలిక అనే రాక్షసి తాను నివసించే పరిసర ప్రాంతాల్లో ఉండే పిల్లలను ఎత్తుకువెళ్లి తినేస్తుంటుంది. దీంతో ఆ ప్రాంతవాసులు హోలికను కాల్చి చంపుతారు. ఆనాటి నుంచి హోలిక పేరు మీద హోలీని జరుపుకోవడం ఆనవాయితీ.
హోలీకి ముందు అర్ధరాత్రి ‘కామదహనం’ అనాదిగా వస్తున్న ఆచారం. శరీరంలో రోగాలన్నీ మటుమాయమై అందరికీ ఆయురారోగ్యాలు చేకూరాలని ఆశిస్తూ ఇంట్లోని పాత వస్తువులు, కలపను, పేడతో చేసిన పిడకలను కూడళ్ల వద్దకు చేర్చి కామదహనం చేస్తారు. మిగిలిన బూడిదను దిష్టి తగలకుండా బొట్టుగా పెట్టుకుంటారు.
ప్రాచీనకాలంలో రంగుల కోసం మోదుగుపూలు వాడేవారు. ఇవి చర్మానికి ఎంతో శోభ తెచ్చేవి. మోదుగు పూలతో రంగులు తయారు చేసుకుని హోలీకేళిని జరుపుకునేవారు. మోదుగు పూలు ఈ కాలంలో వచ్చే రోగాలకు కూడా దివ్యమైన ఔషధం.