Visit:
మామిళ్లగూడెం, నవంబర్‌ 29 : రానున్న మూడేళ్లలో రాష్ట్రంలో బీఆర్‌ఎస్‌ పార్టీ మళ్లీ అధికారం చేపట్టడం ఖాయమని రాష్ట్ర మాజీ మంత్రి పువ్వాడ అజయ్‌కుమార్‌ అన్నారు. భారత రాష్ట్ర సమితి రాష్ట్ర కమిటీ పిలుపు మేరకు దీక్షా దివస్‌ కార్యక్రమాన్ని ఖమ్మం జిల్లాకేంద్రంలో శనివారం ఘనంగా నిర్వహించారు. బీఆర్‌ఎస్‌ జిల్లా అధ్యక్షుడు, ఎమ్మెల్సీ తాతా మధుసూదన్‌ అధ్యక్షతన జరిగిన వేడుకల్లో భాగంగా ఖమ్మం నగరంలో భారీ బైక్‌ ర్యాలీ నిర్వహించారు. తెలంగాణ ఉద్యమంలో అసువులు బాసిన అమరవీరులకు నగరంలోని అమవీరుల స్తూపం వద్ద ఘనంగా నివాళులు అర్పించారు. అక్కడి నుంచి ర్యాలీగా వెళ్లి బైపాస్‌ రోడ్డులో ఉన్న తెలంగాణ తల్లి విగ్రహానికి పూలమాలలు వేశారు.
అనంతరం ఎన్‌ఎస్‌పీ రోడ్డులో ఉన్న బీఆర్‌ఎస్‌ జిల్లా కార్యాలయంలో ఏర్పాటు చేసిన ‘కేసీఆర్‌ దీక్షా దివస్‌’ చిత్రపటానికి తాతా మధు, పువ్వాడ, మాజీ ఎమ్మెల్యేలు సండ్ర వెంకటవీరయ్య, బానోత్‌ చంద్రావతి, కందాల ఉపేందర్‌రెడ్డి, జడ్పీ మాజీ చైర్మన్‌ లింగాల కమల్‌రాజు, నాయకులు, తెలంగాణ ఉద్యమకారులు క్షీరాభిషేకం చేశారు. ఈ సందర్భంగా ఏర్పాటు చేసిన సభలో నాయకులు, ఉద్యమ నాయకులు మాట్లాడారు. మాజీ మంత్రి పువ్వాడ మాట్లాడుతూ 11 రోజుల ఆమరణ నిరాహార దీక్షతో చావుఅంచుల దాకా వెళ్లినా పట్టువిడవని కేసీఆర్‌ ఉక్కు సంకల్పంతోనే రాష్ట్రం సిద్ధించిందన్నారు. తాను బతికి ఉన్నంత వరకు కేసీఆర్‌ చేయి వదిలే ప్రసక్తేలేదన్నారు. కాంగ్రెస్‌ నాయకులు అధికారాన్ని అడ్డం పెట్టుకుని బీఆర్‌ఎస్‌ నాయకులు, కార్యకర్తలను వేధింపులకు గురిచేస్తే సహించేది లేదని హెచ్చరించారు.
ప్రజలు ఈ స్థానిక సంస్థల ఎన్నికల్లో ధైర్యంగా కాంగ్రెస్‌ పార్టీకి బుద్ధి చెప్పాలని పిలుపునిచ్చారు. బీఆర్‌ఎస్‌లో అధికారాన్ని అనుభవించి నేడు తిరిగి కాంగ్రెస్‌ పార్టీలో చేరి కేసీఆర్‌పై అవాకులు చవాకులు మాట్లాడుతున్నారని ఆగ్రహం వ్యక్తం చేశారు. కేసీఆర్‌ రెక్కల కష్టంతోనే నేడు కాంగ్రెస్‌ నాయకులు అనుభవిస్తున్న పదవులన్నారు. ప్రజలకు ఎన్నికల సమయంలో ఇచ్చిన హామీలను పక్కన పెట్టి తెలంగాణ స్వప్నాన్ని నిజం చేసిన కేసీఆర్‌ను తిడుతూ కాలం వెల్లబుచ్చుతున్నారని విమర్శించారు. కేసీఆర్‌ ఉద్యమ చరిత్రను గ్రామస్థాయిలో ప్రజలకు వివరించాలని, కాంగ్రెస్‌ ప్రభుత్వ వైఫల్యాలను ఇంటింటికీ తెలియజేయాలని సూచించారు.
జిల్లాలో బీఆర్‌ఎస్‌ కార్యకర్తలు, నాయకులకు పార్టీ ఎల్లప్పుడూ అండగా ఉంటుందని, అధికార పార్టీ బెదిరింపులకు భయపడే ప్రసక్తేలేదని ఎమ్మెల్సీ, బీఆర్‌ఎస్‌ జిల్లా అధ్యక్షుడు తాతా మధుసూదన్‌ అన్నారు. పాలేరు, మధిర నియోజకవర్గాల్లో మంత్రుల సహకారంతో బీఆర్‌ఎస్‌ కార్యకర్తలను వేధింపులకు గురిచేస్తే వారు ఆత్మహత్యాయత్నం చేశారని గుర్తుచేశారు. కేసీఆర్‌ చేసిన దీక్షా దివస్‌ ఉద్యమాన్ని ప్రజల్లోకి తీసుకపోవాలన్నారు. స్థానిక సంస్థల ఎన్నికల్లో బీఆర్‌ఎస్‌ అభ్యర్థులను గెలిపించాలని, కాంగ్రెస్‌ ప్రభుత్వం అనుసరిస్తున్న ప్రజా వ్యతిరేక విధానాలను ప్రజలకు వివరించాలని సూచించారు.
మాజీ ఎమ్మెల్యే సండ్ర వెంకటవీరయ్య మాట్లాడుతూ కేసీఆర్‌ దీక్షా దివస్‌ స్ఫూర్తితో ప్రతి ఒక్కరూ ముందుకెళ్లాలని సూచించారు. కాంగ్రెస్‌ పార్టీ ఇచ్చిన హామీలను అమలు చేసేవరకు ఆ పార్టీ నాయకులను నిలదీయాలని అన్నారు. కాంగ్రెస్‌ బెదిరింపులకు ఎవరు భయపడరాదని, పార్టీ అండగా ఉంటుందని అన్నారు.
ప్రజలు, యువతను చైతన్యం చేయాలని కార్యకర్తలకు సూచించారు. మాజీ ఎమ్మెల్యే కందాల ఉపేందర్‌రెడ్డి మాట్లాడుతూ ప్రజాసంక్షేమం, రాష్ట్ర అభివృద్ధిని కొనసాగించేది బీఆర్‌ఎస్‌ మాత్రమేనని అన్నారు. స్థానిక సంస్థల ఎన్నికల్లో కాంగ్రెస్‌కు ప్రజలే బుద్ధి చెబుతారన్నారు. మహానేత కేసీఆర్‌పై ఆరోపణలు చేయడం సమంజసం కాదన్నారు. మాజీ ఎమ్మెల్యే బానోత్‌ చంద్రావతి మాట్లాడుతూ రాష్ట్రంలో ఎస్సీ, ఎస్టీ, బీసీ, మైనార్టీల సంక్షేమాన్ని కాంగ్రెస్‌ ప్రభుత్వం గాలికి వదిలిందన్నారు. కేసీఆర్‌ నాయకత్వంలో పనిచేయడం ఎంతో ఉత్సాహాన్ని ఇస్తుందన్నారు. జడ్పీ మాజీ చైర్మన్‌ లింగాల కమల్‌రాజు మాట్లాడుతూ తన ప్రాణాన్ని పణంగా పెట్టి రాష్ర్టాన్ని సాధించిన గొప్ప నాయకుడు కేసీఆర్‌పై కాంగ్రెస్‌ నాయకులు ఆరోపణలు చేస్తే ఊరుకోమని హెచ్చరించారు.
బీఆర్‌ఎస్‌ కార్యకర్తలను వేధింపులకు గురిచేయడం, నాయకుల మీద కేసులు పెట్టడం తప్ప అభివృద్ధి చేసేది ఏమీలేదని ఆరోపించారు. బీఆర్‌ఎస్‌ నాయకులు బొమ్మర రామ్మూర్తి, ఉప్పల వెంకటరమణ, బిచ్చాల తిరుమలరావు నాటి ఉద్యమ జ్ఞాపకాలను, సమైక్యవాదుల కుట్రలను వివరించారు. కార్యక్రమంలో ఉద్యమకారులు పగడాల నరేంద్ర, మేకల సుగుణారావు, సంపత్‌, నరేష్‌, పార్టీ ఖమ్మం నగర అధ్యక్షుడు పగడాల నాగరాజు, ఖమ్మంరూరల్‌ అధ్యక్షుడు బెల్లం వేణుగోపాల్‌, సుడా మాజీ చైర్మన్‌ బచ్చు విజయ్‌కుమార్‌, గ్రంథాలయ మాజీ చైర్మన్‌ ఖమర్‌, మార్కెట్‌ కమిటీ మాజీ చైర్మన్‌ ఆర్‌జేసీ కృష్ణ, డీసీసీబీ మాజీ చైర్మన్‌ కూరాకుల నాగభూషణం, పార్టీ మైనార్టీ విభాగం అధ్యక్షుడు తాజుద్దీన్‌, కార్పొరేటర్‌ కర్నాటి కృష్ణ, మక్బుల్‌, ఇతర నాయకులు పాల్గొన్నారు.
