టోల్ వసూళ్ల‌పై ఉన్న శ్ర‌ద్ధ‌ సౌకర్యాల‌పై ఏది?

విజయవాడ–జగదల్‌పూర్ జాతీయ రహదారి-30పై రుద్రంపూర్–పెనగడప పంచాయతీల మధ్య ఏర్పాటు చేసిన ట్రక్ లే-బైలో లారీ డ్రైవర్లకు కనీస సౌకర్యాలు అందుబాటులో లేకపోవడంపై ఆందోళన వ్యక్తమవుతోంది. వాహనాల నుండి టోల్ టాక్స్ వసూలు చేస్తున్నప్పుడు...

– ట్రక్ లే-బైలో నీటి కొరత.. నిరుపయోగంగా మరుగుదొడ్లు
– వెలగని వీధి దీపాలతో లారీ డ్రైవర్లకు ఇబ్బందులు

రుద్రంపూర్, అక్టోబర్ 26 : విజయవాడ–జగదల్‌పూర్ జాతీయ రహదారి-30పై రుద్రంపూర్–పెనగడప పంచాయతీల మధ్య ఏర్పాటు చేసిన ట్రక్ లే-బైలో లారీ డ్రైవర్లకు కనీస సౌకర్యాలు అందుబాటులో లేకపోవడంపై ఆందోళన వ్యక్తమవుతోంది. వాహనాల నుండి టోల్ టాక్స్ వసూలు చేస్తున్నప్పుడు, డ్రైవర్లకు అవసరమైన వసతులను సక్రమంగా నిర్వహించాల్సిన బాధ్యత ఎవరిది? అనే ప్రశ్నలు వినిపిస్తున్నాయి. ట్రక్ లే-బైలోని మరుగుదొడ్లు, స్నానపు గదులు వినియోగానికి అనువుగా లేవని, నీటి సరఫరా, నిర్వహణపై సమస్యలు ఉన్నాయని వాహనదారులు చెబుతున్నారు. దీంతో సుదూర ప్రయాణాలు చేసే లారీ డ్రైవర్లు కాలకృత్యాలు తీర్చుకోవడానికి, స్నానం చేసేందుకు ఇబ్బందులు ఎదుర్కొంటున్నారు.

మరోవైపు, విశ్రాంతి గదుల వినియోగంపై కూడా స్పష్టత అవసరమవుతోంది. రాత్రివేళ వీధి దీపాలు వెలగకపోవడంతో లారీలు నిలిపే ప్రాంతం చీకటిగా మారి, వాహనాల రాకపోకల సమయంలో ప్రమాదాలపై ఆందోళన నెలకొంటోంది. డ్రైవర్ల విశ్రాంతి, పారిశుధ్యం, భద్రత కోసం ఏర్పాటు చేసిన ట్రక్ లే-బైలోనే ఇలాంటి సమస్యలు ఉంటే దాని ప్రయోజనం ఏమిటని వాహనదారులు ప్రశ్నిస్తున్నారు. సంబంధిత జాతీయ రహదారుల సంస్థ అధికారులు క్షేత్రస్థాయిలో పరిశీలించి, మరుగుదొడ్లు, స్నానపు గదులకు నీటి సరఫరా, విశ్రాంతి గదుల నిర్వహణ, వీధి దీపాల మరమ్మతులపై చర్యలు తీసుకోవాలని కోరుతున్నారు.