రిటర్నింగ్‌ వాల్‌ మూసివేతపై డీజీఎం సివిల్‌ రాజేంద్ర కుమార్ విచారణ

సింగరేణి కార్మిక కుటుంబాలకు మంచినీరు అందించే ఫిల్టర్‌ బెడ్‌లో రిటర్నింగ్‌ వాల్‌ను మూసివేయడంతో కాలనీలకు నీటి సరఫరాకు అంతరాయం ఏర్పడిన ఘటన కలకలం రేపుతోంది. ఫిల్టర్‌ బెడ్‌లో క్లీనింగ్‌ పనులు చేసే కాంట్రాక్టు కార్మికులకు జీతాలు చెల్లించకపోవడమే వివాదానికి కారణమా? కార్మిక కుటుంబాలకు తాగునీటి సరఫరాను అడ్డుకునే పరిస్థితి...

రుద్రంపూర్, అక్టోబర్ 13 : సింగరేణి కార్మిక కుటుంబాలకు మంచినీరు అందించే ఫిల్టర్‌ బెడ్‌లో రిటర్నింగ్‌ వాల్‌ను మూసివేయడంతో కాలనీలకు నీటి సరఫరాకు అంతరాయం ఏర్పడిన ఘటన కలకలం రేపుతోంది. ఫిల్టర్‌ బెడ్‌లో క్లీనింగ్‌ పనులు చేసే కాంట్రాక్టు కార్మికులకు జీతాలు చెల్లించకపోవడమే వివాదానికి కారణమా? కార్మిక కుటుంబాలకు తాగునీటి సరఫరాను అడ్డుకునే పరిస్థితి ఎందుకు తలెత్తింది? రిటర్నింగ్‌ వాల్‌ను మూసివేసింది ఎవరు? అనే ప్రశ్నలు ప్రస్తుతం చర్చనీయాంశంగా మారాయి. సింగరేణి కొత్తగూడెం ఏరియా పరిధిలోని రుద్రంపూర్‌ కాలనీలకు ఫిల్టర్‌ బెడ్‌ ద్వారా శుద్ధి చేసిన మంచినీటిని సరఫరా చేస్తున్నారు. భూగర్భ గనుల నుంcr వచ్చే బొగ్గు కలిసిన నీటిని ఫిల్టర్‌ బెడ్‌లోని ఇసుక ద్వారా శుద్ధి చేసి కాలనీలకు పంపిస్తారు. ఈ క్రమంలో ఇసుకపై మట్టి పేరుకుపోతుండcgతో ప్రతి రెండు రోజులకు ఒకసారి క్లీనింగ్‌ పనులు నిర్వహించాల్సి ఉంటుంది. ఈ పనులను కాంట్రాక్టు కార్మికులతో చేయిస్తున్నారు. అయితే, గత కొన్ని రోజులుగా క్లీనింగ్‌ కార్మికులకు కాంట్రాక్టర్‌ జీతాలు చెల్లించకపోవడంతో వివాదం నెలకొన్నట్లు సమాచారం. ఇసుకపై పేరుకుపోయిన మట్టిని తొలగించే పనులు సక్రమంగా జరగకపోవడంతో నీటి శుద్ధి ప్రక్రియపై ప్రభావం పడినట్లు తెలుస్తోంది. ఈ నేపథ్యంలో ఫిల్టర్‌ బెడ్‌లో రిటర్నింగ్‌ వాల్‌ను మూసివేయడంతో నీటి సరఫరాకు మరింత ఆటంకం ఏర్పడి కార్మిక కుటుంబాలు ఇబ్బందులు ఎదుర్కొంటున్నాయి.

ఫిల్టర్‌ బెడ్‌ను సందర్శించిన డీజీఎం సివిల్‌

రిటర్నింగ్‌ వాల్‌ మూసివేతతో నీటి సరఫరాకు అంతరాయం ఏర్పడిన విషయం తెలుసుకున్న డీజీఎం సివిల్‌ రాజేందర్‌ ఫిల్టర్‌ బెడ్‌ను సందర్శించారు. వాటర్‌ సప్లై కార్మికులతో రిటర్నింగ్‌ వాల్‌ పునరుద్ధరణ పనులు చేయించారు. ఈ ఘటనపై విచారణ చేపట్టి, వాల్‌ను మూసివేసిన పరిస్థితులు, అందుకు బాధ్యులెవరనే అంశాలను పరిశీలిస్తున్నారు. ఆయనతోపాటు ఈ ఈ సుమంత్, సూపర్‌వైజర్లు శ్రీనివాస్, ప్రభుదాస్ ఉన్నారు

జీతాల వివాదం

కాంట్రాక్టర్‌ కార్మికులకు జీతాలు చెల్లించకపోవడం ఒకవైపు సమస్యగా ఉంటే, మరోవైపు కాలనీలకు మంచినీరు అందక కుటుంబాలు ఇబ్బందులు పడటం మరో సమస్యగా మారింది. కాంట్రాక్టర్‌–కార్మికుల మధ్య వివాదం ఏదైనా ఉంటే దాన్ని పరిష్కరించాల్సిన బాధ్యత సంబంధిత కాంట్రాక్టర్‌తోపాటు పర్యవేక్షణాధికారులపైనా ఉంటుంది. అంతేతప్ప, ఆ వివాదం కారణంగా కార్మిక కుటుంబాలు తాగునీటికి దూరం కావడం సమంజసం కాదని స్థానికులు అభిప్రాయపడుతున్నారు. ఏరియా ఉన్నతాధికారులు ఈ ఘటనను సాధారణ సమస్యగా తీసుకోకుండా, మంచినీటి సరఫరాను నిరంతరాయంగా కొనసాగించేందుకు చర్యలు చేపట్టాలని కార్మిక కుటుంబాలు కోరుతున్నాయి.