Vemulawada | బతికి ఉండగానే స్మశానానికి..! కొన ఊపిరితో ఉన్న కొడుకుని చూసి తల్లడిల్లిన తల్లి అమృత

చెట్టంత కొడుకు అనారోగ్యం పాలై జీవచ్ఛవంలా కొనఊపిరితో కొట్టుమిట్టాడుతుండగా తన కండ్ల ముందే కొడుకుని స్మశానానికి తీసుకెళ్లాల్సిన దుర్భర పరిస్థితి ఏ తల్లికి రాకూడదంటూ తల్లి అమృత తల్లడిల్లిన తీరు ప్రతి గుండెను పిండేసింది.

• మున్సిపల్ చైర్మన్ రాజు చొరవతో సిరిసిల్ల ప్రభుత్వ ఆసుపత్రికి తరలింపు
• వేములవాడలో మంట కలిసిన మానవత్వం

Vemulawada | వేములవాడ, నవంబర్ 6 : చెట్టంత కొడుకు అనారోగ్యం పాలై జీవచ్ఛవంలా కొనఊపిరితో కొట్టుమిట్టాడుతుండగా తన కండ్ల ముందే కొడుకుని స్మశానానికి తీసుకెళ్లాల్సిన దుర్భర పరిస్థితి ఏ తల్లికి రాకూడదంటూ తల్లి అమృత తల్లడిల్లిన తీరు ప్రతి గుండెను పిండేసింది. చందుర్తి మండలంలోని కిష్టంపేట గ్రామానికి మర్రిపల్లి అమృత ఇద్దరు కుమారులు కాగా ఒకరు నిజాంబాద్ లో ఉంటుండగా అనారోగ్యం పాలైన కుమారుడు రాకేష్ ను పట్టుకొని వేములవాడలో అద్దె ఇంట్లో నివాసం ఉంటుంది. రాకేష్ కాలేయ సమస్యతో బాధపడుతూ అనారోగ్యం పాడిన పడ్డాడు. అయితే పరిస్థితి విషమించగా కొనఊపిరితో ఉన్న రాకేష్ ను గురువారం వేములవాడ ప్రభుత్వ ఏరియా ఆసుపత్రికి వైద్యం కోసం తరలించింది.

పరిస్థితి విషమంగా ఉండడంతో సిరిసిల్ల జనరల్ ఆసుపత్రికి వెళ్లాలని వైద్యులు సూచించడంతో అక్కడికి వెళ్లలేని పరిస్థితుల్లో మళ్లీ తిరిగి అద్దె ఇంటికి చేరుకుంది. కొన ఊపిరితో ఉన్న రాకేష్ ను చూసిన యజమాని అభ్యంతరం వ్యక్తం చేయడంతో శుక్రవారం తెల్లవారుజామున వేములవాడ పట్టణంలోని వైకుంఠధామానికి తీసుకువచ్చారు. ప్రాణం ఉండగానే స్మశాన వాటికకు చేరుకోవడంతో తల్లి గుండె తెల్లటిల్లడంతో పాటు కన్నీటి పర్యంతమైంది. చివరకు విషయం తెలుసుకున్న మున్సిపల్ చైర్మన్ పుల్కం రాజు, కమిషనర్ లోకేష్ అక్కడికి చేరుకొని 108 వాహనంలో సిరిసిల్ల జనరల్ ఆసుపత్రికి తరలించి వైద్య చికిత్సను అందించారు. రాకేష్ పరిస్థితి విషమంగానే ఉందని వైద్యులు సూచించినట్లు వారు తెలిపారు. మనిషి బ్రతికి ఉండగానే స్మశానానికి తీసుకెళ్లిన ఘటన మానవత్వాన్ని మంట మంట కలిపింది.