సంతోషాలు నింపాలి

స్మస్‌ ప్రపంచ వ్యాప్తంగా జరుపుకునే పండుగ అని మాజీ మంత్రి, కరీంనగర్‌ ఎమ్మెల్యే గంగుల కమలాకర్‌ పేర్కొన్నారు. ఈ పండుగను అందరూ కలిసి మెలిసి జరుపుకోవాలని సూచించారు.

• అందరూ కలిసి జరుపుకోవాలి
• కరీంనగర్‌ ఎమ్మెల్యే గంగుల కమలాకర్‌

కరీంనగర్‌ కమాన్‌ చౌరస్తా, డిసెంబర్‌ 25 : క్రిస్మస్‌ ప్రపంచ వ్యాప్తంగా జరుపుకునే పండుగ అని మాజీ మంత్రి, కరీంనగర్‌ ఎమ్మెల్యే గంగుల కమలాకర్‌ పేర్కొన్నారు. ఈ పండుగను అందరూ కలిసి మెలిసి జరుపుకోవాలని సూచించారు. సోమవారం ఆయన కరీంనగర్‌తోపాటు నియోజకవర్గంలోని పలు చర్చిలను సందర్శించి, క్రైస్తవులకు శుభాకాంక్షలు తెలిపారు. క్రిస్మస్‌ అందరి జీవితాల్లో సంతోషాలు నింపాలని ఆకాంక్షించారు. ఈ సందర్భంగా ఆయన మాట్లాడుతూ, ప్రపంచ శాంతిని కోరుకున్న వ్యక్తి ఏసు ప్రభువును అని గుర్తు చేశారు.

ఏసు చూపిన బాటలో ప్రతి ఒక్కరూ నడవాలని సూచించారు. ఆదర్శనగర్‌లోని బ్లెస్సింగ్‌ గాస్పెల్‌ మినిస్ట్రీస్‌ చర్చ్‌లో ఎమ్మెల్యే గంగులను ఆశీర్వదించారు. కరీంనగర్‌ మండలం ఇరుకుల్లలోని బేతేలు ప్రార్థన మందిరంలో కేక్‌ను కట్‌ చేశారు. ఆయాచోట్ల ఆయన వెంట మేయర్‌ సునీల్‌ రావు, డిప్యూటీ మేయర్‌ చల్ల స్వరూపరాణి, బీఆర్‌ఎస్‌ నగర అధ్యక్షుడు చల్ల హరిశంకర్‌, మాజీ గ్రంథాలయ చైర్మన్‌ పొన్నం అనిల్‌ కుమార్‌ గౌడ్‌, నాయకులు బోనాల శ్రీకాంత్‌, గందె మహేశ్‌, అర్ష మల్లేశం, కర్ర సూర్యశేఖర్‌, క్రైస్తవ మతగురువు, క్రైస్తవులు, తదితరులు పాల్గొన్నారు.