CCTV cameras | సీసీ కెమెరాల ఏర్పాటుతో నేరాలకు అడ్డుకట్ట.. హుజురాబాద్‌ ఏసీపీ మాధవి

నేరాల నియంత్రణకు సీసీ కెమెరాలు దోహదం చేస్తాయని, నేరాలకు అడ్డుకట్ట వేయవచ్చని హుజురాబాద్‌ ఏసీపీ మాధవి అన్నారు. కేశవపట్నం గ్రామంలో పోలీసులు శనివారం కార్డన్ అండ్ సెర్చ్ ఆపరేషన్ నిర్వహించారు. హుజూరాబాద్ సబ్ డివిజన్ పోలీస్ అధికారుల ఆధ్వర్యంలో జరిగిన ఈ తనిఖీల్లో సరైన ధ్రువపత్రాలు లేని 72 వాహనాలను సీజ్ చేశారు.

• కేశవపట్నంలో కార్డన్ అండ్ సెర్చ్.. 72 వాహనాల సీజ్
• అనుమానితులపై నిఘా, ధ్రువపత్రాలు లేని వాహనాలపై చర్యలు

CCTV cameras | కేశవపట్నం, అక్టోబర్ 31 (నమస్తే తెలంగాణ) : నేరాల నియంత్రణకు సీసీ కెమెరాలు దోహదం చేస్తాయని, నేరాలకు అడ్డుకట్ట వేయవచ్చని హుజురాబాద్‌ ఏసీపీ మాధవి అన్నారు. కేశవపట్నం గ్రామంలో పోలీసులు శనివారం కార్డన్ అండ్ సెర్చ్ ఆపరేషన్ నిర్వహించారు. హుజూరాబాద్ సబ్ డివిజన్ పోలీస్ అధికారుల ఆధ్వర్యంలో జరిగిన ఈ తనిఖీల్లో సరైన ధ్రువపత్రాలు లేని 72 వాహనాలను సీజ్ చేశారు. ఈ ఆపరేషన్‌లో 40 మంది పోలీస్ అధికారులు, సిబ్బందితో పాటు రెండు ప్రత్యేక స్ట్రైకింగ్ టీమ్స్ పాల్గొన్నాయి. గ్రామంలోని ఇళ్లు, పరిసర ప్రాంతాల్లో తనిఖీలు నిర్వహించి, అనుమానిత వ్యక్తులు, గుర్తుతెలియని వ్యక్తులు, అసాంఘిక కార్యకలాపాలపై ప్రత్యేకంగా దృష్టి సారించారు.

సీజ్ చేసిన వాహనాల్లో 65 ద్విచక్ర వాహనాలు, 4 త్రిచక్ర వాహనాలు, 3 నాలుగు చక్రాల వాహనాలు ఉన్నాయి. ఈ సందర్భంగా హుజూరాబాద్ ఏసీపీ మాధవి మాట్లాడుతూ, కార్డన్ అండ్ సెర్చ్ ఆపరేషన్ ద్వారా గ్రామాల్లో నివసిస్తున్న అనుమానితులను, గుర్తుతెలియని వ్యక్తులను గుర్తించవచ్చని తెలిపారు. అక్రమ కార్యకలాపాలను ముందుగానే పసిగట్టి, నేరాలను నియంత్రించేందుకు ఇది అవకాశం కల్పిస్తుందన్నారు. ప్రజల్లో భద్రతాభావాన్ని, ధైర్యాన్ని పెంపొందించడంతో పాటు, నేరస్థుల్లో పోలీసుల పట్ల భయాన్ని కలిగించేందుకు ఇటువంటి ఆపరేషన్లు ఎంతగానో ఉపయోగపడతాయని వివరించారు. ప్రజలు సైబర్ నేరాల పట్ల అప్రమత్తంగా ఉండాలని, గంజాయి సహా ఇతర మాదకద్రవ్యాలకు దూరంగా ఉండాలని ఏసీపీ సూచించారు. రోడ్డు భద్రతా నియమాలను తప్పనిసరిగా పాటించాలని, కొత్తగా నిర్మించిన బైపాస్ రోడ్డుపై వాహనదారులు నిర్దేశించిన మార్గంలోనే ప్రయాణించాలని, ట్రాఫిక్ నిబంధనలు పాటిస్తూ ప్రమాదాల నివారణకు సహకరించాలని కోరారు. గ్రామాల్లో అనుమానాస్పద వ్యక్తులు లేదా అసాంఘిక కార్యకలాపాలు గమనిస్తే వెంటనే పోలీసులకు సమాచారం అందించాలని, శాంతిభద్రతల పరిరక్షణలో పోలీసులకు సహకరించాలని విజ్ఞప్తి చేశారు.