ఉమ్మడి జిల్లాలో వాన

ఉమ్మడి కరీంనగర్‌ జిల్లాలో గురువారం మోస్తారు వాన పడ్డది. పలుచోట్ల ఈదురు గాలులు, ఉరుములు మెరుపులతో దంచికొట్టింది. రాజన్న సిరిసిల్ల జిల్లా వేములవాడ పట్టణంలో కట్టు కాలువ సమీపంలో విద్యుత్‌ స్తంభం పై పిడుగు పడి, లైన్‌ తెగిపోయింది.

వేములవాడ/ రుద్రంగి/ జగిత్యాలరూరల్‌/ జగిత్యాలటౌన్‌, జూన్‌ 6: ఉమ్మడి కరీంనగర్‌ జిల్లాలో గురువారం మోస్తారు వాన పడ్డది. పలుచోట్ల ఈదురు గాలులు, ఉరుములు మెరుపులతో దంచికొట్టింది. రాజన్న సిరిసిల్ల జిల్లా వేములవాడ పట్టణంలో కట్టు కాలువ సమీపంలో విద్యుత్‌ స్తంభం పై పిడుగు పడి, లైన్‌ తెగిపోయింది. వేములవాడరూరల్‌ మండలం అచ్చన్నపల్లిలో పిడుగుపాటుకు రెండు ఆవులు మృతిచెందాయి. రుద్రంగిలోని కొనుగోలు కేంద్రాల్లో అరబోసిన ధాన్యం మ్యాచర్‌ వచ్చినప్పటికీ కొనుగోలు చేయకపోవడంతో వర్షానికి తడిసి ముద్దయింది.

రెండు నెలలైనా ధాన్యం తూకం వేయలేదని, పూర్తిగా అధికారుల నిర్లక్ష్యంతోనే నష్టపోయామని రైతులు వాపోయారు. తడిసిన ధాన్యాన్ని కొనాలని డిమాండ్‌ చేశారు. ఎల్లారెడ్డిపేట మండలం తిమ్మాపూర్‌లో అమరగొండ ఎల్లయ్య అనే గొర్రెల కాపరి పిడుగుపాటుతో గాయాలపాలయ్యాడు. జగిత్యాల రూరల్‌ మండలం రఘురాముల కోటలో దండె రఘుకు చెందిన రేకులషెడ్డుపై తాటి చెట్టు విరిగి పడింది. ఆ సమయంలో ఇంట్లో ఎవరూలేకపోవడంతో పెను ప్రమాదం తప్పింది.