Visit:
Ramancha | చిగురుమామిడి, సెప్టెంబర్ 25 : పోషణ మాసం కార్యక్రమంలో భాగంగా చిగురుమామిడి మండలంలోని రామంచ గ్రామంలోని అంగన్వాడీ కేంద్రంలో గర్భిణీలు, బాలింతలు, కిశోర బాలికలతో ప్రత్యేక అవగాహన కార్యక్రమాన్ని శుక్రవారం నిర్వహించారు. ఈ కార్యక్రమానికి ఐసీడీఎస్ సూపర్వైజర్ ఇస్రాత్ సుల్తానా హాజరై పౌష్టికాహారం, ఆరోగ్య పరిరక్షణ, పరిశుభ్రత, సమతుల్య ఆహారంపై అవగాహన కల్పించారు. చిన్నారుల శారీరక, మానసిక ఎదుగుదలకు పౌష్టికాహారం ఎంతో కీలకమని, పిల్లలకు రోజువారీ ఆహారంలో ఆకుకూరలు, కూరగాయలు, పప్పుధాన్యాలు, చిరుధాన్యాలు, పాలు, గుడ్లు తదితర పోషక విలువలు కలిగిన ఆహార పదార్థాలను అందించాలని సూచించారు. పిల్లల ఎదుగుదలను ఎప్పటికప్పుడు గమనిస్తూ, వయస్సుకు తగిన ఆహారం అందించాల్సిన అవసరం ఉందన్నారు.గర్భిణీలు, బాలింతలు తమ ఆరోగ్యంపై ప్రత్యేక శ్రద్ధ వహించాలని సూచించారు.
గర్భధారణ సమయంలో వైద్యుల సూచనలను పాటిస్తూ సమతుల్య ఆహారం తీసుకోవాలని, ఐరన్, కాల్షియం వంటి అవసరమైన పోషకాలు అందేలా ఆహారపు అలవాట్లను మెరుగుపరుచుకోవాలని వివరించారు. ప్రసవానంతరం బాలింతలు కూడా తగినంత పౌష్టికాహారం తీసుకోవడంతో పాటు శిశువుకు తల్లిపాలను అందించడం ద్వారా బిడ్డ ఆరోగ్యవంతమైన ఎదుగుదలకు తోడ్పడాలని సూచించారు.కిశోర బాలికలు పోషకాహార లోపానికి గురికాకుండా చిన్న వయస్సు నుంచే ఆరోగ్యకరమైన ఆహారపు అలవాట్లను అలవరచుకోవాలని, వ్యక్తిగత పరిశుభ్రత, పరిసరాల పరిశుభ్రత, చేతులు శుభ్రంగా కడుక్కోవడం వంటి ఆరోగ్య నియమాలను ప్రతీ ఒక్కరూ పాటించాలని సూచించారు. అంగన్వాడీ కేంద్రాల ద్వారా చిన్నారులు, గర్భిణీలు, బాలింతలు, కిశోర బాలికలకు అందుతున్న సేవలను సద్వినియోగం చేసుకోవాలని కోరారు.ఈ కార్యక్రమంలో అంగన్వాడీ టీచర్లు పుష్ప అంజలి, ఆశ మంజుల, గర్భిణీలు, బాలింతలు, కిశోర బాలికలు తదితరులు పాల్గొన్నారు.
