ప్రపంచంలోనే అతిపెద్ద మొక్క

• 180 కిలోమీటర్లలో విస్తరణ..
• ఆస్ట్రేలియాలో గుర్తింపు

కాన్‌బెర్రా, జూన్‌ 2: ప్రపంచంలోనే అతిపెద్ద మొక్కను శాస్త్రవేత్తలు తాజాగా కనుగొన్నారు. 4,500 ఏండ్ల నాటిదిగా భావిస్తున్న ఈ మొక్క పశ్చిమ ఆస్ట్రేలియా తీరంలోని ‘షార్క్‌బే’లో నీటి అడుగున పెరుగుతున్నట్టు గుర్తించారు. ఈ మొక్క 180 చదరపు కిలోమీటర్ల విస్తీర్ణంలో వ్యాప్తించి ఉంటుందని అంచనా. అంటే గ్లాస్గొ నగరం కంటే పెద్ద విస్తీర్ణం అన్నమాట. ఈ మేరకు అధ్యయన వివరాలు ‘ప్రొసీడింగ్స్‌ ఆఫ్‌ ది రాయల్‌ సొసైటీ బీ’ అనే జర్నల్‌లో ప్రచురితమయ్యాయి. అయితే ఈ పెద్ద మొక్క గుర్తింపు అనుకోకుండా జరిగిందని, షార్క్‌ బేలోని సముద్రపు గడ్డి జన్యువైవిధ్యాన్ని అధ్యయనం చేస్తున్న క్రమంలో ఇది వెలుగుచూసిందని పరిశోధకులు పేర్కొన్నారు. మొదటగా ఈ మొక్కను పెద్ద సముద్రపు గడ్డి మైదానంగా భావించారు. ఒకే విత్తనం నుంచి ఈ మొక్క అంతా వ్యాప్తించినట్టు తర్వాత గుర్తించారు.